ಹೊಸ ಕ್ರಿಮಿನಲ್‌ ಕಾಯ್ದೆ: ರಾಜ್ಯ ಸರ್ಕಾರದ ಆಕ್ಷೇಪಕ್ಕೆ ವಿರೋಧ

ಬೆಂಗಳೂರು: ಹೊಸ ಕ್ರಿಮಿನಲ್‌ ಕಾಯ್ದೆಗಳಿಗೆ ಸಂಬಂಧಿಸಿದಂತೆ ರಾಜ್ಯ ಸರ್ಕಾರ ನೇಮಕ ಮಾಡಿರುವ ತಜ್ಞರ ಸಮಿತಿಯು ಅತ್ಯಾಚಾರ ವಿರುದ್ಧದ ಸೆಕ್ಷನ್‌ಗಳಿಗೆ ಎತ್ತಿರುವ ಆಕ್ಷೇಪಗಳಿಗೆ ಭಾರತೀಯ ಮಹಿಳಾ ಒಕ್ಕೂಟದ ರಾಜ್ಯ ಸಮಿತಿ ವಿರೋಧ ವ್ಯಕ್ತಪಡಿಸಿದೆ.

‘ಅತ್ಯಾಚಾರ ಮತ್ತು ಲೈಂಗಿಕ ದೌರ್ಜನ್ಯಕ್ಕೆ ಸಂಬಂಧಿಸಿದ ಸೆಕ್ಷನ್‌ಗಳನ್ನು ಲಿಂಗತ್ವ ತಟಸ್ಥ ಮಾಡಬೇಕು ಎಂದು ಸಮಿತಿ ಪ್ರಸ್ತಾಪಿಸಿರುವುದನ್ನು ಕೂಡಲೇ ಹಿಂಪಡೆಯಬೇಕು. ಪುರುಷ ಪ್ರಧಾನ ಸಮಾಜದಲ್ಲಿ ಸ್ತ್ರೀದ್ವೇಷ ಆಳವಾಗಿ ಬೇರೂರಿವಾಗ ಲಿಂಗತ್ವ ತಟಸ್ಥ ಮಾಡಬೇಕು ಎಂದು ಹೇಳುವುದು ಮಹಿಳಾ ಸಮುದಾಯಕ್ಕೆ ಮತ್ತು ಸಾಂವಿಧಾನಿಕ ಮೌಲ್ಯಗಳಿಗೆ ಅಪಚಾರ ಮಾಡಿದಂತಾಗುತ್ತದೆ’ ಎಂದು ಸಮಿತಿಯ ಅಧ್ಯಕ್ಷೆ ಜ್ಯೋತಿ ಎ., ಕಾರ್ಯದರ್ಶಿ ರೇಣುಕಾ ಕೆ. ತಿಳಿಸಿದ್ದಾರೆ.