ಯಳಂದೂರು | ಕಾಲುವೆ ನೀರು: ಸಣ್ಣ ಮೀನು ಮಾರಾಟ ಜೋರು

ಯಳಂದೂರು: ತಾಲ್ಲೂಕಿನ ಜಲಾನಯನ ಪ್ರದೇಶಗಳಲ್ಲಿ ಕೆರೆ ಕಟ್ಟೆಗಳಲ್ಲಿ ನೀರಿನ ಮಟ್ಟ ಕುಸಿಯುತ್ತಿದೆ. ಹೊಳೆ, ಕಾಲುವೆಯಲ್ಲಿ ಅಲ್ಪ ಪ್ರಮಾಣದ ನೀರು ಹರಿಯುತ್ತಿದೆ. ಕಬಿನಿ ಮತ್ತು ಸುವರ್ಣಾವತಿ ನದಿಗೆ ಬಿಟ್ಟಿರುವ ಅಲ್ಪ ನೀರಿನಲ್ಲಿ ಸಣ್ಣ ಮೀನುಗಳು ಕಾಣಿಸಿಕೊಂಡಿದ್ಡು, ಗೆಂಡೆ ಹಾಗೂ ಹಾವುಮೀನು ಹಿಡಿಯಲು ಯುವಕರು ಮುಗಿಬಿದ್ದಿದ್ದಾರೆ.

ಪಟ್ಟಣ ಹಾಗೂ ಸುತ್ತಲಿನ ನದಿ ತೀರದ ಗ್ರಾಮಗಳಲ್ಲಿ ಮೀನುಗಾರಿಕೆ ಮತ್ತು ಖರೀದಿ ಭರ್ಜರಿಯಾಗಿ ನಡೆಯುತ್ತಿದೆ. 

ಪಟ್ಟಣದ ಹೆದ್ದಾರಿಗಳಲ್ಲಿ ದಿನಕ್ಕೆ ನೂರಾರು ಕೆಜಿ ಮೀನು ಬಿಕರಿಯಾಗುತ್ತಿದೆ. ಮುಂಜಾನೆ ಕೆರೆ ಮೀನು,  ಮಧ್ಯಾಹ್ನ ನದಿ ಮೀನಿಗೆ ಬೇಡಿಕೆ ಇದೆ. ಬೇಡಿಕೆ ಹೆಚ್ಚಾಗುತ್ತಿದ್ದಂತೆ ಕಾವೇರಿ ನದಿ ಪಾತ್ರದ ಮೀನುಗಳು ಮಾರಾಟಕ್ಕೆ ಬಂದಿದೆ. ಈ ಮೀನುಗಳಿಗೆ ಬೆಲೆ ಕಡಿಮೆ ಹಾಗೂ ರುಚಿ ಹೆಚ್ಚು. ಹೀಗಾಗಿ ಮೀನು ಖಾದ್ಯ ಪ್ರಿಯರು ಮುಗಿಬಿದ್ದು‌ಕೊಳ್ಳುತ್ತಿದ್ದಾರೆ.    

‘ನದಿಯಲ್ಲಿ ಹೊಸ ನೀರು ಹರಿಯುತ್ತಿದೆ. ಕಬಿನಿ, ಹೊನ್ನು ಹೊಳೆಯಲ್ಲಿ ಸಣ್ಣಮೀನು ಸಿಗುತ್ತದೆ. ಸಣ್ಣಬಲೆ ಹಾಕಿದರೂ ಕೆಜಿಗಟ್ಟಲೆ ಸಿಗುತ್ತದೆ. ನೀರಿನ ವೇಗ ಕಡಿಮೆಯಾದಾಗ ಜನರು ಕಾಲುವೆಗೆ ಇಳಿದು ಉದ್ದದ ಬಲೆ ಬೀಸಿ ಮೀನು ಸಂಗ್ರಹಿಸುತ್ತಾರೆ’ ಎಂದು ವ್ಯಾಪಾರಿ ಮಹದೇವ ‘ಪ್ರಜಾವಾಣಿ’ಗೆ ತಿಳಿಸಿದರು. 

‘ಮಳೆ ಕೊರತೆಯಿಂದ ಒಳ ನಾಡಿನ ಮೀನು ಸಾಕಣೆಗೆ ಹಿನ್ನಡೆಯಾಗಿದೆ. ಸಮುದ್ರ ಮೀನುಗಳಿಗೆ ಬೆಲೆ ಏರಿದೆ. ಸಾಮಾನ್ಯ ಗೆಂಡೆ, ರೋಹು ಮೀನುಗಳಿಗೆ ಹೆಚ್ಚಿನ ಧಾರಣೆ ಇದೆ. ಹಾಗಾಗಿ, ಅಗ್ಗವಾಗಿ ಸಿಗುವ ಮೀನುಗಳನ್ನು ಹಿಡಿದು ಆದಾಯ ಗಳಿಸುವತ್ತ ಯುವಕರು ಮುಂದಡಿ ಇಟ್ಟಿದ್ದಾರೆ. ಸಣ್ಣಮೀನು 1 ಕೆಜಿಗೆ ₹100 ರಿಂದ ₹120 ದರ ಇದೆ. ಈ ಮೀನುಗಳನ್ನು ಸ್ವಚ್ಛಗೊಳಿಸುವುದು ಸುಲಭ. ಸಹಜವಾಗಿ ಸಣ್ಣ ಪುಟ್ಟ ಮೀನಿನ ರುಚಿ ಬೆನ್ನುಹತ್ತಿರುವ ಗ್ರಾಹಕರು ಹೆಚ್ಚು ಕೊಳ್ಳುತ್ತಾರೆ’ ಎಂದು ನರಸೀಪುರದ ಮೀನು ವ್ಯಾಪಾರಿ ನವೀನ್ ಹೇಳಿದರು.