ಚಿಕ್ಕಬಾಣಾವರ ಕೆರೆ ಕಲುಷಿತ

ಹೆಸರಘಟ್ಟ: ಕೊಳೆಯುತ್ತಿರುವ ಸಸ್ಯಗಳು, ಚೀಲದಲ್ಲಿ ತುಂಬಿ ಬಿಸಾಕಿದ ಕುರಿ–ಕೋಳಿ ಮಾಂಸ, ಹರಿದು ಬರುತ್ತಿರುವ ಚರಂಡಿ ನೀರು... ಇದೆಲ್ಲದರಿಂದ ಚಿಕ್ಕಬಾಣಾವರ ಕೆರೆ ಕಲುಷಿತಗೊಂಡಿದ್ದು, ದುರ್ವಾಸನೆ ಬೀರುತ್ತಿದೆ.

‘ವರ್ಷದಿಂದ ವರ್ಷಕ್ಕೆ ಕೆರೆ ಹೆಚ್ಚು ಕಲುಷಿತಗೊಳ್ಳುತ್ತಿದೆ. ಚರಂಡಿ ನೀರು ಕೆರೆಗೆ ಸೇರುತ್ತಿದ್ದು, ಜಲಚರಗಳ ಪ್ರಾಣಕ್ಕೆ ಕುತ್ತು ಬಂದಿದೆ. ಕೆರೆಯನ್ನು ಆಭಿವೃದ್ದಿ ಪಡಿಸಲು ಯಾವ ಜನಪ್ರತಿನಿಧಿಗಳು, ಅಧಿಕಾರಿಗಳು ಮುಂದೆ ಬಂದಿಲ್ಲ’ ಎಂದು ಗ್ರಾಮದ ನಿವಾಸಿ ಕೃಷ್ಣಪ್ಪ ಬೇಸರ ವ್ಯಕ್ತಪಡಿಸಿದರು.

‘ಕೆರೆಯ ಅಸುಪಾಸಿನಲ್ಲಿ ಸುಮಾರು ಎರಡು ನೂರು ಮನೆಗಳಿವೆ. ಈ ಮನೆಗಳಲ್ಲಿ ವಾಸಿಸುವವರು ಕೆರೆಯಿಂದ ಬರುವ ವಾಸನೆಯನ್ನು ಸಹಿಸಿಕೊಂಡು ಬದುಕಬೇಕಾಗಿದೆ. ದುರ್ವಾಸನೆಯಿಂದ ಆರೋಗ್ಯದಲ್ಲಿ ಏರು–ಪೇರು ಉಂಟಾಗುತ್ತಿದೆ’ ಎಂದರು.

‘ದಾಸರಹಳ್ಳಿಯ ಈ ಹಿಂದಿನ ಶಾಸಕರು ಮತ್ತು ಈಗಿನ ಶಾಸಕರು ಕೂಡ ಕೆರೆ ಅಭಿವೃದ್ಧಿ ಕಡೆಗೆ ಗಮನ ಕೊಡುತ್ತಿಲ್ಲ. ನಮ್ಮೂರಿನ ಕೆರೆ ಯಾವಾಗ ಮೊದಲಿನಂತೆ ಆಗುತ್ತದೆಯೋ ನೋಡಬೇಕು’ ಎಂದು ನಿವಾಸಿ ಮಂಜುಳಾ ಹೇಳಿದರು.

ಕೆರೆ ನಿರ್ವಹಣೆಗೆ ಸಂಬಂಧಿಸಿದಂತೆ ಅಧಿಕಾರಿಗಳು ಯಾವುದೇ ಪ್ರತಿಕ್ರಿಯೆ ನೀಡಲಿಲ್ಲ.