ಬೆಳಗಾವಿ: ಚಿನ್ನಾಭರಣ ವ್ಯಾಪಾರಿಗೆ ಗನ್ ತೋರಿಸಿ ₹75 ಲಕ್ಷ ದರೋಡೆ

ಸಂಕೇಶ್ವರ (ಬೆಳಗಾವಿ ಜಿಲ್ಲೆ): ಚಿನ್ನಾಭರಣ ವ್ಯಾಪಾರಿಯೊಬ್ಬರ ಕಾರು ಅಡ್ಡಗಟ್ಟಿದ ಇಬ್ಬರು ದುಷ್ಕರ್ಮಿಗಳು, ಗನ್‌ ತೋರಿಸಿ ₹75 ಲಕ್ಷ ಕಿತ್ತುಕೊಂಡು ಪರಾರಿಯಾದ ಘಟನೆ ಸಮೀಪದ ಹರಗಾಪುರ ಗ್ರಾಮದ ಬಳಿ ರಾಷ್ಟ್ರೀಯ ಹೆದ್ದಾರಿ ಮೇಲೆ ಶುಕ್ರವಾರ ರಾತ್ರಿ ನಡೆದಿದೆ.

ಕೇರಳ ಮೂಲದ ಸೂರಜ್‌ ಸಂಜಯ ಹೊನಮಾನೆ ಅವರು ಚಿನ್ನಾಭರಣ ವ್ಯಾ‍ಪಾರಕ್ಕೆ ಕೊಲ್ಹಾಪುರಕ್ಕೆ ತೆರಳಿದ್ದರು. ಗ್ರಾಹಕರಿಗೆ ಚಿನ್ನಾಭರಣ ಮಾರಾಟ ಮಾಡಿ ಬಂದ ₹75 ಲಕ್ಷ ನಗದು ಹಾಗೂ ಲ್ಯಾಪ್‌ಟಾಪ್‌ ಸಮೇತ ಕಾರಿನಲ್ಲಿ ಮರಳುತ್ತಿದ್ದರು.

ರಾಷ್ಟ್ರೀಯ ಹೆದ್ದಾರಿಯಲ್ಲೇ ಅವರನ್ನು ಅಡ್ಡಗಟ್ಟಿದ ದುಷ್ಕರ್ಮಿಗಳು ಹಣ ಹಾಗೂ ಲ್ಯಾಪ್‌ಟಾಪ್‌ ಕಿತ್ತುಕೊಂಡು ಪರಾರಿಯಾದರು ಎಂದು ವ್ಯಾಪಾರಿ ದೂರು ನೀಡಿದ್ದಾರೆ.

ಸಂಕೇಶ್ವರ ಪೊಲೀಸರು ತನಿಖೆ ಕೈಗೊಂಡಿದ್ದಾರೆ.