Electric Vehicle: ಉದ್ಯಾನ ನಗರಿಗೆ ‘ಇ.ವಿ ಚಾರ್ಜಿಂಗ್’ ಗರಿ

ಬೆಂಗಳೂರು: ಐಟಿ-ಬಿಟಿ ನಗರ, ನವೋದ್ಯಮಗಳ ರಾಜಧಾನಿ ಎಂದೆಲ್ಲ ಹಿರಿಮೆ-ಗರಿಮೆಗಳಿಂದ ಕರೆಸಿಕೊಳ್ಳುತ್ತಿರುವ ಉದ್ಯಾನ ನಗರಿ ಬೆಂಗಳೂರಿನ ಮುಕುಟಕ್ಕೆ 'ಇವಿ ಚಾರ್ಜಿಂಗ್ ಹಬ್' ಎಂಬ ಹೊಸ ಗರಿಯೊಂದು ಸೇರ್ಪಡೆಯಾಗಿದೆ.

ಕೇಂದ್ರ ಇಂಧನ ಸಚಿವಾಲಯದ ಬ್ಯೂರೊ ಆಫ್‌ ಎನರ್ಜಿ ಎಫಿಷಿಯನ್ಸಿ ಸಂಸ್ಥೆ ಇತ್ತೀಚೆಗೆ ಬಿಡುಗಡೆ ಮಾಡಿದ ವರದಿ ಪ್ರಕಾರ ಎಲೆಕ್ಟ್ರಿಕ್‌ ವಾಹನಗಳ(ಇವಿ) ಚಾರ್ಜಿಂಗ್‌ ಕೇಂದ್ರಗಳನ್ನು ಹೊಂದಿರುವ ನಗರಗಳಲ್ಲಿ ಬೆಂಗಳೂರು ಅಗ್ರ ಸ್ಥಾನದಲ್ಲಿದೆ. ರಾಜ್ಯದಲ್ಲಿ ಒಟ್ಟು 5,765 ಇವಿ ಚಾರ್ಜಿಂಗ್‌ ಕೇಂದ್ರಗಳಿದ್ದು, ಬೆಂಗಳೂರು ನಗರ ಜಿಲ್ಲೆಯಲ್ಲೇ 4,462 ಕೇಂದ್ರಗಳಿವೆ.

‘ಇವಿ’ ಕ್ಷೇತ್ರದಲ್ಲಿ ಸದಾ ಒಂದು ಹೆಜ್ಜೆ ಮುಂದಿರುವ ಕರ್ನಾಟಕ, 2017ರಲ್ಲಿ ‘ಇವಿ ನೀತಿ’ ಪರಿಚಯಿಸಿತು. 2021ರಲ್ಲಿ ಈ ನೀತಿಯನ್ನು ಪರಿಷ್ಕರಿಸಿತು. ಆನಂತರದಲ್ಲಿ ರಾಜ್ಯದಲ್ಲಿ ‘ಇವಿ’ ಬಳಕೆ ಹೆಚ್ಚಾಯಿತು. ಪೆಟ್ರೋಲ್ ಚಾಲಿತ ವಾಹನಗಳಿಂದ ‘ವಿದ್ಯುತ್‌ ಚಾಲಿತ ವಾಹನಗಳ ಬಳಕೆಯತ್ತ ಆಸಕ್ತಿ ತೋರುವವರು ಹೆಚ್ಚಾದರು. ಈಗೀಗಂತೂ ಸ್ವಿಗ್ಗಿ, ಝೊಮ್ಯಾಟೊ ಸೇರಿದಂತೆ ಆಹಾರ ಡೆಲಿವರಿ ಉದ್ಯೋಗಿಗಳು, ಕೊರಿಯರ್‌ ವಿತರಕರಂಥ ನಿತ್ಯ ದ್ವಿಚಕ್ರ ವಾಹನ ಬಳಸುವವರೆಲ್ಲ ‘ಇವಿ’ಗಳನ್ನೇ ಹೆಚ್ಚಾಗಿ ಬಳಸುತ್ತಿದ್ದಾರೆ.

ವಿದ್ಯುತ್‌ ಚಾಲಿತ ವಾಹನಗಳ ಬಳಕೆ ಹೆಚ್ಚಾದಂತೆ, ಚಾರ್ಜಿಂಗ್‌ ಕೇಂದ್ರಗಳ ಸಂಖ್ಯೆಯೂ ಹೆಚ್ಚಾಗಿದೆ. ಬೆಸ್ಕಾಂ, ನಗರದಲ್ಲಿರುವ ತನ್ನ ಕಚೇರಿಗಳು, ಬಿಬಿಎಂಪಿ, ಟಿಟಿಎಂಸಿ, ಬಿಡಿಎನಂತಹ ಸರ್ಕಾರಿ ಕಚೇರಿಗಳ ಆವರಣದಲ್ಲಿ ಚಾರ್ಜಿಂಗ್ ಕೇಂದ್ರಗಳನ್ನು ಆರಂಭಿಸಿದೆ. ಹಲವು ಖಾಸಗಿ ಕಂಪನಿಗಳು ತಮ್ಮ ಕಂಪನಿಯ ವಾಹನಗಳ ಚಾರ್ಜಿಂಗ್‌ ಮಾಡಿಕೊಳ್ಳಲು ನಗರದ ಪ್ರಮುಖ ಸ್ಥಳಗಳಲ್ಲಿ ಕೇಂದ್ರಗಳನ್ನು ಸ್ಥಾಪಿಸಿದೆ. ಅಪಾರ್ಟ್‌ಮೆಂಟ್ ಸಮುಚ್ಛಯಗಳಲ್ಲೂ ಪ್ರತ್ಯೇಕ ಚಾರ್ಜಿಂಗ್ ಕೇಂದ್ರಗಳನ್ನು ಆರಂಭಿಸಲಾಗಿದೆ.

‘ಐದಾರು ವರ್ಷಗಳ ಹಿಂದೆ ಎಲೆಕ್ಟ್ರಿಕ್ ಸ್ಕೂಟರ್ ಖರೀದಿಸಿದಾಗ, ಬೆಂಗಳೂರಿನಲ್ಲಿ ಚಾರ್ಜಿಂಗ್ ಕೇಂದ್ರಗಳು ಕಡಿಮೆ ಇದ್ದವು. ಈಗ ಎಲ್ಲೆಡೆ ಕೇಂದ್ರಗಳು ಲಭ್ಯವಿವೆ. ನಾನು ಮನೆಯಿಂದ ಚಾರ್ಜ್ ಮಾಡಿಕೊಂಡು ಹೊರಡುತ್ತೇನೆ. ಅಗತ್ಯವಿದ್ದರೆ ಚಾರ್ಜಿಂಗ್‌ ಕೇಂದ್ರಗಳಿಗೆ ಹೋಗಿ ಚಾರ್ಜ್ ಮಾಡಿಕೊಳ್ಳುತ್ತೇನೆ’ ಎನ್ನುತ್ತಾರೆ ವಿಜಯನಗರದ ಖಾಸಗಿ ಕಂಪನಿ ಉದ್ಯೋಗಿ ರಘು.

ಇತ್ತೀಚೆಗೆ ಇವಿ ಆಟೊ ಹಾಗೂ ಲಗೇಜ್‌ ಆಟೊಗಳು ನಗರದಲ್ಲಿ ಗಣನೀಯವಾಗಿ ಹೆಚ್ಚಾಗುತ್ತಿವೆ. ಸರಕು ಸಾಗಣೆಯ ಪುಟ್ಟ ಪುಟ್ಟ ಇವಿಗಳ ಬಳಕೆ ನಗರದಲ್ಲಿ ಹೆಚ್ಚಾಗಿವೆ.

ಇವಿ ಚಾರ್ಜಿಂಗ್‌ ಕೇಂದ್ರಗಳ ಅರಂಭಕ್ಕೆ ಇಂಧನ ಇಲಾಖೆ ಉತ್ತೇಜನ ನೀಡುತ್ತಿದೆ. ಇತ್ತೀಚೆಗೆ ಖಾಸಗಿ ಕಂಪನಿಗಳ ಸಮೂಹವೊಂದು ‘ಜೌಲ್‌’ ಎಂಬ ಯೋಜನೆಯಡಿ ನಗರದ ದೊಡ್ಡಕಲ್ಲಸಂದ್ರದಲ್ಲಿ ಮೊದಲ ಇವಿ ಚಾರ್ಜಿಂಗ್ ಕೇಂದ್ರ ಸ್ಥಾಪಿಸಿತು. ಇದೇ ರೀತಿ, ಬೆಸ್ಕಾಂ ಕೂಡ, ಸಾರ್ವಜನಿಕರ ಬಳಕೆಗಾಗಿ ದೇವನಹಳ್ಳಿ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದ ಬಳಿ ಸೌರಶಕ್ತಿ ಆಧಾರಿತ ಇವಿ ಚಾರ್ಜಿಂಗ್ ಹಬ್‌ವೊಂದನ್ನು ನಿರ್ಮಿಸುತ್ತಿದೆ. 400 ಕಿ.ವಾಟ್‌ ಸಾಮರ್ಥ್ಯದ ಈ ಕೇಂದ್ರದಲ್ಲಿ ಏಕಕಾಲಕ್ಕೆ 23 ವಾಹನಗಳನ್ನು ಚಾರ್ಜ್ ಮಾಡಬಹುದು. ಇದರಲ್ಲಿ 30 ನಿಮಿಷದ ಒಳಗೆ ಚಾರ್ಜ್ ಮಾಡಬಲ್ಲ 20 ಫಾಸ್ಟ್ ಚಾರ್ಜಿಂಗ್ ಪಾಯಿಂಟ್‌ಗಳಿರುತ್ತವೆ. 50 ಕಿ.ವಾ ಮತ್ತು 30 ಕಿ.ವಾ ಸಾಮರ್ಥ್ಯದ ವೇಗದ ಚಾರ್ಜಿಂಗ್ ಪಾಯಿಂಟ್‌ಗಳಿರುತ್ತವೆ. ಖಾಸಗಿ ಕಂಪನಿ ಸಹಯೋಗದಲ್ಲಿ ಈ ಇವಿ ಹಬ್ ನಿರ್ಮಾಣವಾಗುತ್ತಿದೆ.

ಬಳಸಿದ ಬ್ಯಾಟರಿಗಳನ್ನು ಚಾರ್ಜ್‌ ಮಾಡಿ ಮರುಬಳಕೆ ಮಾಡಲಾಗುತ್ತದೆ. ಇದು ಈ ಕೇಂದ್ರದ ವಿಶೇಷ. ಈ ಪ್ರಯತ್ನ ದೇಶದಲ್ಲೇ ಮೊದಲು ಎನ್ನುತ್ತಾರೆ ಬೆಸ್ಕಾಂ ಅಧಿಕಾರಿಗಳು. ಮಾತ್ರವಲ್ಲ, 24 ಗಂಟೆಗಳು ಇವಿ ಚಾರ್ಜಿಂಗ್‌ ಸೌಲಭ್ಯ ನೀಡುವ ದೇಶದ ಮೊದಲ ಚಾರ್ಜಿಂಗ್‌ ಸ್ಟೇಷನ್‌ ಕೂಡ ಇದಾಗಿದೆ. ಮುಂದಿನ ತಿಂಗಳಲ್ಲಿ ಇದು ಕಾರ್ಯಾರಂಭ ಮಾಡುವ ಸಾಧ್ಯತೆ ಇದೆ.

ಬೆಸ್ಕಾಂ: ಭವಿಷ್ಯದ ಯೋಜನೆಗಳು

ಬೆಸ್ಕಾಂ, ಇವಿ ಚಾರ್ಜಿಂಗ್‌ನಂತಹ ಮೂಲಸೌಕರ್ಯ ಕಲ್ಪಿಸುವ ನೋಡಲ್‌ ಏಜೆನ್ಸಿಯಾಗಿದ್ದು, ಭವಿಷ್ಯದಲ್ಲಿ ಹೊಸ ಯೋಜನೆಗಳ ಅನುಷ್ಠಾನಕ್ಕೆ ಸಿದ್ಧತೆ ನಡೆಸಿದೆ.

• ನಗರದಾದ್ಯಂತ ಇಂದಿರಾ ಕ್ಯಾಂಟೀನ್‌, ಬಿಬಿಎಂಪಿ, ಬಿಡಿಎ, ಆಟೊ ನಿಲ್ದಾಣಗಳು, ಶಿಕ್ಷಣ ಸಂಸ್ಥೆಗಳ ಆವರಣದಲ್ಲಿ ‘ಇವಿ ಚಾರ್ಜಿಂಗ್ ಕೇಂದ್ರ’ಗಳನ್ನು ಸ್ಥಾಪಿಸಲು ವಿಸ್ತೃತ ಯೋಜನಾ ವರದಿ(ಡಿಪಿಆರ್‌) ಸಿದ್ಧವಾಗಿದೆ.

• ಬೆಂಗಳೂರು ನಗರದ ಸುತ್ತಮುತ್ತ ಪಿಪಿಪಿ ಮಾದರಿಯಲ್ಲಿ ಬೆಸ್ಕಾಂ ಮಾಲೀಕತ್ವದ 20 ಸ್ಥಳಗಳಲ್ಲಿ ಬ್ಯಾಟರಿ ಸ್ವಾಪಿಂಗ್ ಸ್ಟೇಷನ್ (2W ಮತ್ತು 3W) ಸ್ಥಾಪನೆಗಾಗಿ ಟೆಂಡರ್ ಆಹ್ವಾನ. ಸ್ವಾಪಿಂಗ್ ಎಂದರೆ, ಬಳಸಿದ ಬ್ಯಾಟರಿಯನ್ನು ಕೇಂದ್ರದಲ್ಲಿ ಇಟ್ಟು, ಕೇಂದ್ರದಲ್ಲಿ ಚಾರ್ಜಿಂಗ್ ಆದ ಬ್ಯಾಟರಿಯನ್ನು ತೆಗೆದುಕೊಂಡು ವಾಹನಕ್ಕೆ ಜೋಡಿಸಿಕೊಳ್ಳುವುದು. ಇದು ದ್ವಿಚಕ್ರ ವಾಹನಗಳಿಗೆ ಮಾತ್ರ. ಇದರಿಂದ ಇವಿ ಬಳಸುವ ಸ್ವಿಗ್ಗಿ, ಝೊಮ್ಯಾಟೊ, ಕೊರಿಯರ್‌, ಪಾರ್ಸಲ್‌ ವಿತರಕರಿಗೆ ಅನುಕೂಲವಾಗುತ್ತದೆ.

• ರಾಜ್ಯದಾದ್ಯಂತ 11 ಆರ್‌ಟಿಒ ಕಚೇರಿಗಳ ಆವರಣದಲ್ಲಿ ಇವಿ ಚಾರ್ಜಿಂಗ್ ಸ್ಟೇಷನ್ ಸ್ಥಾಪಿಸಲು ಸಿದ್ದತೆ ನಡೆದಿದೆ. ಇನ್ನೆರಡು ತಿಂಗಳಲ್ಲಿ ಈ ಯೋಜನೆ ಕಾರ್ಯಾರಂಭವಾಗಲಿದೆ.

• ರಾಷ್ಟ್ರೀಯ ಹೆದ್ದಾರಿ 48ರಲ್ಲಿರುವ ಪ್ರತಿ ಟೋಲ್‌ ಗೇಟ್‌ನ ಎರಡೂ ಕಡೆ ಚಾರ್ಜಿಂಗ್‌ ಕೇಂದ್ರಗಳನ್ನು ಸ್ಥಾಪಿಸಲು ಸಮೀಕ್ಷೆ ನಡೆಸಿ, ಎನ್‌ಎಚ್‌ಎಐಗೆ ವರದಿ ಸಲ್ಲಿಸಲಾಗಿದೆ. ಅನುಮೋದನೆ ನಿರೀಕ್ಷೆಯಲ್ಲಿದೆ.

• ಕೆಆರ್‌ಡಿಸಿಎಲ್‌ ಮನವಿ ಮೇರೆಗೆ, ರಾಜ್ಯದ ಎಲ್ಲ ರಾಜ್ಯ ಹೆದ್ದಾರಿಗಳಲ್ಲಿ ಇವಿ ಚಾರ್ಜಿಂಗ್ ಕೇಂದ್ರಗಳನ್ನು ಅಳವಡಿಸಲು, ಜಂಟಿಯಾಗಿ ಅಧ್ಯಯನ ಮಾಡಲಾಗಿದೆ. 32 ಟೋಲ್‌ ಗೇಟ್‌ಗಳ ಬಳಿ ಚಾರ್ಜಿಂಗ್‌ ಕೇಂದ್ರಗಳ ಸ್ಥಾಪನೆಗೆ ಸೂಕ್ತವಾಗಿದ್ದು, ಈ ಕುರಿತು ಪ್ರಸ್ತಾವ ಸಲ್ಲಿಸಲಾಗಿದೆ.

• ಸಾರ್ವಜನಿಕ – ಖಾಸಗಿ– ಸಹಭಾಗಿತ್ವದಲ್ಲಿ (ಪಿಪಿಪಿ) ರಾಜ್ಯದಾದ್ಯಂತ 1910 ಚಾರ್ಜಿಂಗ್ ಕೇಂದ್ರಗಳನ್ನು ಸ್ಥಾಪಿಸಿ 2620 ಚಾರ್ಜರ್‌ ಅಳವಡಿಸುವ ಯೋಜನೆಯ ಅನುಮೋದನೆಗಾಗಿ ಜುಲೈನಲ್ಲಿ ಇಂಧನ ಇಲಾಖೆಗೆ ಪ್ರಸ್ತಾವ ಸಲ್ಲಿಕೆ.