ಕಮಲನಗರ: ನರೇಗಾ ಅನುದಾನ ಬಳಸಿ ಸುಸಜ್ಜಿತ ಚಿತಾಗಾರಗಳ ನಿರ್ಮಾಣ

ಕಮಲನಗರ: ಪಟ್ಟಣದಲ್ಲಿ ಜನಸಂಖ್ಯೆ ಹೆಚ್ಚಾದಂತೆ ವ್ಯಾಪ್ತಿಯೂ ಹೆಚ್ಚಾಗುತ್ತಲೇ ಇದೆ. ಬಹಳ ದಿನಗಳಿಂದ ಚಿತಾಗಾರ ಇರದಿದ್ದರಿಂದ ರೇಲ್ವೆ ವಿಭಾಗದ ಸ್ಥಳದಲ್ಲಿ ಶವಗಳಿಗೆ ಅಗ್ನಿ ನೀಡಿ ಸಂಸ್ಕಾರ ಮಾಡುವ ಪರಿಸ್ಥಿತಿ ಇತ್ತು. ಮಳೆಗಾಲದಲ್ಲಿ ಶವಗಳು ಸಂಪೂರ್ಣವಾಗಿ ಸುಡುತ್ತಿರಲಿಲ್ಲ. ಮತ್ತೆ ಮರುದಿನ ಬಂದು ಬೆಂಕಿ ಹಚ್ಚುವ ಪರಿಸ್ಥಿತಿ ಇತ್ತು. ಸದ್ಯ ಸುಸಜ್ಜಿತ ಚಿತಾಗಾರ ನಿರ್ಮಾಣ ಮಾಡಲಾಗಿದೆ.

‘ತಾಲ್ಲೂಕಿನಲ್ಲಿ ಬೇಳಕುಣಿ(ಭೊ)-1, ಚಿಮೇಗಾಂವ-1, ಭವಾನಿ ಬೀಜಲಗಾಂವ-1, ಹಂದಿಕೇರಾ-1, ದಾಬಕಾ-1, ಡಿಗ್ಗಿ-1, ಡೋಣಗಾಂವ-(ಎಂ)-1, ಕಮಲನಗರ-1, ಬಾಲೂರ-1, ಖೇಡ್-‌1, ಸಂಗಮ-2, ಮುಧೋಳ-1, ತೋರಣಾ-1, ಮುಧೋಳ(ಕ)-1, ಸೋನಾಳ 1 ಸೇರಿ ಒಟ್ಟು 16 ಚಿತಾಗಾರಗಳು ಇವೆ. ಮುಂದಿನ ದಿನಗಳಲ್ಲಿ ಉಳಿದ ಗ್ರಾಮಗಳಲ್ಲೂ ಚಿತಾಗಾರ ಮಾಡಿಸುತ್ತೇವೆ’ ಎಂದು ತಾ.ಪಂ ಸಹಾಯಕ ನಿರ್ದೇಶಕ ಹಣಮಂತರಾಯ ಕೌಟಗೆ ತಿಳಿಸಿದರು.

‘ಚಿತಾಗಾರ ನಿರ್ಮಾಣ ಸಾರ್ವಜನಿಕರ ಬಹುದಿನಗಳ ಬೇಡಿಕೆಯಾಗಿತ್ತು. ಹೀಗಾಗಿ ನರೇಗಾ ಯೋಜನೆ ಬಳಸಿಕೊಂಡು ಸುಸಜ್ಜಿತವಾದ ಚಿತಾಗಾರವನ್ನು ನಿರ್ಮಿಸಲಾಗಿದೆ’ ಎಂದು ಕಮಲನಗರ ಪಿಡಿಒ ರಾಜಕುಮಾರ ತಂಬಾಕೆ ತಿಳಿಸಿದ್ದಾರೆ.

ಪಿಲ್ಲರ್‌ ನಿರ್ಮಿಸಿ ಚಿತಾಗಾರ ಕಟ್ಟಲಾಗಿದೆ. ಒಳಗಡೆ ಬೆಡ್ ಹಾಕಿ ಮೇಲೆ ತಗಡು ಅಳವಡಿಸಿದ್ದು ಹೊಗೆ ಹೋಗಲು ಸ್ಥಳ ಬಿಡಲಾಗಿದೆ. ಚಿತಾಗಾರದ ಸುತ್ತ ತಂತಿಯ ಬೇಲಿ ಹಾಕಲಾಗಿದೆ. ಶವ ಸಂಸ್ಕಾರಕ್ಕೆ ಬಂದ ಜನರಿಗೆ ಕುಳಿತುಕೊಳ್ಳಲು ಆಸನಗಳನ್ನೂ ಅಳವಡಿಸಲಾಗಿದೆ. 

ಖಾಲಿ ಸ್ಥಳದಲ್ಲಿ ಪಂಚಾಯಿತಿ ವತಿಯಿಂದ ಸಸಿಗಳನ್ನು ಹಚ್ಚಲಾಗಿದೆ. ಒಂದು ಚಿತಾಗಾರ ನಿರ್ಮಾಣಕ್ಕೆ ₹4.48 ಲಕ್ಷ ಖರ್ಚಾಗಿದೆ. ಇನ್ನೂ ಕುಡಿಯುವ ನೀರಿಗಾಗಿ ಕೊಳವೆಬಾವಿ ಹಾಕಿಸಿ ಬಂದವರಿಗೆ ಕಾಲು ತೊಳೆದುಕೊಳ್ಳಲು ನೀರಿನ ತೊಟ್ಟಿ ನಿರ್ಮಿಸುವ ವಿಚಾರವಿದೆ ಎಂದು ಪಿಡಿಒ ರಾಜಕುಮಾರ ತಂಬಾಕೆ ತಿಳಿಸಿದ್ದಾರೆ.

ಶವ ಸಂಸ್ಕಾರಕ್ಕೆ ಸುಸಜ್ಜಿತವಾದ ಚಿತಾಗಾರ ನಿರ್ಮಾಣವಾಗಿದೆ. ಆದರೆ ಸಮರ್ಪಕ ರಸ್ತೆ ಇಲ್ಲ. ಶವಾಗಾರಕ್ಕೆ ಆದಷ್ಟು ಬೇಗ ರಸ್ತೆ ಮಾಡಿಸಿದರೆ ಸೂಕ್ತ ಎನ್ನುತ್ತಾರೆ ಕಮಲನಗರದ ಜನ.