ಸಂತೇಮರಹಳ್ಳಿ | ಶಾಲಾ ವಾಹನ ಡಿಕ್ಕಿ: ಮಗು ಸಾವು

ಸಂತೇಮರಹಳ್ಳಿ: ಖಾಸಗಿ ಶಾಲಾ ವಾಹನ ಹರಿದು ಗಂಡು ಮಗು ಮೃತಪಟ್ಟಿರುವ ಘಟನೆ ಸಮೀಪದ ಕಮರವಾಡಿ ಗ್ರಾಮದಲ್ಲಿ ಗುರುವಾರ ನಡೆದಿದೆ.

ಗ್ರಾಮದ ನವೀನ್ ಎಂಬುವರ ಪುತ್ರ ಆರ್ಯ (ಒಂದೂವರೆ ವರ್ಷ) ಮೃತಪಟ್ಟ ಮಗು. ಸಂತೇಮರಹಳ್ಳಿಯ ಲೋಟಸ್ ಆಂಗ್ಲ ಮಾಧ್ಯಮ ಶಾಲೆಗೆ ಸೇರಿದ ವಾಹನ ನವೀನ್ ಅವರ ಮಗಳನ್ನು ಶಾಲೆಗೆ ಕರೆ ತರಲು ಗ್ರಾಮಕ್ಕೆ ತೆರಳಿದಾಗ ಮಗುವಿನ ತಾಯಿ ಚೈತ್ರ ದೊಡ್ಡ ಮಗಳನ್ನು ಶಾಲಾ ವಾಹನಕ್ಕೆ ಹತ್ತಿಸಿದ್ದಾರೆ. ಚಾಲಕ ವಾಹನವನ್ನು ಹಿಮ್ಮುಖವಾಗಿ ಚಾಲನೆ ಮಾಡುವಾಗ ಚೈತ್ರಾ ಅವರ ಚಿಕ್ಕ ಮಗು ಹಿಂಬದಿಯಿಂದ ಓಡಿ ಬಂದು ನಿಂತಿದೆ. ಈ ಸಮಯದಲ್ಲಿ ವಾಹನದ ಹಿಂಭಾಗಕ್ಕೆ ಸಿಲುಕಿ ಮಗು ಮೃತಪಟ್ಟಿದೆ. ಈ ಸಂಬಂಧ ಸಂತೇಮರಹಳ್ಳಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಆರೋಪ: ಸಂತೇಮರಹಳ್ಳಿ ಖಾಸಗಿ ಶಾಲಾ ವಾಹನ ಚಾಲಕನ ಅಜಾಗರೂಕತೆ ಮಗು ಸಾವನ್ನಪ್ಪಲು ಕಾರಣವಾಗಿದೆ. ಗ್ರಾಮೀಣ ಪ್ರದೇಶಗಳಲ್ಲಿ ಶಾಲಾ ವಾಹನ ಚಾಲನೆ ಮಾಡುವ ವೇಳೆಯಲ್ಲಿ ಹಿಂದೆ ಮುಂದೆ ಜನರು ಇದ್ದಾರೆ ಎನ್ನುವುದನ್ನು ನೋಡಿಕೊಂಡು ವಾಹನ ಚಾಲನೆ ಮಾಡಬೇಕು. ಶಾಲಾ ವಾಹನದಲ್ಲಿ ಚಾಲಕನ ಜೊತೆ ಸಿಬ್ಬಂದಿಯೊಬ್ಬರನ್ನು ಶಾಲೆ ಆಡಳಿತ ಮಂಡಳಿ ನೇಮಿಸಿ ಕೊಂಡು ಮಕ್ಕಳನ್ನು ವಾಹನಕ್ಕೆ ಹತ್ತಿಸಿಕೊಳ್ಳುವ ವ್ಯವಸ್ಥೆ ಮಾಡಬೇಕು. ಆದರೆ, ಈ ವಾಹನದಲ್ಲಿ ಚಾಲಕನೊಬ್ಬನೆ ಮಕ್ಕಳನ್ನು ಕರೆದುಕೊಂಡು ಹೋಗುತ್ತಿದ್ದ ಕಾರಣದಿಂದ ಇಂತಹ ಘಟನೆ ನಡೆಯಲು ಕಾರಣವಾಗಿದೆ ಎಂದು ಗ್ರಾಮಸ್ಥರು ಆರೋಪಿಸಿದ್ದಾರೆ.