ಬೆಂಜ್ ಕಾರು ಅಪಘಾತ: ಸಾಕ್ಷ್ಯ ಸಂಗ್ರಹ

ಬೆಂಗಳೂರು: ಬೆಂಜ್ ಕಾರು ಡಿಕ್ಕಿ ಹೊಡೆದು ಕೆಂಗೇರಿಯ ಸಮೀಪ ಟೆಕಿ ಸಂಧ್ಯಾ ಮೃತಪಟ್ಟ ಪ್ರಕರಣಕ್ಕೆ ಸಂಬಂಧಿಸಿದಂತೆ ಆರೋಪಿ ಧನುಷ್ ಮದ್ಯ ಖರೀದಿಸಿರುವುದು ಸೇರಿದಂತೆ ಹಲವು ಸಾಕ್ಷ್ಯಗಳನ್ನು ಕೆಂಗೇರಿ ಸಂಚಾರ ಠಾಣೆ ಪೊಲೀಸರು ಕಲೆ ಹಾಕುತ್ತಿದ್ದಾರೆ.

ಧನುಷ್‌ ಮದ್ಯ ಸೇವಿಸಿ ಕಾರು ಚಾಲನೆ ಮಾಡಿರುವುದು ಪೊಲೀಸರ ತನಿಖೆ ವೇಳೆ ಗೊತ್ತಾಗಿದ್ದು, ಆರೋಪಿಯನ್ನು ಬಂಧಿಸಿ ನ್ಯಾಯಾಂಗಕ್ಕೆ ಒಪ್ಪಿಸಲಾಗಿದೆ.

‘ನಾಯಂಡಹಳ್ಳಿ ಬಳಿ ಆರೋಪಿ ಮದ್ಯ ಖರೀದಿಸಿರುವ ದೃಶ್ಯ ಸಿಸಿಟಿವಿ ಕ್ಯಾಮೆರಾದಲ್ಲಿ ಸೆರೆಯಾಗಿದೆ. ಅಪಘಾತ ಸ್ಥಳದ ರಸ್ತೆಯ ಹಂಪ್​​ನಲ್ಲೂ ಕಾರನ್ನು ವೇಗವಾಗಿ ಚಾಲನೆ ಮಾಡಿದ್ದರು. ಅಪಘಾತ ನಡೆದ ಸ್ಥಳದಲ್ಲಿದ್ದ ಆಟೊ ಚಾಲಕರ ಹೇಳಿಕೆಯನ್ನು ಪಡೆಯಲಾಗಿದೆ. ಮದ್ಯ ಖರೀದಿಸಲು ಆರೋಪಿ ಬಂದಿದ್ದನ್ನು ಮದ್ಯದಂಗಡಿಯ ಇಬ್ಬರು ವ್ಯಕ್ತಿಗಳು ಗುರುತಿಸಿದ್ದಾರೆ’ ಎಂದು ಪೊಲೀಸ್ ಮೂಲಗಳು ತಿಳಿಸಿವೆ.

‘ಆರೋಪಿಯ ರಕ್ತದ ಮಾದರಿಯ ಪರೀಕ್ಷಾ ವರದಿ ಇನ್ನು ಬಂದಿಲ್ಲ’ ಎಂದು ಹೇಳಿವೆ.