ವರದಿ ಪರಿಣಾಮ | ನರಸಿಂಹರಾಜಪುರ: ಕೆರೆಗೆ ತಡೆಗೋಡೆ ನಿರ್ಮಾಣಕ್ಕೆ ಚಾಲನೆ

ನರಸಿಂಹರಾಜಪುರ: ತಾಲ್ಲೂಕಿನ ಮುಳವಳ್ಳಿ ಸಮೀಪದ ಜೋಡಿಗೆರೆ ಬಳಿ ಬಾಳೆಹೊನ್ನೂರು ಮುಖ್ಯರಸ್ತೆಯ ಬದಿಯಲ್ಲಿರುವ ಕೆರೆಗೆ ತಡೆಗೋಡೆ ನಿರ್ಮಾಣಕ್ಕೆ ಲೋಕೋಪಯೋಗಿ ಇಲಾಖೆ ಚಾಲನೆ ನೀಡಿದೆ.

ತಾಲ್ಲೂಕು ಕೇಂದ್ರದಿಂದ ಬಾಳೆಹೊನ್ನೂರಿಗೆ ಸಂಪರ್ಕಿಸುವ ಮುಖ್ಯರಸ್ತೆಯ ಮುಳುವಳ್ಳಿ ಸಮೀಪ ಎರಡೂ ಬದಿ ಕೆರೆ ಇದ್ದು, ಅಪಘಾತಗಳು ಸಂಭವಿಸುತ್ತಿದ್ದವು. ಇಲ್ಲಿನ ಕೆರೆಗೆ ಕಾರೊಂದು ಚಾಲಕ ನಿಯಂತ್ರಣತಪ್ಪಿ ಬಿದ್ದು ಪ್ರಯಾಣಿಕರೊಬ್ಬರು ಮೃತಪಟ್ಟಿದ್ದರು. ಕೆರೆಗೆ ತಡೆಗೋಡೆ ಇಲ್ಲದೆ ಅವಘಡ ನಡೆಯುತ್ತಿರುವ ಬಗ್ಗೆ ‘ಪ್ರಜಾವಾಣಿ’ಯಲ್ಲಿ ಈಚೆಗೆ ಲೇಖನ ಪ್ರಕಟವಾಗಿತ್ತು.