ಕಮಲನಗರ | ದಾರಿ ಯಾವುದಯ್ಯ ಶೌಚಾಲಯಕ್ಕೆ?

ಕಮಲನಗರ: ಪಟ್ಟಣದ ಬಸ್‌ ನಿಲ್ದಾಣದ ಮಹಿಳಾ ಪ್ರಯಾಣಿಕರಿಗಾಗಿಯೇ ಕೆಲ ತಿಂಗಳ ಹಿಂದೆ ಸೋನಾಳ ರಸ್ತೆಯ ತಿರುವಿನಲ್ಲಿ ನಿರ್ಮಿಸಿರುವ ಮಹಿಳಾ ಶೌಚಾಲಯದ ಮುಂದೆಯೇ ಆಟೊಗಳು ನಿಲ್ಲುವುದರಿಂದ ಶೌಚಾಲಯಕ್ಕೆ ತೆರಳಲು ದಾರಿ ಇಲ್ಲದಂತಾಗಿದ್ದು, ವಿವಿಧೆಡೆಯಿಂದ ಬರುವ ಮಹಿಳೆಯರಿಗೆ ಶೌಚಾಲಯ ಇದ್ದು ಇಲ್ಲದಂತಾಗಿದೆ.

ದೂರದ ನಾಂದೇಡ್, ಲಾತೂರ್‌, ಉದಗೀರ್‌, ಹೈದರಾಬಾದ್‌, ಜಹೀರಾಬಾದ್‌, ಬೀದರ್‌, ಭಾಲ್ಕಿ, ಭಾತಂಬ್ರಾ, ಲಖಣಗಾಂವ ಸೇರಿ ಇತರೆ ಪ್ರದೇಶಗಳಿಂದ ನಿತ್ಯ ನೂರಾರು ಪ್ರಯಾಣಿಕರು ಬಸ್‌ ನಿಲ್ದಾಣಕ್ಕೆ ಬರುತ್ತಾರೆ. ಗ್ರಾಮ ಪಂಚಾಯಿತಿ ವತಿಯಿಂದ ಕೆಲ ತಿಂಗಳ ಹಿಂದೆ ಮಹಿಳೆಯರಿಗಾಗಿಯೇ ಪ್ರತ್ಯೇಕ ಶೌಚಾಲಯ ನಿರ್ಮಿಸಲಾಗಿದೆ. ಆದರೆ ಶೌಚಾಲಯದ ಒಳಗೆ ಹೋಗಲು ದಾರಿಯೇ ಇರುವುದಿಲ್ಲ ಎಂದು ಮಹಿಳಾ ಪ್ರಯಾಣಿಕರು ದೂರಿದ್ದಾರೆ.

‘ಕಮಲನಗರದಲ್ಲಿ ಸುಮಾರು 40 ರಿಂದ 50 ಆಟೊಗಳಿವೆ. ಆಟೊಗಳಿಗೆ ಪ್ರತ್ಯೇಕ ನಿಲ್ದಾಣಗಳಿಲ್ಲ. ಎಲ್ಲಾ ಆಟೊಗಳನ್ನು ಮಹಿಳಾ ಶೌಚಾಲಯದ ಮುಂದೆಯೇ ತಂದು ಸಾಲಾಗಿ ನಿಲ್ಲಿಸಲಾಗುತ್ತಿದೆ. ಶೌಚಾಲಯಕ್ಕೆ ಹೋಗಲು ಸ್ವಲ್ಪ ಜಾಗವೂ ಇರುವುದಿಲ್ಲ. ಚಾಲಕರಿಗೆ ಮನವಿ ಮಾಡಿ ಆಟೊರಿಕ್ಷಾಗಳನ್ನು ಅಲ್ಲಿಂದ ತೆಗೆಸಿದ ನಂತರ ಮಹಿಳೆಯರು ಶೌಚ ಮಾಡಲು ತೆರಳಬೇಕು. ಶೌಚಾಲಯದ ಬಳಿಯೇ ಆಟೊ ಚಾಲಕರು ನಿಲ್ಲುವುದಿಂದ ಮಹಿಳೆಯರಿಗೆ ಮುಜಗರವಾಗುತ್ತಿದೆ’ ಎಂದು ಮಹಿಳಾ ಪ್ರಯಾಣಿಕರೊಬ್ಬರು ಅಸಮಾಧಾನ ವ್ಯಕ್ತಪಡಿಸಿದರು.

ಈ ಬಗ್ಗೆ ಸಂಬಂಧಿಸಿದ ಅಧಿಕಾರಿಗಳು ಹಾಗೂ ಪೊಲೀಸ್‌ ಇಲಾಖೆ ಅಧಿಕಾರಿಗಳ ಗಮನಕ್ಕೂ ತರಲಾಗಿದೆ. ಆದರೂ ಸಮಸ್ಯೆ ಬಗೆಹರಿಸಿಲ್ಲ ಎಂದು ಅವರು ಹೇಳಿದರು.