ಬಂಡೀಪುರ ಹುಲಿ ಸಂರಕ್ಷಿತ ಪ್ರದೇಶ: 3,627 ಹೆ. ಮೀಸಲು ಅರಣ್ಯ ಘೋಷಣೆ ನೆನೆಗುದಿಗೆ

ಚಾಮರಾಜನಗರ: ಬಂಡೀಪುರ ಹುಲಿ ಸಂರಕ್ಷಿತ ಪ್ರದೇಶದ ಕುಂದುಕೆರೆ ವಲಯ ಹಾಗೂ ಗುಂಡ್ಲುಪೇಟೆ ಬಫರ್‌ ವಲಯ ವ್ಯಾಪ್ತಿಯ ಕಾಡಂಚಿನ ಪ್ರದೇಶದ ಒಟ್ಟು 3,627.07 ಹೆಕ್ಟೇರ್‌ ಕಂದಾಯ ಜಮೀನನ್ನು 1963ರ ಕರ್ನಾಟಕ ಅರಣ್ಯ ಕಾಯ್ದೆಯ ಸೆಕ್ಷನ್‌ 17ರ ಅಡಿ  ಮೀಸಲು ಅರಣ್ಯ ಎಂದು ಘೋಷಿಸುವ ಪ್ರಕ್ರಿಯೆ ನನೆಗುದಿಗೆ ಬಿದ್ದಿದೆ. 

ಕುಂದುಕೆರೆ ವಲಯದಲ್ಲಿ 2,322.52 ಹೆಕ್ಟೇರ್‌ ಪ್ರದೇಶ ಹಾಗೂ ಗುಂಡ್ಲುಪೇಟೆ ಬಫರ್‌ ವಲಯದಲ್ಲಿ 1,306.55 ಹೆಕ್ಟೇರ್‌ ಪ್ರದೇಶವನ್ನು ಮೀಸಲು ಅರಣ್ಯ ಎಂದು ಘೋಷಿಸುವ ಪ್ರಸ್ತಾವ ಕಂದಾಯ ಇಲಾಖೆಯ ಮುಂದಿದೆ. 

ಹಲವು ವರ್ಷಗಳಿಂದ ಬಾಕಿ: ಗುಂಡ್ಲುಪೇಟೆ ಬಫರ್‌ ವಲಯದಲ್ಲಿ 1,306.55 ಹೆಕ್ಟೇರ್‌ ಪ್ರದೇಶವನ್ನು ಮೀಸಲು ಅರಣ್ಯಕ್ಕಾಗಿ ಕಾಯ್ದಿರಿಸಿ (ಸೆಕ್ಷನ್‌ 4ರ ಅಡಿ) 1991ರಲ್ಲೇ ಪ್ರಾಥಮಿಕ ಅಧಿಸೂಚನೆ ಹೊರಡಿಸಲಾಗಿದೆ. ಒಂದು ಹೆಜ್ಜೆ ಮುಂದೆ ಹೋಗಿ, ಕಾಯ್ದೆಯ ಸೆಕ್ಷನ್‌–5ರ ಅಡಿಯಲ್ಲಿ ಅಧಿಸೂಚನೆ ಹೊರಡಿಸಲಾಗಿದೆ. ಉಳಿದ ಪ್ರಕ್ರಿಯೆಗಳು (ಸೆಕ್ಷನ್‌-5 ರಿಂದ ಸೆಕ್ಷನ್‌ 17ರವರೆಗೆ ಮೀಸಲು ಅರಣ್ಯವಾಗಿ ಘೋಷಿಸಲು ಅಗತ್ಯವಿರುವ ಮೋಜಣೆ ಹಾಗೂ ನಕ್ಷೆ ತಯಾರಿಸುವುದು) ಬಾಕಿ ಇವೆ. 

ಕುಂದುಕೆರೆ ವಲಯದಲ್ಲಿ ಒಟ್ಟು ಮೀಸಲು ಅರಣ್ಯ ಘೋಷಣೆಗೆ 17 ಪ್ರಸ್ತಾವಗಳಿದ್ದು, ಈ ಪೈಕಿ ಎರಡು ಪ್ರಸ್ತಾವಗಳನ್ನು ಸೆಕ್ಷನ್‌ 17ರ ಅಡಿಯಲ್ಲಿ ಮೀಸಲು ಅರಣ್ಯ ಎಂದು ಘೋಷಿಸಿ ಅಧಿಸೂಚನೆ ಹೊರಡಿಸಲು ಜಿಲ್ಲಾಡಳಿತ ಸರ್ಕಾರಕ್ಕೆ ವರದಿ ಸಲ್ಲಿಸಿದೆ. ಇನ್ನೆರಡು ಪ್ರಸ್ತಾವಗಳನ್ನು ಕಾಯ್ದೆಯ ಸೆಕ್ಷನ್‌–5 ಅಡಿ ಅಧಿಸೂಚನೆ ಹೊರಡಿಸಲಾಗಿದೆ.

ಉಳಿದ 13 ಪ್ರಸ್ತಾವಗಳಲ್ಲಿ ಅರಣ್ಯ ಕಾಯ್ದೆಯ ಸೆಕ್ಷನ್‌ 4ರ ಅಡಿಯಲ್ಲಿ ಮೀಸಲು ಅರಣ್ಯ ಘೋಷಣೆಗಾಗಿ ಕಾಯ್ದಿರಿಸಿದ ಪ್ರದೇಶ ಎಂದು ಪ್ರಾಥಮಿಕ ಅಧಿಸೂಚನೆ ಹೊರಡಿಸಲಾಗಿದ್ದು, ಉಳಿದ ಪ್ರಕ್ರಿಯೆಗಳು ಅರಣ್ಯ ವ್ಯವಸ್ಥಾಪನಾ ಅಧಿಕಾರಿಯವರು (ಎಫ್‌ಎಸ್‌ಒ) ನಡೆಸಬೇಕಾಗಿದೆ.  

ಕುಂದುಕೆರೆ ವಲಯ ವ್ಯಾಪ್ತಿಯಲ್ಲಿ ಕೆಲವು ಪ್ರದೇಶಗಳನ್ನು 2002ರಲ್ಲೇ ಸೆಕ್ಷನ್‌–4ರ ಅಡಿ ಅಧಿಸೂಚನೆ ಹೊರಡಿಸಲಾಗಿದೆ. 2008, 2012ರಲ್ಲಿ ಅಧಿಸೂಚನೆ ಹೊರಡಿಸಲಾಗಿರುವ ಪ್ರದೇಶಗಳು ಕೂಡ ಮೀಸಲು ಅರಣ್ಯ ಘೋಷಣೆಗೆ ಬಾಕಿ ಇವೆ.  

ಎನ್‌ಟಿಸಿಎ ವರದಿಯಲ್ಲಿ ಉಲ್ಲೇಖ: ಮೀಸಲು ಅರಣ್ಯ ಘೋಷಣೆ ಬಾಕಿ ಇರುವ ವಿಚಾರ ರಾಷ್ಟ್ರೀಯ ಹುಲಿ ಸಂರಕ್ಷಣಾ ಪ್ರಾಧಿಕಾರದ (ಎನ್‌ಟಿಸಿಎ) ವರದಿಯಲ್ಲೂ ಉಲ್ಲೇಖವಾಗಿದೆ. 

ವನ್ಯಜೀವಿ ಸಂರಕ್ಷಣವಾದಿ ಗಿರಿಧರ್‌ ಕುಲಕರ್ಣಿ ಅವರು ಈ ವಿಷಯವನ್ನು ಎನ್‌ಟಿಸಿಎ ಗಮನಕ್ಕೆ ತಂದಿದ್ದು, ಬೆಂಗಳೂರಿನ ಎನ್‌ಟಿಸಿಎ ಪ್ರಾದೇಶಿಕ ಕಚೇರಿಯ ಸಹಾಯಕ ಐಜಿಎಫ್‌ ಹರಿಣಿ ವೇಣುಗೋಪಾಲ್‌ ಅವರು ಈ ಬಗ್ಗೆ ಮಾಹಿತಿ ಕಲೆಹಾಕಿ ಪ್ರಾಧಿಕಾರದ ಕೇಂದ್ರ ಕಚೇರಿಗೆ ಕಳೆದ ವರ್ಷದ ನವೆಂಬರ್‌ 17ರಂದು ಸಲ್ಲಿಸಿರುವ ವರದಿಯಲ್ಲಿ, ಶೀಘ್ರದಲ್ಲಿ ಮೀಸಲು ಅರಣ್ಯ ಘೋಷಣೆಗೆ ಸರ್ಕಾರ ಕ್ರಮ ಕೈಗೊಳ್ಳಬೇಕು ಎಂದು ಶಿಫಾರಸು ಮಾಡಿದ್ದಾರೆ.