ಹೆಚ್ಚು ಬಾಡಿಗೆ ನೀಡಲು ನಿರಾಕರಣೆ:ಅವಾಚ್ಯ ಶಬ್ಧಗಳಿಂದ ಯುವತಿಯನ್ನು ನಿಂದಿಸಿದ ಚಾಲಕ

ಬೆಂಗಳೂರು: ನಿಗದಿತ ದರಕ್ಕಿಂತ ಹೆಚ್ಚು ಬಾಡಿಗೆ ನೀಡಲು ನಿರಾಕರಿಸಿದ ಯುವತಿಗೆ ಆಟೊ ಚಾಲಕರೊಬ್ಬರು ಅವಾಚ್ಯ ಶಬ್ದಗಳಿಂದ ನಿಂದಿಸಿರುವ ಘಟನೆ ನಗರದಲ್ಲಿ ನಡೆದಿದೆ.

ಸಿಲ್ಕ್ ಬೋರ್ಡ್‌ಗೆ ತೆರಳಬೇಕಿದ್ದ ಯುವತಿ ಆಟೊ ಚಾಲಕನ ಬಳಿ, ‘ಬಾಡಿಗೆ ಎಷ್ಟು’ ಎಂದು ಕೇಳಿದ್ದಾರೆ. ಈ ವೇಳೆ ಚಾಲಕ ಹೆಚ್ಚು ಬಾಡಿಗೆ ಹೇಳಿದ್ದಾರೆ. ಆದರೆ, ₹ 150 ಕೊಡುವುದಾಗಿ ಯುವತಿ ಹೇಳಿದ್ದಾರೆ. ಸಿಟ್ಟಿಗೆದ್ದ ಚಾಲಕ ಅವಾಚ್ಯ ಶಬ್ದಗಳಿಂದ ನಿಂದಿಸಿರುವುದು ವಿಡಿಯೊದಲ್ಲಿ ಸೆರೆಯಾಗಿದೆ.

ಚಾಲಕನ ದುರ್ವರ್ತನೆಯ ವಿಡಿಯೊವನ್ನು ಸಾಮಾಜಿಕ ಜಾಲತಾಣ ‘ಎಕ್ಸ್’ನಲ್ಲಿ ಯುವತಿ ಪೋಸ್ಟ್‌ ಮಾಡಿದ್ದಾರೆ. ಚಾಲಕನ ವಿರುದ್ಧ ಸೂಕ್ತ ಕ್ರಮ ಕೈಗೊಳ್ಳುವಂತೆ ಆಗ್ರಹಿಸಿದ್ದಾರೆ. ಘಟನೆ ನಡೆದ ಸ್ಥಳ, ದಿನಾಂಕ ಸೇರಿದಂತೆ ಸೂಕ್ತ ವಿವರ ನೀಡುವಂತೆ ಪೊಲೀಸರು ಯುವತಿಗೆ ಸೂಚಿಸಿದ್ದಾರೆ.