ಸಾಲಹಟ್ಟಿ: ₹5 ಲಕ್ಷದ ಚರಂಡಿ ಕಾಮಗಾರಿ

ದಾಬಸ್ ಪೇಟೆ: ನೆಲಮಂಗಲ ತಾಲ್ಲೂಕು ನರಸೀಪುರ ಪಂಚಾಯಿತಿ ಸಾಲಹಟ್ಟಿ ಗ್ರಾಮದಲ್ಲಿ ನರೇಗಾ ಯೋಜನೆಯಡಿ ₹5 ಲಕ್ಷ ವೆಚ್ಚದಲ್ಲಿ ಚರಂಡಿ ಕಾಮಗಾರಿ ಪೂರ್ಣಗೊಂಡಿದ್ದು ಗ್ರಾಮಸ್ಥರು ಹರ್ಷ ವ್ಯಕ್ತಪಡಿಸಿದ್ದಾರೆ.

ಗ್ರಾಮದ ಮೂರು ಕಡೆ 182 ಮೀಟರ್‌ನಷ್ಟು ಉದ್ದದ ಚರಂಡಿ ನಿರ್ಮಾಣ ಮಾಡಲಾಗಿದೆ. ಅದರಲ್ಲಿ 2 ಕಡೆ ಚರಂಡಿ ಮೇಲೆ 5 ಮೀಟರ್‌ ಗಳ ಕಾಂಕ್ರೀಟ್ ಹಾಸು ಮತ್ತು 2 ಕಡೆ ಚರಂಡಿ ಮೇಲೆ 3 ಮೀಟರ್‌ಗಳ ಕಾಂಕ್ರೀಟ್ ಹಾಸು ಹಾಕಲಾಗಿದೆ.

‘ಮಳೆಗಾಲದಲ್ಲಿ ನೀರು ಸರಾಗವಾಗಿ ಹರಿಯದೆ, ಮನೆಗಳ ಮುಂದೆಯೇ ನಿಲ್ಲುತ್ತಿತ್ತು. ಇದರಿಂದ ಜನ, ದನಕರು ಕುರಿಗಳ ಸಂಚಾರಕ್ಕೆ ತೊಂದರೆಯಾಗಿತ್ತು. ಸೊಳ್ಳೆಗಳು ಉತ್ಪತ್ತಿಯಾಗುತ್ತಿದ್ದವು. ಚರಂಡಿ ನಿರ್ಮಾಣ ಮಾಡಿರುವುದರಿಂದ ನೀರೆಲ್ಲಾ ಹರಿದು ಹೋಗುತ್ತದೆ’ ಎನ್ನುತ್ತಾರೆ ಯುವಕ ಸಿದ್ದಗಂಗಯ್ಯ.

‘ರೈತಾಪಿ ವರ್ಗ, ಕುರಿಗಾಹಿಗಳೇ ಇರುವ ನಮ್ಮ ಊರಿನಲ್ಲಿ ರಸ್ತೆ, ಚರಂಡಿಯಂತಹ ಮೂಲಸೌಲಭ್ಯಗಳು ಹಲವು ವರ್ಷಗಳಿಂದ ಕಾಡುತ್ತಿದ್ದವು. ಇತ್ತೀಚಿನ ದಿನಗಳಲ್ಲಿ ಪಂಚಾಯಿತಿ ಹಾಗೂ ಸರ್ಕಾರದ ವಿವಿಧ ಯೋಜನೆಗಳಲ್ಲಿ ಒಂದಷ್ಟು ಅಭಿವೃದ್ಧಿ ಕೆಲಸಗಳು ಆಗುತ್ತಿವೆ’ ಎಂದರು ಗ್ರಾಮಸ್ಥ ಸಣ್ಣಮುದ್ದಯ್ಯ.

‘ವಿಧಾನ ಪರಿಷತ್ ಸದಸ್ಯರ ಅನುದಾನದಲ್ಲಿ ₹4.5 ಲಕ್ಷ ವೆಚ್ಚದಲ್ಲಿ ಸಮುದಾಯ ಭವನ ನಿರ್ಮಾಣ ಮಾಡಲಾಗಿದೆ. ದೇವರಾಜ ಅರಸು ಅಲ್ಪಸಂಖ್ಯಾತರ ಅಭಿವೃದ್ಧಿ ನಿಗಮದಿಂದ ₹25 ಲಕ್ಷ ವೆಚ್ಚದಲ್ಲಿ ಕಾಂಕ್ರೀಟ್ ರಸ್ತೆ ನಿರ್ಮಾಣ ಮಾಡಲಾಗಿದೆ’ ಎಂದು ಪಂಚಾಯಿತಿ ಸದಸ್ಯೆ ತರನಂಬಾನು ತಿಳಿಸಿದರು.