ಬೆಂಗಳೂರು: ಯುವತಿ ಮೃತದೇಹ ಪತ್ತೆ, ಕೊಲೆ ಶಂಕೆ

ಬೆಂಗಳೂರು: ಮಹದೇವಪುರ ಠಾಣೆ ವ್ಯಾಪ್ತಿಯಲ್ಲಿ ಮಹಾನಂದಾ (21) ಅವರ ಮೃತದೇಹ ಶುಕ್ರವಾರ ಬೆಳಿಗ್ಗೆ ಪತ್ತೆಯಾಗಿದ್ದು, ಕೊಲೆ ಶಂಕೆ ವ್ಯಕ್ತವಾಗಿದೆ.

‘ಕಲಬುರಗಿಯ ಮಹಾನಂದಾ, ಕೆಲಸ ಹುಡುಕಿಕೊಂಡು ಸಹೋದರಿ ಜೊತೆ ನಗರಕ್ಕೆ ಬಂದಿದ್ದರು. ಪೆಟ್ರೋಲ್‌ ಬಂಕ್‌ವೊಂದರಲ್ಲಿ ಕೆಲಸ ಮಾಡುತ್ತಿದ್ದರು. ಆ.10ರಂದು ನಾಪತ್ತೆಯಾಗಿದ್ದರು. ಇವರ ಶವ ಮನೆ ಬಳಿ ಪತ್ತೆಯಾಗಿದೆ. ಶವದ ಕತ್ತಿನ ಭಾಗದಲ್ಲಿ ಗಾಯ ಗುರುತು ಇದೆ. ಕೊಲೆ ಶಂಕೆ ಇದ್ದು, ತನಿಖೆ ಮುಂದುವರಿಸಲಾಗಿದೆ’ ಎಂದು ಪೊಲೀಸ್ ಮೂಲಗಳು ತಿಳಿಸಿವೆ.

ಠಾಣೆಗೆ ದೂರು ನೀಡಿದ್ದ ಸಹೋದರಿ: ‘ಮಹಾನಂದಾ ಅವರು ಗುರುವಾರ ಕೆಲಸಕ್ಕೆ ಹೋಗಿರಲಿಲ್ಲ. ಮನೆಯಲ್ಲೇ ಉಳಿದುಕೊಂಡಿದ್ದರು. ಸಂಜೆ ಹೊರಗಡೆ ಹೋಗಿದ್ದರು. ರಾತ್ರಿಯಾದರೂ ಮನೆಗೆ ವಾಪಸು ಬಂದಿರಲಿಲ್ಲ’ ಎಂದು ಪೊಲೀಸ್ ಮೂಲಗಳು ಹೇಳಿವೆ.

‘ಗಾಬರಿಗೊಂಡಿದ್ದ ಸಹೋದರಿ, ಮಹಾನಂದಾ ಅವರಿಗಾಗಿ ಹುಡುಕಾಟ ನಡೆಸಿದ್ದರು. ಆದರೆ, ಸುಳಿವು ಸಿಕ್ಕಿರಲಿಲ್ಲ. ಬಳಿಕವೇ ಠಾಣೆಗೆ ಬಂದು, ನಾಪತ್ತೆ ಬಗ್ಗೆ ದೂರು ನೀಡಿದ್ದರು’ ಎಂದು ತಿಳಿಸಿವೆ.