ಮೆಟ್ರೊ ರೈಲಿನಲ್ಲಿ ಸೈಕಲ್ ಕೊಂಡೊಯ್ಯಲು ಅವಕಾಶ: ಬಿಎಂಆರ್‌ಸಿಎಲ್

ಬೆಂಗಳೂರು: ಮೆಟ್ರೊ ರೈಲಿನ ಕೊನೆಯ ಬೋಗಿಯಲ್ಲಿ, ಮಡಿಸಬಹುದಾದ ಸೈಕಲ್ ಕೊಂಡೊಯ್ಯಲು ಅವಕಾಶ ಇದೆ ಎಂದು ಬೆಂಗಳೂರು ಮೆಟ್ರೊ ರೈಲು ನಿಗಮ (ಬಿಎಂಆರ್‌ಸಿಎಲ್‌) ತಿಳಿಸಿದೆ.

‘15 ಕೆ.ಜಿ ತೂಕ ಮೀರದ ಸೈಕಲ್ ಕೊಂಡೊಯ್ಯಬಹುದು. ನಿಲ್ದಾಣ ಪ್ರವೇಶದ ಸಂದರ್ಭದಲ್ಲಿ ಬ್ಯಾಗೇಜ್‌ ಸ್ಕ್ಯಾನರ್ ಮೂಲಕ ಭದ್ರತಾ ತಪಾಸಣೆಗೆ ಒಳಪಡಿಸಬೇಕು. ಮೆಟ್ರೊ ಬೋಗಿಯ ಒಳಭಾಗದಲ್ಲಿ ಹಾನಿಯಾಗದಂತೆ, ಸಹ ಪ್ರಯಾಣಿಕರಿಗೆ ತೊಂದರೆ ಆಗದಂತೆ ನೋಡಿಕೊಂಡು ಪ್ಯಾಕ್ ಮಾಡಬೇಕು’ ಎಂದೂ ವಿವರಿಸಿದೆ. ಸೈಕಲ್ ಕೊಂಡೊಯ್ಯಲು ಯಾವುದೇ ಶುಲ್ಕ ಇಲ್ಲ ಎಂದು ಬಿಎಂಆರ್‌ಸಿಎಲ್ ತಿಳಿಸಿದೆ.