ಹುಟ್ಟಿನಿಂದ ಈವರೆಗೂ ನಾನು ಅಲೆಮಾರಿ: ನಟಿ ಉಮಾಶ್ರೀ

ಬೆಂಗಳೂರು: ‘ನನ್ನ ಜೀವನ ತೆರೆದ ಪುಸ್ತಕವಾಗಿದೆ. ಹುಟ್ಟಿನಿಂದ ಈವರೆಗೂ ನಾನೊಬ್ಬ ಅಲೆಮಾರಿಯಾಗಿದ್ದು, ಬದುಕಿನ ಹಾಗೂ ವೃತ್ತಿಯ ಪಯಣ ಒಂದೊಂದು ಕಡೆ ಸಾಗುತ್ತಿದೆ’ ಎಂದು ನಟಿ ಉಮಾಶ್ರೀ ಹೇಳಿದರು. 

ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ನಗರದಲ್ಲಿ ಶನಿವಾರ ಹಮ್ಮಿಕೊಂಡ ‘ಮನೆಯಂಗಳದಲ್ಲಿ ಮಾತುಕತೆ’ ಕಾರ್ಯಕ್ರಮದಲ್ಲಿ ತಿಂಗಳ ಅತಿಥಿಯಾಗಿ ಭಾಗವಹಿಸಿದ ಅವರು, ಮನದಾಳವನ್ನು ಹಂಚಿಕೊಂಡರು. ‘ಏನೂ ಅಲ್ಲದ ನಾನು, ಏನೆಲ್ಲ ಆಗಿಹೋದೆ. ಇದು ನನಗೆ ವಿಸ್ಮಯ. ಉಮಾದೇವಿ ಆಗಿದ್ದ ನಾನು, ರಂಗಭೂಮಿ ಪ್ರವೇಶಿಸಿದ ಬಳಿಕ ಉಮಾಶ್ರೀಯಾದೆ. ಇದು ಬದುಕಿಗೆ ತಿರುವು ನೀಡಿತು. ಮನೆ ಎಂಬುದು ಹೆಸರಿಗೆ ಮಾತ್ರವಿದ್ದು, ಅಲ್ಲಿ ಇದ್ದದ್ದು ಬಹಳ ಕಡಿಮೆ. ಬದುಕು ಕಟ್ಟಿಕೊಟ್ಟ ಕಲಾ ಜಗತ್ತೇ ನನ್ನ ಮನೆಯಾಗಿದೆ’ ಎಂದರು. 

‘ಆಕಸ್ಮಿಕ ಹಾಗೂ ಅನಿವಾರ್ಯದಿಂದ ನಟಿಯಾದೆ. ಈ ಹಿಂದೆ ಕೆಲವು ಬಾರಿ ಜೀವನವನ್ನು ಮುಗಿಸಬೇಕು ಎಂದೂ ಅನಿಸಿದ್ದಿದೆ. ಆಗಿನ ಸಂದರ್ಭ, ಪರಿಸ್ಥಿತಿಯೇ ಆ ರೀತಿಯ ಆಲೋಚನೆಗೆ ಕಾರಣ. 1980–81ರ ಅವಧಿಯಲ್ಲಿ ಕುಡಿತವನ್ನೂ ಕಲಿತೆ. ಅಂದುಕೊಂಡ ಜೀವನ ಸಿಗಲಿಲ್ಲ, ಮುಂದೆ ದಾರಿಯಿಲ್ಲ ಎಂದು ಕುಡಿತ ಪ್ರಾರಂಭಿಸಿದೆ. ಆ ಅವಧಿಯಲ್ಲಿ ಮಗಳು ಕೇಳಿದ ಪ್ರಶ್ನೆಗಳಿಂದಾಗಿ ಬದುಕನ್ನು ಜಯಸಿಬೇಕು ಅನಿಸಿ, ಕುಡಿತ ಬಿಟ್ಟೆ. ರಂಗಭೂಮಿಗೆ ಬರುವ ಮೊದಲು ಕೂಲಿ ಕೆಲಸ, ಕೋಡುಬಳೆ ಮಾರಾಟ ಸೇರಿ ವಿವಿಧ ಕೆಲಸಗಳನ್ನು ಮಾಡಿದ್ದೆ. ಜೀವನ ನಿರ್ವಹಣೆ ಕಷ್ಟಸಾಧ್ಯವಾದ ಸಂದರ್ಭದಲ್ಲಿ ರಂಗಭೂಮಿ ಕೈ ಹಿಡಿಯಿತು’ ಎಂದು ಸ್ಮರಿಸಿಕೊಂಡರು. 

ಅಭಿನಯ ಮತ್ತು ರಾಜಕೀಯದಲ್ಲಿ ಯಾವುದು ಇಷ್ಟ ಎಂಬ ಸಭಿಕರ ಪ್ರಶ್ನೆಗೆ ಉತ್ತರಿಸಿದ ಅವರು, ‘ಜನರಿಗಾಗಿ ನಟನೆ ಮಾಡಿ ಮನೋರಂಜನೆ ನೀಡಿದರೆ, ರಾಜಕೀಯದಲ್ಲಿ ಜನರಿಗಾಗಿ ಕೆಲಸ ಮಾಡುತ್ತಿದ್ದೇನೆ. ಹಾಗಾಗಿ, ಎರಡೂ ಕ್ಷೇತ್ರ ಇಷ್ಟ’ ಎಂದು ಹೇಳಿದರು. ಈ ನಡುವೆ ತಮ್ಮ ಜೀವನದ ಕೆಲ ಘಟನೆಗಳನ್ನು ವಿವರಿಸುವಾಗ ಅವರು ಭಾವುಕರಾದರು.

ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ನಿರ್ದೇಶಕಿ ಧರಣೀದೇವಿ ಮಾಲಗತ್ತಿ ಉಪಸ್ಥಿತರಿದ್ದರು.