ಯಕೃತ್ತು ದಾನ ಮಾಡಿದ ಪತ್ನಿ

ಬೆಂಗಳೂರು: ಗಂಭೀರ ಸ್ವರೂಪದ ಯಕೃತ್ತು ಸಮಸ್ಯೆ ಎದುರಿಸುತ್ತಿದ್ದ 45 ವರ್ಷದ ಪತಿಗೆ ಪತ್ನಿ ಯಕೃತ್ತು ದಾನ ಮಾಡಿದ್ದು, ಬನ್ನೇರುಘಟ್ಟ ರಸ್ತೆಯಲ್ಲಿರುವ ಫೋರ್ಟಿಸ್ ಅಸ್ಪತ್ರೆಯ ವೈದ್ಯರು ಯಶಸ್ವಿಯಾಗಿ ಕಸಿ ಮಾಡಿದ್ದಾರೆ.

ಕೆಲ ದಿನಗಳ ಹಿಂದೆ ವ್ಯಕ್ತಿಯು ಜಾಂಡೀಸ್‌ರೋಗಕ್ಕೆ ಉಡುಪಿಯ ಫೋರ್ಟಿಸ್ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆದು, ಮನೆಗೆ ತೆರಳಿದ್ದರು. ಬಳಿಕ ಮತ್ತೆ ಅನಾರೋಗ್ಯ ಸಮಸ್ಯೆ ಕಾಣಿಸಿಕೊಂಡು, ಜ್ಞಾಪಕ ಶಕ್ತಿ ಕಳೆದುಕೊಂಡಿದ್ದರು. ಹೆಚ್ಚಿನ ಚಿಕಿತ್ಸೆಗೆ ಅವರನ್ನು ಬೆಂಗಳೂರಿನ ಫೋರ್ಟಿಸ್ ಆಸ್ಪತ್ರೆಗೆ ಶಿಫಾರಸು ಮಾಡಲಾಗಿತ್ತು.

ಡಾ. ಮಹೇಶ್ ಗೋಪಸೆಟ್ಟಿ ನೇತೃತ್ವದ ವೈದ್ಯರ ತಂಡ ವ್ಯಕ್ತಿಯನ್ನು ತಪಾಸಣೆ ಮಾಡಿ, ಅವರ ಯಕೃತ್ತಿಗೆ ಹಾನಿಯಾಗಿರುವುದನ್ನು ಪತ್ತೆ ಮಾಡಿತು. ಕೂಡಲೇಕಸಿ ಮಾಡಬೇಕೆಂದು ಸೂಚಿಸಿತು. ದಾನಿಗಳು ಸಿಗದ ಕಾರಣ ಪತ್ನಿಯೇ ಯಕೃತ್ತನ್ನು ದಾನ ಮಾಡಿದರು. ಈಗ ವ್ಯಕ್ತಿ ಚೇತರಿಸಿಕೊಂಡಿದ್ದಾರೆ. ‘ಅದೃಷ್ಟವಶಾತ್ ವ್ಯಕ್ತಿಯ ಪತ್ನಿಯ ಯಕೃತ್ತು ಹೊಂದಾಣಿಕೆಯಾಯಿತು. ಇಲ್ಲವಾದಲ್ಲಿ ವ್ಯಕ್ತಿಯ ಜೀವಕ್ಕೆ ಅಪಾಯವಾಗುವ ಸಾಧ್ಯತೆಯಿತ್ತು. ಕೋವಿಡ್‌ ಸಂದರ್ಭದಲ್ಲಿ ಕಸಿ ಮಾಡುವುದು ಸವಾಲಾಗಿತ್ತು’ ಎಂದು ಡಾ. ಮಹೇಶ್ ಗೋಪಸೆಟ್ಟಿ ತಿಳಿಸಿದ್ದಾರೆ.