ವಿಡಿಯೊ ಕರೆಯಲ್ಲಿದ್ದ ಪತ್ನಿಯ ಮುಖ ತೋರಿಸದಿದ್ದಕ್ಕೆ ಪತಿಗೆ ಇರಿದ ಸಹೋದ್ಯೋಗಿ

ಬೆಂಗಳೂರು: ವಿಡಿಯೊ ಕರೆ ಮಾಡಿದ್ದ ವೇಳೆ ಪತ್ನಿಯ ಮುಖ ತೋರಿಸಲಿಲ್ಲವೆಂಬ ಕಾರಣಕ್ಕೆ ಪತಿಗೆ ಕತ್ತರಿಯಿಂದ ಇರಿಯಲಾಗಿದ್ದು, ಈ ಸಂಬಂಧ ಆರೋಪಿ ಸುರೇಶ್ ಎಂಬುವವರನ್ನು ಎಚ್ಎಚ್‌ಆರ್‌ ಲೇಔಟ್ ಠಾಣೆ ಪೊಲೀಸರು ಬಂಧಿಸಿದ್ದಾರೆ.

‘ಆರೋಪಿ ಸುರೇಶ್, ಬಟ್ಟೆ ಅಂಗಡಿಯೊಂದರಲ್ಲಿ ಕೆಲಸ ಮಾಡುತ್ತಿದ್ದ. ಅದೇ ಅಂಗಡಿಯಲ್ಲಿ ಕೆಲಸಕ್ಕಿದ್ದ ರಾಜೇಶ್ ಎಂಬುವವರ ಹೊಟ್ಟೆಗೆ ಕತ್ತರಿಯಿಂದ ಇರಿದಿದ್ದ. ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆದಿದ್ದ ರಾಜೇಶ್ ಕೃತ್ಯದ ಬಗ್ಗೆ ದೂರು ನೀಡಿದ್ದರು’ ಎಂದು ಪೊಲೀಸರು ಹೇಳಿದರು.

‘ರಾಜೇಶ್ ಅವರು ಜ. 29ರಂದು ತಮ್ಮ ಪತ್ನಿಯ ಮೊಬೈಲ್‌ಗೆ ವಿಡಿಯೊ ಕರೆ ಮಾಡಿ ಮಾತನಾಡುತ್ತಿದ್ದರು. ಅದನ್ನು ನೋಡಿದ್ದ ಆರೋಪಿ ಸುರೇಶ್, ರಾಜೇಶ್ ಬಳಿ ತೆರಳಿದ್ದ. ‘ನಿನ್ನ ಪತ್ನಿಯನ್ನು ನೋಡುತ್ತೇನೆ. ಮುಖ ತೋರಿಸು’ ಎಂದಿದ್ದ. ಕೋಪಗೊಂಡ ರಾಜೇಶ್, ಆರೋಪಿಗೆ ಬೈದಿದ್ದರು. ಇಬ್ಬರ ನಡುವೆ ಮಾತಿನ ಚಕಮಕಿ ಉಂಟಾಗಿ, ಪರಸ್ಪರ ಕೈ ಕೈ ಮಿಲಾಯಿಸಿದ್ದರು. ಸಿಟ್ಟಾಗಿದ್ದ ಸುರೇಶ್, ಬಟ್ಟೆ ಕತ್ತರಿಸುವ ಕತ್ತರಿಯಿಂದ ರಾಜೇಶ್ ಅವರ ಹೊಟ್ಟೆಯ ಎಡಭಾಗಕ್ಕೆ ಚುಚ್ಚಿದ್ದ’ ಎಂದರು.