ತೋಟಗಾರಿಕೆ ಕಾಲೇಜುಗಳ ಯುವಜನೋತ್ಸವ; ಮೆರವಣಿಗೆಯಲ್ಲಿ ಕುಣಿದು ಕುಪ್ಪಳಿಸಿದ ಯುವಜನರು

ಬೀದರ್: ಬಾಗಲಕೋಟೆ ತೋಟಗಾರಿಕೆ ವಿಜ್ಞಾನಗಳ ವಿಶ್ವವಿದ್ಯಾಲಯದ 15ನೇ ಅಂತರ ತೋಟಗಾರಿಕೆ ಕಾಲೇಜುಗಳ ಯುವಜನೋತ್ಸವ ಕಲಾಬಿದರಿ ಸಂಗಮ-2024ರ ಅಂಗವಾಗಿ ನಗರದಲ್ಲಿ ಗುರುವಾರ ಬೆಳಿಗ್ಗೆ ಮೆರವಣಿಗೆ ನಡೆಯಿತು.

ರಾಜ್ಯದ ಕೋಲಾರ, ಬೆಂಗಳೂರು, ಮೈಸೂರು, ಬೀದರ್, ಬಾಗಲಕೋಟೆ, ದೇವಿಹೊಸೂರ ಸೇರಿದಂತೆ ಒಂಬತ್ತು ಕಾಲೇಜುಗಳ ವಿದ್ಯಾರ್ಥಿಗಳು ಮೆರವಣಿಗೆಯಲ್ಲಿ ಹೆಜ್ಜೆ ಹಾಕಿದರು.

ಬಸವಣ್ಣ, ಅಕ್ಕಮಹಾದೇವಿ, ಸಂತ ಶಿಶುನಾಳ ಷರೀಫ್, ಕನಕದಾಸರ ವೇಷಧಾರಿಗಳು ಗಮನ ಸೆಳೆದರು. ಕಾಂತಾರ ಸಿನಿಮಾದ ಪೋಷಾಕು ನೋಡಿ ಜನ ಖುಷಿಪಟ್ಟರು. ಮೆರವಣಿಗೆಯುದ್ಸಕ್ಕೂ ವಿದ್ಯಾರ್ಥಿಗಳು ಕುಣಿದು ಕುಪ್ಪಳಿಸಿದರು.

ನಗರದ ಡಾ.ಬಿ.ಆರ್. ಅಂಬೇಡ್ಕರ್ ವೃತ್ತದಿಂದ ಪ್ರಮುಖ ಮಾರ್ಗಗಳ ಮೂಲಕ ಚನ್ನಬಸವ ಪಟ್ಟದ್ದೇವರು ಜಿಲ್ಲಾ ರಂಗಮಂದಿರದ ವರೆಗೆ ಮೆರವಣಿಗೆ ನಡೆಯಿತು.ವಿವಿಧ ಕಾಲೇಜಿನ ಡೀನ್ ಗಳು, ಪ್ರಾಧ್ಯಾಪಕರು, ಸಿಬ್ಬಂದಿ ಪಾಲ್ಗೊಂಡಿದ್ದರು.