ಚಿತ್ರದುರ್ಗ | ನಿರ್ವಹಣೆ ಸಮಸ್ಯೆ: ಇದ್ದೂ ಇಲ್ಲದಂತಾದ ಕ್ರೀಡಾಂಗಣ
Published 7 ಅಕ್ಟೋಬರ್ 2024, 5:27 IST Last Updated 7 ಅಕ್ಟೋಬರ್ 2024, 5:27 IST 
ನಿರ್ವಹಣೆ ಕೊರತೆಗೆ ನಲುಗಿರುವ ಚಿತ್ರದುರ್ಗದ ಒನಕೆ ಓಬವ್ವ ಕ್ರೀಡಾಂಗಣ
ಚಿತ್ರ– ವಿ.ಚಂದ್ರಪ್ಪ.
ಚಿತ್ರದುರ್ಗ: ಹಾಳಾಗಿರುವ ಸಿಂಥೆಟಿಕ್‌ ಟ್ರ್ಯಾಕ್‌, ಕಲ್ಲು ಮಿಶ್ರಿತ ಮರಳಿರುವ ಲಾಂಗ್‌ಜಂಪ್‌ ಪಿಟ್‌, ಮುರಿದ ಆಸನಗಳು, ದಟ್ಟವಾಗಿ ಬೆಳೆದಿರುವ ಹುಲ್ಲು, ದುರ್ವಾಸನೆ ಬೀರುವ ಶೌಚಾಲಯ, ಕತ್ತಲಾದರೆ ಅಲ್ಲಲ್ಲಿ ಮಾತ್ರ ಬೆಳಗುವ ವಿದ್ಯುತ್ ದೀಪ... ಇದು ಜಿಲ್ಲಾ ಕೇಂದ್ರದ ಒನಕೆ ಓಬವ್ವ ಕ್ರೀಡಾಂಗಣದ ಚಿತ್ರಣ.
31 ವರ್ಷಗಳ ಹಿಂದೆ ನಗರದ 19 ಎಕರೆ ಜಾಗದಲ್ಲಿ ಕ್ರೀಡಾಂಗಣ ನಿರ್ಮಿಸಲಾಗಿದೆ. ದಶಕದ ಹಿಂದೆ 400 ಮೀಟರ್‌ ಓಟಕ್ಕೆ ಸಿಂಥೆಟಿಕ್‌ ಟ್ರ್ಯಾಕ್‌ ಅಳವಡಿಕೆ ಸೇರಿದಂತೆ ವಾಲಿಬಾಲ್‌, ಬ್ಯಾಸ್ಕೆಟ್‌ ಬಾಲ್‌, ಬಾಲ್‌ ಬ್ಯಾಡ್ಮಿಂಟನ್‌, ಈಜುಕೊಳ, ಜಿಮ್‌, ಬ್ಯಾಡ್ಮಿಂಟನ್‌ ಕೋರ್ಟ್‌ ನಿರ್ಮಿಸಲಾಗಿತ್ತು. ಆದರೆ, ನಿರ್ವಹಣೆ ಕೊರತೆಯಿಂದ ಅವೆಲ್ಲ ಇದ್ದೂ ಇಲ್ಲದ ಸ್ಥಿತಿಗೆ ತಲುಪಿವೆ.
ದುಬಾರಿ ದರ ತೆತ್ತು ಅಳವಡಿಸಿದ ಸಿಂಥೆಟಿಕ್‌ ಟ್ರ್ಯಾಕ್‌ ಕ್ರೀಡಾಪಟುಗಳಿಗಿಂತ ಸಾರ್ವಜನಿಕರ ವಾಯುವಿಹಾರಕ್ಕೆ ಬಳಕೆಯಾಗಿದ್ದೇ ಹೆಚ್ಚು. ಮಳೆ ನೀರು ನಿಂತು ಇಡೀ ಟ್ರ್ಯಾಕ್‌ ಹಾಳಾಗಿದೆ. ಉಬ್ಬು–ತಗ್ಗು ಟ್ರ್ಯಾಕ್‌ನಲ್ಲೇ ಕ್ರೀಡಾಪಟುಗಳು ಅಭ್ಯಾಸ ಮಾಡುತ್ತಿದ್ದಾರೆ. ಹೊರಾಂಗಣ ಕ್ರೀಡಾಂಗಣ ಪ್ರವೇಶಕ್ಕಿರುವ ಏಳು ದ್ವಾರಗಳಲ್ಲಿ ಬಹುತೇಕ ಕಿತ್ತು ಹೋಗಿದ್ದು, ಹಗ್ಗದಿಂದ ಕಟ್ಟಲಾಗಿದೆ. ಆದರೆ ಎಲ್ಲಿಯೂ ಕಾವಲುಗಾರರು ಕಾಣಿಸುವುದಿಲ್ಲ.
ನಾಯಿ, ಕುರಿ ಕ್ರೀಡಾಂಗಣಕ್ಕೆ ನುಗ್ಗುವುದು ಮಾಮೂಲಿಯಾಗಿದೆ. ಸಂಜೆ, ನಸುಕಿನ ವೇಳೆ ಅಭ್ಯಾಸ ನಡೆಸಲು ಸಮರ್ಪಕ ವಿದ್ಯುತ್ ದೀಪದ ವ್ಯವಸ್ಥೆ ಇಲ್ಲ. ದಟ್ಟವಾಗಿ ಹುಲ್ಲು ಬೆಳೆದಿರುವ ಕಾರಣ ಹಾವುಗಳ ಕಾಟ ಹೆಚ್ಚಿದೆ. ಮೈದಾನದ ಅಲ್ಲಲ್ಲಿ ಮದ್ಯದ ಬಾಟಲು, ಪೌಚ್‌ಗಳು ಕಾಣುವುದು ಇಲ್ಲಿನ ಅವ್ಯವಸ್ಥೆಗೆ ಹಿಡಿದ ಕನ್ನಡಿಯಾಗಿದೆ.
ಕ್ರೀಡಾಂಗಣದಲ್ಲಿ ಶೌಚಾಲಯ ವ್ಯವಸ್ಥೆ ಇದ್ದರೂ ನಿರ್ವಹಣೆ ಕೊರತೆಯಿಂದ ಸದ್ಬ‌ಳಕೆಯಾಗುತ್ತಿಲ್ಲ. ಕ್ರೀಡಾಪಟುಗಳು ಹಾಗೂ ಸಾರ್ವಜನಿಕರು ಬಯಲಲ್ಲಿ ಮೂತ್ರ ವಿಸರ್ಜನೆ ಮಾಡುವ ಸ್ಥಿತಿ ಎದುರಾಗಿದೆ. ಶಾಲೆ– ಕಾಲೇಜು ಹಂತದ ಕ್ರೀಡಾಕೂಟ ನಡೆಯುವಾಗ ಪರಿಸ್ಥಿತಿ ಹೇಳತೀರದಂತಾಗಿದೆ.
ಮೂಲಸೌಲಭ್ಯ ಕೊರತೆ ಹಾಗೂ ನಿರ್ವಹಣೆ ಇಲ್ಲದ ಕಾರಣಕ್ಕೆ ಕ್ರೀಡಾಪಟುಗಳ ಅಭ್ಯಾಸದ ಮೇಲೆ ದುಷ್ಪರಿಣಾಮ ಬೀರಿದೆ. ಆಟಕ್ಕೆ ಅಗತ್ಯವಿರುವ ಪೂರಕ ವಾತಾವರಣ ಕ್ರೀಡಾಂಗಣದಲ್ಲಿ ಇಲ್ಲ. ಮೈದಾನದ ಸುತ್ತ ವಾಯುವಿಹಾರಿಗಳ ಸಂಚಾರಕ್ಕೆ ಅವಕಾಶ ಕಲ್ಪಿಸಲಾಗಿದೆ. ಆಸನದ ವ್ಯವಸ್ಥೆ ಕಲ್ಪಿಸಿದರೂ ಕುಳಿತುಕೊಳ್ಳುವ ಸ್ಥಿತಿಯಲ್ಲಿ ಇಲ್ಲ. ಮಳೆ ನೀರು ಹರಿದುಹೋಗಲು ನಿರ್ಮಿಸಿದ ಚರಂಡಿಗೆ ಅಳವಡಿಸಿದ ಸಿಮೆಂಟ್‌ ನೆಲಹಾಸು ಒಡೆದು ಹೋಗಿವೆ.
ರಾಷ್ಟ್ರೀಯ ಮತ್ತು ಅಂತರರಾಷ್ಟ್ರೀಯ ಮಟ್ಟದ ಕ್ರೀಡಾಕೂಟಗಳಿಗೆ ಕೋಟೆನಾಡಿನ ಪ್ರತಿಭೆಗಳನ್ನು ಸಜ್ಜುಗೊಳಿಸುವ ಉದ್ದೇಶದಿಂದ ರೂಪುತಳೆದ ಕ್ರೀಡಾಂಗಣದ ಮೂಲ ಉದ್ದೇಶವನ್ನು ಕ್ರೀಡಾ ಮತ್ತು ಯುವಜನ ಸೇವಾ ಇಲಾಖೆ ಮರೆತಂತೆ ಕಾಣುತ್ತಿದೆ.
ಪೂರಕ ಮಾಹಿತಿ: ಸುವರ್ಣಾ ಬಸವರಾಜ್‌, ಕೊಂಡ್ಲಹಳ್ಳಿ ಜಯಪ್ರಕಾಶ, ಸಾಂತೇನಹಳ್ಳಿ ಸಂದೇಶ್‌ಗೌಡ, ಶ್ವೇತಾ ಜಿ., ವಿ. ಧನಂಜಯ
ಚಿತ್ರದುರ್ಗದ ಒನಕೆ ಓಬವ್ವ ಕ್ರೀಡಾಂಗಣದಲ್ಲಿರುವ ಸಿಂಥೆಟಿಕ್‌ ಟ್ರ್ಯಾಕ್‌ ಮೇಲೆ ನಿಂತಿರುವ ಮಳೆ ನೀರು
ಕ್ರೀಡಾಂಗಣದಲ್ಲಿ ಸಮಸ್ಯೆಗಳಿರುವುದು ಗಮನದಲ್ಲಿದೆ. ಸಮಗ್ರ ಯೋಜನೆ ರೂಪಿಸಿ ಅಭಿವೃದ್ಧಿಪಡಿಸಲಾಗುತ್ತದೆ. ಮಳೆಗಾಲದಲ್ಲಿ ಹುಲ್ಲು ಬೆಳೆದಿದ್ದು ಶೀಘ್ರ ತೆರವುಗೊಳಿಸುವ ಕಾರ್ಯ ನಡೆಸಲಾಗುತ್ತದೆ
ಸುಚೇತ ಎಂ.ನೆಲವಗಿ ಸಹಾಯಕ ನಿರ್ದೇಶಕಿ ಯುವಜನ ಸೇವಾ ಮತ್ತು ಕ್ರೀಡಾ ಇಲಾಖೆಜಿಲ್ಲಾ ಕ್ರೀಡಾಂಗಣದ ಸಮಸ್ಯೆ ಎಷ್ಟು ಹೇಳಿದರೂ ಮುಗಿಯದಷ್ಟಿವೆ. ಕ್ರೀಡಾಕೂಟದಲ್ಲಿ ಪಾಲ್ಗೊಳ್ಳುವವರು ಎದುರಿಸುವ ಸಮಸ್ಯೆ ನೋಡಿದರೆ ಬೇಸರವಾಗುತ್ತದೆ. ಕಲ್ಲುಮಿಶ್ರಿತ ಮರಳಿನ ಲಾಂಗ್‌ ಜಂಪ್‌ ಪಿಟ್‌ನಲ್ಲಿ ಗಾಯವಾಗುವುದು ಮಾಮೂಲಿಯಾಗಿದೆ
ಸಿ.ಶಿವಮೂರ್ತಿ ಕ್ರೀಡಾಪಟುಸರಿಯಾಗಿ ನಿರ್ವಹಣೆ ಮಾಡಿದರೆ ಎಲ್ಲವೂ ಸರಿಯಾಗುತ್ತದೆ. ಶೌಚಾಲಯ ಮೈದಾನ ಕ್ರೀಡಾಪಟುಗಳಿಗಿಂತ ಸಾರ್ವಜನಿಕರಿಗೆ ಬಳಕೆಯಾಗಿದ್ದೇ ಹೆಚ್ಚು. ಕಬಡ್ಡಿ ಕೋರ್ಟ್‌ಗೆ ಮನವಿ ಮಾಡಿದರೂ ಸ್ಪಂದಿಸುತ್ತಿಲ್ಲ
ಎಸ್‌.ಎಚ್‌.ಲೋಹಿತ್‌ ಕ್ರೀಡಾಪಟು₹ 30 ಕೋಟಿ ವೆಚ್ಚದಲ್ಲಿ ಹೊಳಲ್ಕೆರೆ ತಾಲ್ಲೂಕು ಕ್ರೀಡಾಂಗಣ ಅಭಿವೃದ್ಧಿಪಡಿಸಲಾಗುತ್ತಿದ್ದು ಕಾಮಗಾರಿ ಮುಗಿದ ನಂತರ ಇದು ಜಿಲ್ಲೆಯಲ್ಲಿಯೇ ಸುಂದರ ಕ್ರೀಡಾಂಗಣ ಆಗಲಿದೆ
ಎಂ.ಚಂದ್ರಪ್ಪ ಶಾಸಕಶೀಘ್ರದಲ್ಲಿಯೇ ವ್ಯವಸ್ಥೆ
ಹಿರಿಯೂರು: ಇದು ಹೆಸರಿಗೆ ಮಾತ್ರ ತಾಲ್ಲೂಕು ಕ್ರೀಡಾಂಗಣ. ಇಲ್ಲಿ ಆಟದ ಅಂಕಣ ಶುದ್ಧ ಕುಡಿಯುವ ನೀರು ಶೌಚಾಲಯ ಕ್ರೀಡಾ ತರಬೇತುದಾರ ಸೇರಿ ಯಾವುದನ್ನೇ ಕೇಳಿದರೂ ಸಿಗುವ ಸಿದ್ಧ ಉತ್ತರ ‘ಶೀಘ್ರದಲ್ಲಿಯೇ ವ್ಯವಸ್ಥೆ ಮಾಡುತ್ತೇವೆ’ ಎಂಬುದಾಗಿದೆ. ನಗರದ ಹುಳಿಯಾರು ರಸ್ತೆಯಲ್ಲಿರುವ ತಾಲ್ಲೂಕು ಕ್ರೀಡಾಂಗಣ ಮಳೆ ಬಂದರೆ ಹುಲ್ಲುಗಾವಲಿನಂತೆಯೂ ಬೇಸಿಗೆಯಲ್ಲಿ ಬರಡು ಭೂಮಿಯಂತೆಯೂ ಆಗುತ್ತದೆ. ನಗರಕ್ಕೆ ಹೇಳಿಕೊಳ್ಳುವಂತಹ ಒಂದು ಕ್ರೀಡಾಂಗಣ ಬೇಡವೇ? ಎಂಬ ಪ್ರಶ್ನೆಗೆ ಹಲವು ವರ್ಷಗಳಿಂದ ಉತ್ತರ ಸಿಗುತ್ತಿಲ್ಲ. ಮಾಜಿ ಶಾಸಕಿ ಪೂರ್ಣಿಮಾ ಶ್ರೀನಿವಾಸ್‌ ಅವಧಿಯಲ್ಲಿ ಕಾಂಪೌಂಡ್ ಗ್ಯಾಲರಿ ನಿರ್ಮಾಣ ಆಗಿದ್ದು ಬಿಟ್ಟರೆ ಬೇರೆ ಅಭಿವೃದ್ಧಿ ಕಾರ್ಯಗಳು ಆಗಿಲ್ಲ. ಮೈದಾನದ ಅಭಿವೃದ್ಧಿಗೆ ವಾಯುವಿಹಾರಿಗಳು ಸಮನ್ವಯ ಕ್ರೀಡಾ ಸಮಿತಿ ರಚಿಸಿಕೊಂಡು ಹೋರಾಟ ನಡೆಸುತ್ತಿದ್ದಾರೆ. ಹಿರಿಯೂರಿನಲ್ಲಿ ರಾಷ್ಟ್ರೀಯ ಅಂತರರಾಷ್ಟ್ರೀಯ ಮಟ್ಟದ ಕ್ರೀಡಾಪಟುಗಳಿದ್ದಾರೆ. 10 ವರ್ಷದ ಹಿಂದೆ ಕ್ರೀಡಾಪಟುಗಳು ನೆಹರೂ ಮೈದಾನದಲ್ಲಿ ಅಭ್ಯಾಸ ಮಾಡುತ್ತಿದ್ದರು. ಜನಸಂಖ್ಯೆ ಹೆಚ್ಚಿದ ಕಾರಣ ಹುಳಿಯಾರು ರಸ್ತೆಯ ಕ್ರೀಡಾಂಗಣಕ್ಕೆ ಹೋಗುವುದು ಅನಿವಾರ್ಯ ಆಗಿತ್ತು. ಆದರೆ ಇಲ್ಲಿನ ಅವ್ಯವಸ್ಥೆ ಕ್ರೀಡಾಪಟುಗಳಿಗೆ ಬೇಸರ ತರಿಸಿದೆ.
ಸಿಗುತ್ತಿಲ್ಲ 6 ಎಕರೆ ಸರ್ಕಾರಿ ಜಾಗ
ಮೊಳಕಾಲ್ಮುರು: ತಾಲ್ಲೂಕಿನಲ್ಲಿ ಕ್ರೀಡಾಂಗಣ ಇಲ್ಲದಿರುವುದು ಕ್ರೀಡಾಪಟುಗಳ ಭವಿಷ್ಯಕ್ಕೆ ತೊಂದರೆಯಾಗಿದೆ. ಶಾಲೆಗಳ ಆವರಣ ಹೊರತುಪಡಿಸಿ ಎಲ್ಲಿಯೂ ವ್ಯವಸ್ಥಿತ ಮೈದಾನ ಇಲ್ಲ. ಮೊಳಕಾಲ್ಮುರಿನ ಸರ್ಕಾರಿ ಪಿಯು ಕಾಲೇಜಿಗೆ ಹೊಂದಿಕೊಂಡ ಸ್ಥಳದಲ್ಲಿ ಕ್ರೀಡಾಂಗಣ ನಿರ್ಮಿಸಬೇಕು ಎಂಬ ಬೇಡಿಕೆ ಹಲವು ವರ್ಷಗಳಿಂದ ಇದೆ. ‘ಬಿ. ಶ್ರೀರಾಮುಲು ಶಾಸಕರಾಗಿದ್ದ ವೇಳೆ ಕೇಂದ್ರ ಸರ್ಕಾರದ ನಿಯೋಗ ಪ್ರಧಾನಮಂತ್ರಿ ಖೇಲ್‌ ಯೋಜನೆಯಡಿ ಕ್ರೀಡಾಂಗಣ ನಿರ್ಮಾಣದ ಸಾಧಕ- ಬಾಧಕ ಪರಿಶೀಲಿಸಿತು. ಈ ಯೋಜನೆಯಲ್ಲಿ ಕನಿಷ್ಠ 6 ಎಕರೆ ಸ್ಥಳವಿರಬೇಕು ಎಂಬ ನಿಯಮವಿರುವ ಪರಿಣಾಮ ತಿರಸ್ಕಾರವಾಯಿತು. 6 ಎಕರೆ ಸರ್ಕಾರಿ ಜಾಗ ಗುರುತಿಸಿದಲ್ಲಿ ಖೇಲ್‌ ಯೋಜನೆಯಡಿ ಕ್ರೀಡಾಂಗಣ ನಿರ್ಮಿಸಲು ಅವಕಾಶವಿದ್ದು ಈ ಬಗ್ಗೆ ತಾಲ್ಲೂಕು ಆಡಳಿತ ಗಮನ ನೀಡಬೇಕಿದೆ’ ಎನ್ನುತ್ತಾರೆ ಬಿಜೆಪಿ ಮಂಡಲಾಧ್ಯಕ್ಷ ಪಿ.ಎಂ. ಮಂಜುನಾಥ್‌.
ಕ್ರೀಡಾಂಗಣ ನಿರ್ಮಾಣ ನನೆಗುದಿಗೆ
ಹೊಳಲ್ಕೆರೆ: ಪಟ್ಟಣದ ಎಂ.ಎಂ. ಶಾಲೆ ಹಿಂಭಾಗದಲ್ಲಿ ನಡೆಯುತ್ತಿರುವ ತಾಲ್ಲೂಕು ಕ್ರೀಡಾಂಗಣದ ನಿರ್ಮಾಣ ಕಾರ್ಯ ಹಲವು ವರ್ಷಗಳಿಂದ ನನೆಗುದಿಗೆ ಬಿದ್ದಿದೆ. ಗ್ಯಾಲರಿ ಸಭಾಂಗಣ ನಿರ್ಮಿಸಲಾಗಿದೆ. ಗ್ಯಾಲರಿಗೆ ರೂಫಿಂಗ್ ಅಳವಡಿಸಿ ಟ್ರ್ಯಾಕ್‌ಗಳನ್ನು ನಿರ್ಮಿಸಬೇಕಿದೆ. ಈಜುಗೊಳ ನಿರ್ಮಾಣಕ್ಕೂ ಟೆಂಡರ್ ಕರೆಯಲಾಗಿದ್ದು ಕಾಮಗಾರಿ ಆರಂಭವಾಗಬೇಕಿದೆ. ಕಾಮಗಾರಿ ಪೂರ್ಣಗೊಳ್ಳದ ಕಾರಣ ಕ್ರೀಡಾಪಟುಗಳಿಗೆ ತೊಂದರೆ ಆಗಿದೆ. ಮಳೆ ಬಂದರೆ ಕ್ರೀಡಾಂಗಣದಲ್ಲಿ ಕೆಸರು ತುಂಬಿಕೊಳ್ಳಲಿದ್ದು ಆಟ ಆಡುವುದು ಕಷ್ಟವಾಗಿದೆ. ರಾಷ್ಟ್ರೀಯ ಹಬ್ಬಗಳನ್ನು ಕೊಟ್ರೆ ನಂಜಪ್ಪ ಕಾಲೇಜು ಮೈದಾನದಲ್ಲಿ ಆಚರಿಸಲಾಗುತ್ತಿದೆ. ಶೀಘ್ರ ಕಾಮಗಾರಿ ಪೂರ್ಣಗೊಳಿಸಿ ಕನ್ನಡ ರಾಜ್ಯೋತ್ಸವವನ್ನು ಹೊಸ ಕ್ರೀಡಾಂಗಣದಲ್ಲಿಯೇ ಆಚರಿಸುವಂತಾಗಲಿ ಎಂಬುದು ಕ್ರೀಡಾಪಟುಗಳ ಒತ್ತಾಯ.
ಕ್ರೀಡಾಕೂಟ ನಡೆಸಲು ಇಲ್ಲ ಸೌಲಭ್ಯ
ಹೊಸದುರ್ಗ: 8 ಎಕರೆಯಲ್ಲಿ ನಿರ್ಮಿಸಿದ್ದ ತಾಲ್ಲೂಕು ಕ್ರೀಡಾಂಗಣ ಇದೀಗ ಮೂಲಸೌಲಭ್ಯದ ಜತೆಗೆ ನಿರ್ವಹಣೆ ಕೊರತೆ ಎದುರಿಸುತ್ತಿದೆ. ಒಳಾಂಗಣ ಕ್ರೀಡಾಂಗಣ ಆರಂಭವಾದಗಿಂದಲೂ ಬಣ್ಣ ಕಂಡಿಲ್ಲ. ಗೋಡೆಗಳು ಬಿರುಕು ಬಿಟ್ಟಿದ್ದು ಹಳೆಯ ಕಟ್ಟಡದಂತಾಗಿವೆ. ತಾಲ್ಲೂಕು ಹೋಬಳಿ ಮಟ್ಟದ ಕ್ರೀಡಾಕೂಟ ನಡೆಸಲು ಸೌಲಭ್ಯವಿಲ್ಲದಂತಾಗಿದೆ. ‘200 ಮೀಟರ್‌ ಸಿಂಥೆಟಿಕ್‌ ಟ್ರ್ಯಾಕ್‌ ಕಿತ್ತು ಹೋಗಿದ್ದು ಮಳೆ ಬಂದರೆ ನೀರು ತುಂಬಿರುತ್ತದೆ. ಕುಡಿಯುವ ನೀರು ವಿದ್ಯುತ್ ಶೌಚಾಲಯ ಸೇರಿದಂತೆ ಮೂಲ ಸೌಕರ್ಯಗಳಿಲ್ಲ. ಪ್ರತ್ಯೇಕ ಜಿಮ್‌ ಕಟ್ಟಡ ಕ್ರೀಡಾ ಸಾಮಗ್ರಿಗಳ ವಿತರಣೆ ಆಗಬೇಕು. ಹೈಟೆಕ್‌ ಶೌಚಾಲಯ ನಿರ್ಮಿಸಿ ಒಂದು ವರ್ಷವಾದರೂ ಬಳಕೆಗೆ ಅವಕಾಶವಿಲ್ಲ’ ಎನ್ನುತ್ತಾರೆ ಕ್ರೀಡಾಪಟು ಚಂದ್ರಶೇಖರ್‌.
24 ವರ್ಷದ ಹಿಂದೆಯೇ ಜಮೀನು ಮೀಸಲು
ನಾಯಕನಹಟ್ಟಿ: ಹೋಬಳಿ ಕೇಂದ್ರ ಸ್ಥಾನ ನಾಯಕನಹಟ್ಟಿಯಲ್ಲಿ ಕ್ರೀಡಾಂಗಣ ನಿರ್ಮಾಣಕ್ಕೆ 24 ವರ್ಷದ ಹಿಂದೆಯೇ 3 ಎಕರೆ ಜಮೀನು ಮೀಸಲಿಡಲಾಗಿದ್ದು ಯಾವುದೂ ಕಾರ್ಯರೂಪಕ್ಕೆ ಬಂದಿಲ್ಲ. 1997-98ರಲ್ಲಿ ಅಂದಿನ ಗ್ರಾಮ ಪಂಚಾಯಿತಿ ಆಡಳಿತ ಕ್ರೀಡಾಂಗಣಕ್ಕೆ ಜಾಗ ಮೀಸಲಿರಿಸಲು ಕಂದಾಯ ಇಲಾಖೆಗೆ ಮನವಿ ಮಾಡಿತ್ತು. ಕಂದಾಯ ಇಲಾಖೆ ಪಟ್ಟಣದ ಸರ್ವೆ ನಂ. 194ರಲ್ಲಿದ್ದ 24 ಎಕರೆ ಗೋಮಾಳದಲ್ಲಿ 3 ಎಕರೆ ಪ್ರದೇಶವನ್ನು ಕ್ರೀಡಾಂಗಣ ನಿರ್ಮಾಣಕ್ಕೆ ನೀಡಿ ಆದೇಶಿಸಿತ್ತು. ಅಂದಿನಿಂದ ಈವರೆಗೂ ಕ್ರೀಡಾಂಗಣ ಕ್ರೀಡಾ ಚಟುವಟಿಕೆ ನಡೆಯುತ್ತಿಲ್ಲ. ಅಧಿಕಾರಿಗಳು ಜನಪ್ರತಿನಿಧಿಗಳು ಕ್ರೀಡಾಂಗಣ ನಿರ್ಮಾಣದ ವಿಷಯದಲ್ಲಿ ಆಸಕ್ತಿ ತೋರಿಸುತ್ತಿಲ್ಲ. ಪಟ್ಟಣದ ಎಸ್‌ಟಿಎಸ್‌ಆರ್ ವಿದ್ಯಾಸಂಸ್ಥೆ ಆವರಣ ಸದ್ಯಕ್ಕೆ ಕ್ರೀಡಾಂಗಣವಾಗಿದೆ. ಶಾಲಾ ಕ್ರೀಡಾಕೂಟಗಳು ಇದೇ ಆವರಣದಲ್ಲಿ ನಡೆಯುತ್ತಿವೆ.
