ಬಸ್‌‌‌ಗೆ ಜಿಂಕೆ ಡಿಕ್ಕಿ: ಸಾವು

ಗುಂಡ್ಲುಪೇಟೆ: ಸಾರಿಗೆ ಬಸ್ ಡಿಕ್ಕಿ ಹೊಡೆದು ಎರೆಡುವರೆ ವರ್ಷದ ಗಂಡು ಜಿಂಕೆ ಮೃತಪಟ್ಟಿರುವ ಘಟನೆ ಮಂಗಲ ಗ್ರಾಮದಲ್ಲಿ ಶುಕ್ರವಾರ ಬೆಳಿಗ್ಗೆ ನಡೆದಿದೆ.

 ಎಲಚೆಟ್ಟಿ ಗ್ರಾಮದಿಂದ ಬಸ್ ಗುಂಡ್ಲುಪೇಟೆಗೆ ಬರುವ ಸಂದರ್ಭದಲ್ಲಿ ನಾಯಿ ಜಿಂಕೆಯನ್ನು ಅಟ್ಟಾಡಿಸಿಕೊಂಡು ಬಂದಿದೆ.  ಜಿಂಕೆ ರಸ್ತೆ ದಾಟುವಾಗ ಬಸ್‌‌‌ಗೆ ಡಿಕ್ಕಿಯಾಗಿದೆ. ಜಿಂಕೆ ಪಕ್ಕದಲ್ಲೇ ಇದ್ದ ಮನೆಯ ಗೇಟಿನ ಒಳಗೆ ಹೋಗಿ ಮೃತಪಟ್ಟಿದೆ ಎಂದು ಪ್ರತ್ಯಕ್ಷ ದರ್ಶಿಗಳು ತಿಳಿಸಿದರು. ಬಳಿಕ ಅರಣ್ಯ ಇಲಾಖೆ ಸಿಬ್ಬಂದಿ ಆಗಮಿಸಿ ಚಾಲಕರ ವಿರುದ್ಧ ಪ್ರಕರಣ ದಾಖಲಿಸಿ ಜಿಂಕೆಯ ಕಳೇಬರವನ್ನು ಹೂತರು.

ಜಿಂಕೆ ಸಾವಿಗೆ ನಾಯಿ ಕಾರಣವೇ ಇಲ್ಲವೇ ಚಾಲಕನ ಅಜಾಗರೂಕತೆಯಿಂದ ಈ ಘಟನೆ ಸಂಭವಿಸಿತೆ ಎಂಬುದನ್ನು ಅರಣ್ಯ ಇಲಾಖೆ ಅಧಿಕಾರಿಗಳು ತನಿಖೆ ಮಾಡಬೇಕು ಎಂದು ಗ್ರಾಮದ ಮುಖಂಡ ಉಮೇಶ್ ಒತ್ತಾಯಿಸಿದರು.