ನಾಯಕನಹಟ್ಟಿ: ಚಿಕ್ಕಕೆರೆ ಸುತ್ತ ಘನತ್ಯಾಜ್ಯದ್ದೇ ಕಾರುಬಾರು

ನಾಯಕನಹಟ್ಟಿ: ಪಟ್ಟಣಕ್ಕೆ ಹೊಂದಿಕೊಂಡಿರುವ ಜಿಲ್ಲೆಯ ಐತಿಹಾಸಿಕ ನಾಯಕನಹಟ್ಟಿ ಗುರುತಿಪ್ಪೇರುದ್ರಸ್ವಾಮಿ ಚಿಕ್ಕಕೆರೆಯ ಸುತ್ತ ತ್ಯಾಜ್ಯದ ರಾಶಿ ಬಿದ್ದಿದೆ. ಕಟ್ಟಡಗಳ ತ್ಯಾಜ್ಯವನ್ನು ಸುರಿಯುತ್ತಿರುವುದರಿಂದ ಕೆರೆ ಪರಿಸರ ಹಾಳಾಗುತ್ತಿದೆ.

16ನೇ ಶತಮಾನದಲ್ಲಿ ಕಾಯಕಯೋಗಿ ಗುರು ತಿಪ್ಪೇರುದ್ರಸ್ವಾಮಿ ಅವರು ನಾಯಕನಹಟ್ಟಿ ಹೋಬಳಿಯಲ್ಲಿ ಐದು ಕೆರೆಗಳನ್ನು ನಿರ್ಮಿಸಿದ್ದಾರೆ ಎನ್ನುವ ಪ್ರತೀತಿ ಇದೆ. ಅದರಲ್ಲಿ ಚಿಕ್ಕಕೆರೆಯೂ ಒಂದು. ಈ ಕೆರೆಯ ಬಗ್ಗೆ ಜನರಿಗೆ ಭಕ್ತಿ ಇದೆ. ಕೆರೆಯ ಮುಂಭಾಗದಲ್ಲೇ ತಿಪ್ಪೇರುದ್ರಸ್ವಾಮಿ ಅವರ ಹೊರಮಠವಿದೆ. ತ್ಯಾಜ್ಯ ಎಸೆಯುತ್ತಿರುವುದಕ್ಕೆ ಸ್ಥಳೀಯರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ತ್ಯಾಜ್ಯ ಸಂಗ್ರಹಕ್ಕಾಗಿ ಕೆರೆ ಬಳಕೆ:

ಪಟ್ಟಣದ ಬಾರ್‌ಗಳಲ್ಲಿನ ಪೌಚ್‌ಗಳು, ಬಾಟಲಿಗಳು, ಕ್ಷೌರಮಾಡಿದ ಕೂದಲು, ಕಟ್ಟಡದ ಅವಶೇಷಗಳು ಸೇರಿದಂತೆ ಹಲವು ತ್ಯಾಜ್ಯವನ್ನು ಕೆರೆಯ ದಂಡೆಗೆ ಹಾಕಲಾಗುತ್ತಿದೆ. ಇದರಿಂದ ಕೆರೆ ಪರಿಸರ ಹಾಳಾಗುತ್ತಿದೆ. ಈ ಬಗ್ಗೆ ಪಟ್ಟಣ ಪಂಚಾಯಿತಿಯ ಎಚ್ಚರಿಕೆಯ ನಾಮಫಲಕ ಅಳವಡಿಸಿದರೂ ಯಾವುದೇ ಪ್ರಯೋಜನವಾಗಿಲ್ಲ.

ಸೀಮೆಜಾಲಿ ಗಿಡಗಳ ಹಾವಳಿ:‌

ಚಿಕ್ಕಕೆರೆಯು 389.19ಎಕರೆ ವಿಸ್ತೀರ್ಣ ಹೊಂದಿದೆ. ಇಷ್ಟು ದೊಡ್ಡಕೆರೆಯಲ್ಲಿ ನೀರು ಸಂಗ್ರಹವಾದರೆ ನಾಯಕನಹಟ್ಟಿ ಹೋಬಳಿಯ 20ಕ್ಕೂ ಹೆಚ್ಚು ಗ್ರಾಮಗಳ ಅಂತರ್ಜಲ ವೃದ್ಧಿಯಾಗುತ್ತದೆ. 10 ವರ್ಷಗಳಿಂದ ಚಿಕ್ಕಕೆರೆಗೆ ಮಳೆಯ ಕೊರತೆಯಿಂದ ನೀರು ಬಂದಿಲ್ಲ. ಇದರಿಂದ ಸೀಮೆಜಾಲಿಗಿಡಗಳು ಬೆಳೆದಿವೆ.

ಮೂರ‍್ನಾಲ್ಕು ದಿನಗಳಿಂದ ಪಟ್ಟಣದ ಬಿಳೇಕಲ್ ಬಡಾವಣೆ ಸೇರಿದಂತೆ ಹಲವು ಕಡೆಗಳಲ್ಲಿ ಪಟ್ಟಣ ಪಂಚಾಯಿತಿ ನಗರೋತ್ಥಾನ ಯೋಜನೆಯ ಅಡಿಯಲ್ಲಿ ₹ 50ಲಕ್ಷ ವೆಚ್ಚದ ಚರಂಡಿ ಕಾಮಗಾರಿ ನಡೆಯುತ್ತಿದ್ದು, ಚರಂಡಿ ತೆಗೆಯುವ ಮತ್ತು ಅದರಿಂದ ಉತ್ಪಾದನೆಯಾಗುವ ಘನ ತ್ಯಾಜ್ಯವನ್ನು ಕಾಮಗಾರಿ ಪಡೆದ ಗುತ್ತಿಗೆದಾರರು ಇಲ್ಲಿಗೆ ತಂದು ಹಾಕುತ್ತಿದ್ದಾರೆ. ಆದರೂ ಅಧಿಕಾರಿಗಳು ಕ್ರಮ ಕೈಗೊಳ್ಳುತ್ತಿಲ್ಲ ಎಂದು ಸ್ಥಳೀಯರು ದೂರಿದ್ದಾರೆ.