ಹನೂರು: ಚಿರತೆ ದಾಳಿಗೆ ಎರಡು ಮೇಕೆ ಸಾವು

ಹನೂರು: ತಾಲ್ಲೂಕಿನ ರಾಮನಗುಡ್ಡೆ ಕೆರೆ ಹಿಂಭಾಗದ ಪಂಡಿತಾರಾಧ್ಯ ಎಂಬುವರ ಜಮೀನಿಗೆ ಮಂಗಳವಾರ ರಾತ್ರಿ ಚಿರತೆ ನುಗ್ಗಿ ಎರಡು ಮೇಕೆಗಳನ್ನು ಕೊಂದು ಹಾಕಿದೆ.

ರಾತ್ರಿ ಒಂದು ಗಂಟೆ ಸಮಯದಲ್ಲಿ ಚಿರತೆ ಕೊಟ್ಟಿಗೆಗೆ ನುಗ್ಗಿದೆ. ಇದರಿಂದ ಗಾಬರಿಯಾದ ಮೇಕೆಗಳು ಕಿರುಚಲಾರಂಭಿಸಿವೆ. ಆಗ ಪಕ್ಕದ ಜಮೀನಿನ ಮೋಹನ್ ಎಂಬುವರು ಕೊಟ್ಟಿಗೆ ಬಳಿ ಹೋದಾಗ ಹೆಜ್ಜೆ ಸಪ್ಪಳ ಕೇಳಿ ಚಿರತೆ ಓಡಿ ಹೋಗಿದೆ. ರಾಮನಗುಡ್ಡಕ್ಕೆ ನೀರು ಹರಿದು ಹೋಗುವ ಹಳ್ಳದಲ್ಲಿ ಬುಧವಾರ ಮಧ್ಯಾಹ್ನ ಚಿರತೆ ಕಾಣಿಸಿಕೊಂಡಿದೆ.

‘ಇಷ್ಟು ದಿನ ಈ ಭಾಗದಲ್ಲಿ ಚಿರತೆ ಕಾಣಿಸಿಕೊಂಡಿರಲಿಲ್ಲ. ಈಗ ಚಿರತೆ ಕಾಣಿಸಿಕೊಂಡ ಸುದ್ದಿ ತಿಳಿದು ಸುತ್ತಮುತ್ತಲಿನ ಜನರು ಭಯಭೀತರಾಗಿದ್ದಾರೆ. ಜಮೀನಿನ ಮನೆಗಳಲ್ಲಿರುವ ಜಾನುವಾರು, ಮೇಕೆ, ನಾಯಿಗಳ ಮೇಲೆ ದಾಳಿ ಮಾಡಲು ಬರುವ ಚಿರತೆ ಮನುಷ್ಯರ ಮೇಲೆ ದಾಳಿ ಮಾಡಿದರೆ ಗತಿಯೇನು? ಅರಣ್ಯ ಇಲಾಖೆಯವರು ಕೂಡಲೇ ಈ ಭಾಗದಲ್ಲಿ ಬೋನು ಇರಿಸಿ ಸೆರೆ ಹಿಡಿದು ಬೇರೆಡೆ ಬಿಡಬೇಕು’ ಎಂದು ಪಿ. ಮೋಹನ್ ಒತ್ತಾಯಿಸಿದ್ದಾರೆ.