ಮೀನು ಹಿಡಿಯಲು ಹೋಗಿ ಕಾರ್ಮಿಕ ಸಾವು

ಹುಮನಾಬಾದ್: ಕಾರಂಜ ಜಲಾಶಯದ ಹಿನ್ನೀರಿನಲ್ಲಿ ಮೀನು ಹಿಡಿಯಲು ಹೋಗಿ ಕಾರ್ಮಿಕನೊಬ್ಬ ಮೃತಪಟ್ಟ ಘಟನೆ ಗುರುವಾರ ಮಧ್ಯಾಹ್ನ ನಡೆದಿದೆ.

ಪಟ್ಟಣದ ವೀರಭದ್ರೇಶ್ವರ ಕಾಲೋನಿಯ ನಿವಾಸಿ ವಿಲಾಸ್ (40) ನೀರಿನಲ್ಲಿ ಮುಳುಗಿ ಮೃತಪಟ್ಟ ಕಾರ್ಮಿಕ.

ಮೃತ ವಿಲಾಸ್ ಸೇರಿದಂತೆ ಇನ್ನೂ ಇಬ್ಬರು ತಾಲ್ಲೂಕಿನ ನಿಂಬೂರ್ ಗ್ರಾಮದ ಹೊರವಲಯದ ಕಾರಂಜ ಜಲಾಶಯದ ಹಿನ್ನೀರಿನಲ್ಲಿ ಮೀನು ಹಿಡಿಯಲು ಹೋಗಿದ್ದರು. ನೀರಿನ ಆಳ ಗಮನಿಸದೇ ಮೀನು ಹಿಡಿಯುತ್ತ ಮುಂದೆ ಹೋಗಿದ್ದು ಮುಳುಗಿ ಮೃತಪಟ್ಟಿದ್ದಾನೆ ಎಂದು ಹೇಳಲಾಗುತ್ತಿದೆ.

ಈ ಘಟನೆಯ‌ ವಿಷಯ ತಿಳಿದು ಚಿಟಗುಪ್ಪ ಅಗ್ನಿಶಾಮಕ ದಳದ ಸಿಬ್ಬಂದಿಗಳು ಸ್ಥಳಕ್ಕೆ ಭೇಟಿ ನೀಡಿ ಶವವನ್ನು ಹೊರತೆಗೆದಿದ್ದಾರೆ. ಹಳಿಖೇಡ್ ಬಿ.ಪೊಲೀಸ್ ಠಾಣೆಯ ಪೊಲೀಸರು ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದರು.