ವಯನಾಡು ಗುಡ್ಡ ಕುಸಿತ: ಚಾಮರಾಜನಗರದ ದಂಪತಿ ನಾಪತ್ತೆ

ಚಾಮರಾಜನಗರ: ಕೇರಳದ ವಯನಾಡಿನಲ್ಲಿರುವ ಟೀ ಎಸ್ಟೇಟ್‌ನಲ್ಲಿ ಕೆಲಸಕ್ಕೆ ತೆರಳಿದ್ದ ಚಾಮರಾಜನಗರ ತಾಲ್ಲೂಕಿನ ನಾಗವಳ್ಳಿ ಗ್ರಾಮದ ರತ್ನಮ್ಮ (45) ಹಾಗೂ ರಾಜೇಂದ್ರ (55) ದಂಪತಿ ನಾಪತ್ತೆಯಾಗಿದ್ದಾರೆ.

ದಂಪತಿ ನಾಪತ್ತೆಯಾಗಿರುವ ಬಗ್ಗೆ ಪ್ರಾಥಮಿಕ ಮಾಹಿತಿ ಲಭ್ಯವಾಗಿದ್ದು ಜಿಲ್ಲಾಡಳಿತ ಮಾಹಿತಿ ಕಲೆ ಹಾಕುತ್ತಿದೆ ಎಂದು ಹೆಚ್ಚುವರಿ ಜಿಲ್ಲಾಧಿಕಾರಿ ಗೀತಾ ಹುಡೇದ ತಿಳಿಸಿದ್ದಾರೆ.

ಪತಿಯ ರಕ್ಷಣೆಗೆ ಮೊರೆ:

ಚಾಮರಾಜನಗರದ ಉಪ್ಪಾರ ಬೀದಿಯ ಪ್ರವೀದಾ ಅವರ ಪತಿ ವಿನೋದ್‌ ಭೂಕುಸಿತ ಸಂಭವಿಸಿರುವ ಚೂರಲ್‌ಮಲೆಯ ಭಾಗದಲ್ಲಿ ಸಿಲುಕಿದ್ದಾರೆ. ಪತಿ ಫೋನ್ ಸಂಪರ್ಕಕ್ಕೆ ಸಿಕ್ಕಿದ್ದು ಸುರಕ್ಷಿತವಾಗಿದ್ದಾರೆ, ಗುಡ್ಡಕುಸಿತ ಜಾಗದಲ್ಲಿ ಸಿಲುಕಿರುವ ಪತಿಯನ್ನು ರಕ್ಷಿಸಿ ಕರೆತರಬೇಕು ಎಂದು ಪ್ರವೀದಾ ಜಿಲ್ಲಾಡಳಿತಕ್ಕೆ ಮನವಿ ಮಾಡಿದ್ದಾರೆ.