ಸೈಬರ್ ಅಪರಾಧ ಹೆಚ್ಚಳ: ಹ್ಯಾಕಿಂಗ್ ಮಟ್ಟಹಾಕಲು ತಂಡ
* ಆಯ್ದ ಪೊಲೀಸರಿಗೆ ಸಿಐಡಿ ಸಿಸಿಐಟಿಆರ್ ತರಬೇತಿ * ತನಿಖೆಗೆ ಮಾರ್ಗದರ್ಶನ
ಬೆಂಗಳೂರು: ಕಂಪ್ಯೂಟರ್, ಮೊಬೈಲ್ ಹಾಗೂ ಇತರೆ ತಾಂತ್ರಿಕ ವ್ಯವಸ್ಥೆಗಳನ್ನು ಹ್ಯಾಕ್ ಮಾಡಿ ದತ್ತಾಂಶ ದುರುಪಯೋಗಪಡಿಸಿಕೊಳ್ಳುವ ಹ್ಯಾಕರ್‌ಗಳ ಕೃತ್ಯವನ್ನು ಮಟ್ಟಹಾಕಲು ಪೊಲೀಸ್ ಇಲಾಖೆಯ ‘ಸಿಎಚ್‌ಎಫ್‌ಐ (ಕಂಪ್ಯೂಟರ್ ಹ್ಯಾಕಿಂಗ್ ಮತ್ತು ಫೊರೆನ್ಸಿಕ್ ಇನ್ವೆಸ್ಟಿಗೇಟರ್)’ ಪರಿಣತರ ತಂಡ ಕಾರ್ಯಾಚರಣೆಗೆ ಇಳಿದಿದೆ.
ಸೈಬರ್ ಅಪರಾಧಗಳ ಸಂಖ್ಯೆ ಇತ್ತೀಚಿನ ದಿನಗಳಲ್ಲಿ ಹೆಚ್ಚಾಗಿದ್ದು, ಹ್ಯಾಕಿಂಗ್ ಪ್ರಕರಣಗಳೂ ದುಪ್ಪಟ್ಟಾಗುತ್ತಿವೆ. ಆಸ್ಪತ್ರೆಗಳು, ಉದ್ದಿಮೆಗಳು, ಶಾಲೆ– ಕಾಲೇಜು ಸೇರಿದಂತೆ ವಿವಿಧ ಕ್ಷೇತ್ರಗಳ ಸಂಸ್ಥೆಗಳಿಗೆ ಹ್ಯಾಕರ್‌ಗಳ ಉಪಟಳ ಹೆಚ್ಚಾಗಿದೆ. ಇಂಥ ಹ್ಯಾಕಿಂಗ್ ಪ್ರಕರಣಗಳನ್ನು ಭೇದಿಸುವ ಉದ್ದೇಶದಿಂದ ನುರಿತ ಪೊಲೀಸರನ್ನು ಒಳಗೊಂಡ ಸಿಎಚ್‌ಎಫ್‌ಐ ತಂಡ ರಚಿಸಲಾಗಿದೆ.
ಪೊಲೀಸ್ ಇಲಾಖೆಯ ವಿವಿಧ ವಿಭಾಗಗಳಲ್ಲಿ ಕರ್ತವ್ಯ ನಿರ್ವಹಿಸುತ್ತಿರುವ ಆಯ್ದ ಐಪಿಎಸ್, ಡಿವೈಎಸ್‌ಪಿ/ಎಸಿಪಿ, ಇನ್‌ಸ್ಪೆಕ್ಟರ್‌ ಹಾಗೂ ಪಿಎಸ್‌ಐಗಳು ತಂಡದಲ್ಲಿದ್ದಾರೆ.
‘ತಂತ್ರಜ್ಞಾನ ಆಧರಿಸಿ ಸೇವೆ ಒದಗಿಸುವ ಸಂಸ್ಥೆಗಳನ್ನು ಗುರಿಯಾಗಿಸಿಕೊಂಡು ಹ್ಯಾಕರ್‌ಗಳು ಕೃತ್ಯ ಎಸಗುತ್ತಿದ್ದಾರೆ. ದತ್ತಾಂಶಗಳನ್ನು ಕದ್ದು ಹಣ ದೋಚುತ್ತಿದ್ದಾರೆ. ಕೆಲ ಹ್ಯಾಕರ್‌ಗಳು, ದತ್ತಾಂಶ ಕದ್ದು ಮಾರಾಟ ಮಾಡುತ್ತಿದ್ದಾರೆ. ಇಂಥ ಪ್ರಕರಣಗಳಲ್ಲಿ ತನಿಖಾಧಿಕಾರಿ ಹಾಗೂ ತನಿಖಾ ತಂಡದಲ್ಲಿರುವ ಪೊಲೀಸರಿಗೆ ಸಿಎಚ್‌ಎಫ್‌ಐ ಪರಿಣತರು ಮಾರ್ಗದರ್ಶನ ಮಾಡಲಿದ್ದಾರೆ’ ಎಂದು ಪೊಲೀಸ್ ಅಧಿಕಾರಿಯೊಬ್ಬರು ತಿಳಿಸಿದರು.
‘ಕೆಲ ಆಸ್ಪತ್ರೆ ಸರ್ವರ್‌ಗಳನ್ನು ಹ್ಯಾಕ್ ಮಾಡಿ, ರೋಗಿಗಳ ಮಾಹಿತಿ ಕದ್ದು ಹಣ ದೋಚಿರುವ ಬಗ್ಗೆ ಈ ಹಿಂದೆ ಪ್ರಕರಣಗಳು ದಾಖಲಾಗಿದ್ದವು. ಇಂಥ ಹಲವು ಪ್ರಕರಣಗಳಲ್ಲಿ ಹ್ಯಾಕರ್ ಪತ್ತೆ ಕಷ್ಟವಾಗಿದೆ’ ಎಂದರು.
ಹ್ಯಾಕರ್ ಕೃತ್ಯಗಳನ್ನು ಬಯಲಿಗೆಳೆಯಲು ಆಯ್ದ ಪೊಲೀಸರಿಗೆ ತರಬೇತಿ ನೀಡಲಾಗಿದೆ. ಮುಂದಿನ ದಿನಗಳಲ್ಲಿ ಮತ್ತಷ್ಟು ಪೊಲೀಸರಿಗೆ ತರಬೇತಿ ನೀಡುವ ಉದ್ದೇಶವಿದೆಎಂ.ಎ. ಸಲೀಂ ಸಿಐಡಿ ಡಿಜಿಪಿ
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.