ಕರ್ಕಶ ಹಾರ್ನ್‌: ಸವಾರರ ವಿರುದ್ಧ ಪ್ರಕರಣ

ಬೆಂಗಳೂರು: ನಗರದ ಸಂಚಾರ ಪೊಲೀಸ್‌ ಠಾಣಾ ವ್ಯಾಪ್ತಿಯಲ್ಲಿ ವಿಶೇಷ ಕಾರ್ಯಾಚರಣೆ ನಡೆಸಿದ ಪೊಲೀಸರು, ಕರ್ಕಶ ಹಾರ್ನ್‌, ದೋಷಪೂರಿತ ಸೈಲೆನ್ಸರ್‌, ನಂಬರ್‌ ಪ್ಲೇಟ್‌ ಮರೆಮಾಚುವಿಕೆ ಹಾಗೂ ದೋಷಪೂರಿತ ನಂಬರ್‌ ಪ್ಲೇಟ್ ಬಳಸುತ್ತಿದ್ದ 1,510 ಬೈಕ್‌ ಸವಾರರ ವಿರುದ್ಧ ಪ್ರಕರಣ ದಾಖಲಿಸಿಕೊಂಡಿದ್ದಾರೆ.

ಕರ್ಕಶ ಹಾರ್ನ್‌ ಬಳಕೆ ಮಾಡುತ್ತಿದ್ದ 483, ದೋಷಪೂರಿತ ಸೈಲೆನ್ಸರ್‌ ಅಳವಡಿಸಿಕೊಂಡಿದ್ದ 137 ಹಾಗೂ ದೋಷಪೂರಿತ ನಂಬರ್‌ ಪ್ಲೇಟ್‌ ಅಳವಡಿಕೆ ಹಾಗೂ ನಂಬರ್‌ ಪ್ಲೇಟ್ ಮರೆಮಾಚಿದ್ದ 890 ಮಂದಿ ವಿರುದ್ಧ ಪ್ರಕರಣ ದಾಖಲು ಮಾಡಿಕೊಳ್ಳಲಾಗಿದೆ ಎಂದು ಸಂಚಾರ ಪೊಲೀಸರು ತಿಳಿಸಿದರು.