ಹುಲಸೂರ | ವಿದ್ಯುತ್ ಮಾರ್ಗ ನಿರ್ವಹಣೆಗೆ ಜೆಸ್ಕಾಂ ನಿರ್ಲಕ್ಷ್ಯ: ಸಾರ್ವಜನಿಕರ ಆರೋಪ

ಹುಲಸೂರ: ಒಂದೆಡೆ ಬಾಗಿದ ವಿದ್ಯುತ್‌ ಕಂಬಗಳು, ಜಮೀನುಗಳಲ್ಲಿ ಕೈಗೆಟುಕುವಷ್ಟು ಜೋತು ಬಿದ್ದ ತಂತಿಗಳು, ಬಳ್ಳಿ ಆವರಿಸಿದ ವಿದ್ಯುತ್‌ ಕಂಬ– ಪರಿವರ್ತಕಗಳು, ಅಪಾಯ ಆಹ್ವಾನಿಸುವ ಫೀಡರ್‌ ಪಿಲ್ಲರ್‌ ಡಬ್ಬಗಳು, ಮರ–ಗಿಡಗಳ ಟೊಂಗೆಗಳನ್ನು ಮುತ್ತಿಕ್ಕುವ ವಿದ್ಯುತ್‌ ತಂತಿಗಳು...

ಮತ್ತೊಂದೆಡೆ ಅನಿಯಮಿತ ವಿದ್ಯುತ್ ಕಡಿತ, ವಿದ್ಯುತ್‌ ಪರಿವರ್ತಕಗಳ ದುರಸ್ತಿಗೆ ನಿರ್ಲಕ್ಷ್ಯ, ವಾಲಿದ ಕಂಬಗಳ ಸರಿಪಡಿಸಲು ಮೀನಮೇಷ, ಗ್ರಾಮೀಣ ಭಾಗದ ಸಮಸ್ಯೆ ಪರಿಹಾರಕ್ಕೆ ಸಿಗದ ಆದ್ಯತೆ, ವಿದ್ಯುತ್‌ ಪೂರೈಕೆ ಮಾರ್ಗಗಳ ನಿರ್ವಹಣೆ ನಿರ್ಲಕ್ಷ್ಯ...

ಹೀಗೆ ಜೆಸ್ಕಾಂ ವಿರುದ್ಧದ ಸಾರ್ವಜನಿಕರ ದೂರುಗಳ ಪಟ್ಟಿ ಬೆಳೆಯುತ್ತಲೇ ಹೋಗುತ್ತದೆ. ಸರಣಿ ಪ್ರತಿಭಟನೆಗಳು, ಜನರಿಂದ ದೂರುಗಳು ದಾಖಲಾದರೂ, ಸಮಸ್ಯೆಗೆ ಪರಿಹಾರ ಸಿಕ್ಕಿಲ್ಲ ಎಂಬ ಆರೋಪಗಳಿವೆ.

ಉತ್ತಮ ಮಳೆಯಿಂದಾಗಿ ವಿದ್ಯುತ್‌ ಕೊರತೆ ಇಲ್ಲದಿದ್ದರೂ, ವಿತರಣೆ ಜಾಲದಲ್ಲಿ ಲೋಪವಿದೆ. ಅದರ ಫಲವಾಗಿ ಗ್ರಾಮೀಣ ಜನ ತೊಂದರೆ ಅನುಭವಿಸುತ್ತಿದ್ದಾರೆ. ವಿದ್ಯುತ್ ಕಂಬಗಳು, ಪರಿವರ್ತಕಗಳು ಹಾಗೂ ತಂತಿಗಳ ನಿರ್ವಹಣೆಯಲ್ಲಿ ತಾಲ್ಲೂಕಿನಲ್ಲಿ ಜೆಸ್ಕಾಂ ಇಲಾಖೆಯ ನಿರ್ಲಕ್ಷ್ಯ ಎದ್ದು ಕಾಣುತ್ತಿದೆ. ಬಲಿ ಪಡೆಯಲು ಕಾದಿರುವ ಮೃತ್ಯು ತಾಣಗಳಾಗಿ ಈ ಸ್ಥಳಗಳು ಕಾಣುತ್ತವೆ. ಆದರೆ ಜೆಸ್ಕಾಂ ಅಧಿಕಾರಿಗಳು ಮಾತ್ರ ತಮಗೂ ಇದಕ್ಕೂ ಸಂಬಂಧವೇ ಇಲ್ಲ ಎನ್ನುವಂತೆ ಜಾಣ ಕುರುಡತನ ಪ್ರದರ್ಶಿಸುತ್ತಿದ್ದಾರೆ.

‘ಮಳೆಗಾಲದಲ್ಲಿ ವಿದ್ಯುತ್ ಅಪಾಯ ತುಸು ಹೆಚ್ಚು. ಮಳೆ ಬಂದಾಗ ಮರದ ರೆಂಬೆ–ಕೊಂಬೆಗಳು ತಂತಿಗಳಿಗೆ ತಾಕಿ ಬೆಂಕಿ ಕಾಣಿಸುವುದು ಸಾಮಾನ್ಯ. ಈ ಬಗ್ಗೆ ತಿಳಿದಿದ್ದರೂ ಜೆಸ್ಕಾಂ ನಿರ್ಲಕ್ಷ್ಯವಹಿಸಿದೆ. ಅವಘಡ ಸಂಭವಿಸಿದ ನಂತರ ಸ್ಥಳಕ್ಕೆ ದೌಡಾಯಿಸುವ ಅಧಿಕಾರಿಗಳು, ಅವಘಡ ನಡೆಯುವ ಮುನ್ನವೇ ಎಚ್ಚರಿಕೆಯ ಕ್ರಮಗಳನ್ನು ಕೈಗೊಂಡರೆ ಅನಾಹುತ ತಡೆಯಬಹುದು’ ಎಂಬುದು ಸಾರ್ವಜನಿಕರ ಅಭಿಪ್ರಾಯ.

ಅಸಮರ್ಪಕ ನಿರ್ವಹಣೆ:

ಪಟ್ಟಣ ಸೇರಿದಂತೆ ಬೇಲೂರ, ಹುಲಸೂರ, ಮೀರಖಲ, ಗೋರಟಾ, ಗಡಿಗೌಡಗಾಂವ್, ಮುಚಳಂಬ, ತೊಗಲುರ ಗ್ರಾಮ ಪಂಚಾಯಿತಿಗಳ ಉಪವಿಭಾಗಮಟ್ಟದ ಬಹುತೇಕ ರೈತರ ಜಮೀನು, ರಸ್ತೆ, ಬೀದಿಗಳಲ್ಲಿ ಅಸಮರ್ಪಕ ನಿರ್ವಹಣೆಯಿಂದಾಗಿ ವಿದ್ಯುತ್ ಕಂಬಗಳು ಬಾಗಿವೆ. ಅವಘಡಕ್ಕೆ ಆಹ್ವಾನ ನೀಡುತ್ತಿವೆ. ಕೆಲವೆಡೆ ಬೆಳೆಗಳು ಸುಟ್ಟ ಉದಾಹರಣೆಯೂ ಇವೆ. ದುರಸ್ತಿಪಡಿಸುವಂತೆ ತಿಳಿಸಿದರೂ ಕ್ರಮವಾಗದೆ ಅವಘಡಗಳು ಸಂಭವಿಸಿವೆ ಎನ್ನುತ್ತಾರೆ ಸಾರ್ವಜನಿಕರು.

‘ಕೆಲವೆಡೆ ಟಿಸಿ ಸುಟ್ಟರೂ ಜೆಸ್ಕಾಂನಿಂದ ತಕ್ಷಣ ಸ್ಪಂದನೆ ಸಿಗುತ್ತಿಲ್ಲ. ಕಚೇರಿಗೆ ಮನವಿ ಸಲ್ಲಿಸಿದರೂ ಪರಿಶೀಲಿಸಲ್ಲ. ಟಿಸಿಗಳ ಅವಾಂತರದಿಂದ ಬೆಂಕಿ ತಗುಲಿ ಬೆಳೆಗಳು ನಾಶವಾದ ಮತ್ತು ರೈತರು ನಷ್ಟ ಅನುಭವಿಸಿದ ಉದಾಹರಣೆಗಳಿಗೆ ಲೆಕ್ಕವಿಲ್ಲ’ ಎಂಬುದು ರೈತ ಸಂಘಟನೆ ಮುಖಂಡ ದೇವೇಂದ್ರ ಹಲಿಂಗೇ ದೂರು.

‘ಪಟ್ಟಣದ ಸರ್ವೆ ನಂಬರ್ 398ರ ಹೊಲ– ಗದ್ದೆಗಳಲ್ಲಿ ಹಲವೆಡೆ ವಿದ್ಯುತ್ ಕಂಬಗಳು ವಾಲಿವೆ. ತಂತಿಗಳು ಜೋತು ಬಿದ್ದಿದ್ದು, ರೈತರ ಆತಂಕಕ್ಕೆ ಕಾರಣವಾಗಿ ಅಪಾಯ ಆಹ್ವಾನಿಸುತ್ತಿವೆ. ಅವುಗಳನ್ನು ತಕ್ಷಣ ಸರಿಪಡಿಸಬೇಕು’ ಎಂದು ರೈತರಾದ ಶಿವಾಜಿ ನಾರಾಯಣ ಗಿರಿ, ವೈಜಿನಾಥ ಸ್ವಾಮಿ ಆಗ್ರಹಿಸಿದರು.

ಅಸಮರ್ಪಕ ಜಂಗಲ್‌ ಕಟಿಂಗ್‌:

ಪಟ್ಟಣ ಸೇರಿ ಗ್ರಾಮೀಣ ಭಾಗದಲ್ಲಿ ಬಹುತೇಕ ವಿದ್ಯುತ್‌ ಮಾರ್ಗ ಹೊಲಗಳು ಹಾಗೂ ಅರಣ್ಯ ಪ್ರದೇಶದಲ್ಲಿದೆ. ಜಂಗಲ್‌ ಕಟಿಂಗ್ ಸಮರ್ಪಕವಾಗಿ ನಡೆಯದ ಕಾರಣ ಗುಣಮಟ್ಟದ ವಿದ್ಯುತ್ ಪೂರೈಕೆ ಸವಾಲಾಗಿದೆ.

‘ಗ್ರಾಮೀಣ ಭಾಗದಲ್ಲಿ ವಿದ್ಯುತ್ ತಂತಿಗೆ ಧಕ್ಕೆಯಾದರೆ ಎರಡ್ಮೂರು ದಿನ ವಿದ್ಯುತ್ ಕಡಿತವಾಗುತ್ತದೆ. ಮಳೆಗಾಲದಲ್ಲಿ ಈ ಸಮಸ್ಯೆ ಹೆಚ್ಚು. ಎಲ್ಲಿ ಸಮಸ್ಯೆಯಾಗಿದೆ ಎಂಬುದನ್ನು ಹುಡುಕುವುದರಲ್ಲೇ ದಿನಗಳು ಕಳೆಯುತ್ತವೆ. ಹೀಗಾಗಿ ಜಂಗಲ್ ಕಟಿಂಗ್ ಕಾರ್ಯ ಮಾಡುವಾಗಲೇ ವ್ಯವಸ್ಥಿತವಾಗಿ ಮಾಡಬೇಕು. ಇಲ್ಲವಾದರೆ ನಿರಂತರ ವಿದ್ಯುತ್ ಪೂರೈಕೆ ಕನಸಿನ ಮಾತು’ ಎಂಬುದು ಗ್ರಾಮೀಣ ಭಾಗದ ಜನರ ಅಂಬೋಣ.