ಬೆಳಗಾವಿ: ಉತ್ತಮ ಮಳೆ– ಸಂಚಾರಕ್ಕೆ ಅಡಚಣೆ

ಬೆಳಗಾವಿ: ಬೆಳಗಾವಿ ನಗರದ ವಿವಿಧ ಬಡಾವಣೆಗಳಲ್ಲಿ ಶನಿವಾರ ಉತ್ತಮ ಮಳೆ ಸುರಿದಿದ್ದರಿಂದ ವಾತಾವರಣ ತಂಪೇರಿತು.

ಬೆಳಿಗ್ಗೆಯಿಂದ ಮೋಡ ಕವಿದಿತ್ತು. ಆಗಾಗ ತುಂತುರು ಮಳೆಯಾಗುತ್ತಿತ್ತು. ಸಂಜೆ ಆರಂಭಗೊಂಡ ಮಳೆ ಚುರುಕು ಪಡೆದು, ಮೂರು ತಾಸಿಗೂ ಅಧಿಕ ಹೊತ್ತು ಸುರಿಯಿತು.

ಇಲ್ಲಿನ ಹಳೆಯ ಪಿ.ಬಿ. ರಸ್ತೆ, ಕ್ಯಾಂಪ್‌ ಪ್ರದೇಶದ ಮುಖ್ಯರಸ್ತೆ, ಭಾಗ್ಯ ನಗರದ ರಸ್ತೆ ಮತ್ತಿತರ ಮಾರ್ಗಗಳಲ್ಲಿ ಅಪಾರ ಪ್ರಮಾಣದಲ್ಲಿ ನೀರು ನಿಂತಿದ್ದರಿಂದ ಸಂಚಾರಕ್ಕೆ ಅಡಚಣೆ ಉಂಟಾಯಿತು. ಭಾಗ್ಯ ನಗರದ 1ನೇ ಕ್ರಾಸ್‌ನ ಮನೆಗಳು ಹಾಗೂ ಬೆಂಢಿ ಬಜಾರ್‌ ವೃತ್ತದ ತಗ್ಗು ಪ್ರದೇಶದಲ್ಲಿನ ಅಂಗಡಿಗಳಿಗೆ ನುಗ್ಗಿದ್ದ ನೀರು ಹೊರಹಾಕಲು ಜನರು ಪ್ರಯಾಸಪಟ್ಟರು.