ಬೀದರ್: 12 ಗ್ರಾಮ ಪಂಚಾಯಿತಿಗಳಲ್ಲಿ ಶ್ರಮದಾನ

ಬೀದರ್: ಸ್ವಚ್ಛತೆಯೇ ಸೇವೆ ಅಭಿಯಾನದ ಅಂಗವಾಗಿ ಶಾಹೀನ್ ಶಿಕ್ಷಣ ಸಂಸ್ಥೆಗಳ ಸಮೂಹ ಹಾಗೂ ಜಿಲ್ಲಾ ಪಂಚಾಯಿತಿ ಸಹಯೋಗದಲ್ಲಿ ಬೀದರ್ ತಾಲ್ಲೂಕಿನ 12 ಗ್ರಾಮ ಪಂಚಾಯಿತಿಗಳ ವ್ಯಾಪ್ತಿಯಲ್ಲಿ ಸೋಮವಾರ ಶ್ರಮದಾನ ಅಭಿಯಾನ ನಡೆಯಿತು.

ಒಂದು ಬಸ್‍ನಲ್ಲಿ 50 ಮಂದಿಯಂತೆ ಶಾಹೀನ್ ವಿದ್ಯಾರ್ಥಿಗಳು 12 ಬಸ್‍ಗಳಲ್ಲಿ ಅಲಿಯಾಬಾದ್, ಅಮಲಾಪುರ, ಆಣದೂರ, ಅಷ್ಟೂರ, ಕಮಠಾಣ, ಚಿಟ್ಟಾ, ಗಾದಗಿ, ಮಲ್ಕಾಪುರ, ಕೊಳಾರ(ಕೆ), ಜನವಾಡ, ಕಾಡವಾದ ಯದಲಾಪುರಕ್ಕೆ ತೆರಳಿ ಸ್ವಚ್ಛತಾ ಕಾರ್ಯ ಕೈಗೊಂಡರು.

ನಗರದ ಶಹಾಪುರ ಗೇಟ್ ಸಮೀಪದ ಶಾಹೀನ್ ಪದವಿಪೂರ್ವ ವಿಜ್ಞಾನ ಕಾಲೇಜು ಆವರಣದಲ್ಲಿ ಶ್ರಮದಾನ ಅಭಿಯಾನಕ್ಕೆ ಜಿಲ್ಲಾ ಪಂಚಾಯಿತಿ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ ಡಾ. ಗಿರೀಶ್ ಬದೋಲೆ ಚಾಲನೆ ನೀಡಿದರು.

ತಾಲ್ಲೂಕು ಪಂಚಾಯಿತಿ ಕಾರ್ಯನಿರ್ವಹಣಾಧಿಕಾರಿ ಕಿರಣ ಪಾಟೀಲ, ಸ್ವಚ್ಛ ಭಾರತ ಮಿಷನ್ ವಿಶೇಷ ನೋಡಲ್ ಅಧಿಕಾರಿ ಗೌತಮ ಅರಳಿ, ಪ್ರಾಚಾರ್ಯ ಖಾಜಾ ಪಟೇಲ್, ಜಗನ್ನಾಥ ಮೂರ್ತಿ, ಶಿವಕುಮಾರ ಯಲಾಲ್, ಪಂಡಿತ ವಾಡೇಕರ್ ಹಾಜರಿದ್ದರು.