ಚಿತ್ರದುರ್ಗ: ಇಲಿ, ಹೆಗ್ಗಣಗಳ ಆಶ್ರಯತಾಣವಾದ ವಾಲ್ಮೀಕಿ ಭವನ

ಚಿತ್ರದುರ್ಗ: ನಗರದ ಹೃದಯಭಾಗ ಮದಕರಿ ವೃತ್ತದಲ್ಲಿ ಮುಗಿಲೆತ್ತರಕ್ಕೆ ಬೆಳೆದಂತೆ, ಹೈಟೆಕ್‌ ಮಾಲ್‌ನಂತೆ ಕಾಣುವ ಮಹರ್ಷಿ ವಾಲ್ಮೀಕಿ ಭವನ ನೋಡುಗರ ಗಮನ ಸೆಳೆಯುತ್ತದೆ. ಆದರೆ, ಕಟ್ಟಡದ ಕಾಂಪೌಂಡ್‌ ಪ್ರವೇಶಿಸಿದರೆ ಅಲ್ಲಿಯ ದುಃಸ್ಥಿತಿಯ ದರ್ಶನವಾಗುತ್ತದೆ. ಇಲಿ, ಹೆಗ್ಗಣಗಳ ಆಶ್ರಯತಾಣವಾಗಿರುವ ಭವನ ಕಳೆದೊಂದು ವರ್ಷದಿಂದ ಪಾಳು ಬಂಗಲೆಯಾಗಿದೆ.

ಪರಿಶಿಷ್ಟ ವರ್ಗಗಳ ಅಸ್ಮಿತೆಯಾಗಬೇಕಾಗಿದ್ದ ವಾಲ್ಮೀಕಿ ಭವನದ ಸ್ಥಿತಿ ‘ಹೊರಗೆ ತಳಕು, ಒಳಗೆ ಹುಳುಕು’ ಎಂಬಂತಿದೆ. ಪರಿಶಿಷ್ಟ ವರ್ಗಗಳ ಕಲ್ಯಾಣ ಇಲಾಖೆ, ವಾಲ್ಮೀಕಿ ಅಭಿವೃದ್ಧಿ ನಿಗಮದಿಂದ ₹10 ಕೋಟಿ ವೆಚ್ಚದಲ್ಲಿ ನಿರ್ಮಾಣಗೊಂಡಿರುವ ವಾಲ್ಮೀಕಿ ಭವನ ಉದ್ಘಾಟನೆಯಾಗಿ ಒಂದೂವರೆ ವರ್ಷ ಕಳೆದಿದೆ. ಉದ್ಘಾಟನೆ ದಿನದಿಂದ ಇಲ್ಲಿಯವರೆಗೂ ಭವನ ಬೀಗ ಹಾಕಿದ ಸ್ಥಿತಿಯಲ್ಲೇ ಇದೆ.

ಕಾಂಗ್ರೆಸ್‌ ಸರ್ಕಾರವಿದ್ದ 2017ರಲ್ಲಿ ವಾಲ್ಮೀಕಿ ಭವನದ ಕಾಮಗಾರಿ ಆರಂಭವಾಗಿತ್ತು. ಕುಂಟುತ್ತಲೇ ಸಾಗುತ್ತಿದ್ದ ಕಾಮಗಾರಿ 2023ರವರೆಗೂ ಪೂರ್ಣಗೊಳ್ಳಲಿಲ್ಲ. ವಿಧಾನಸಭಾ ಚುನಾವಣೆ ಹೊಸ್ತಿಲಲ್ಲಿದ್ದಾಗ ಆಗಿನ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಅವರು ತರಾತುರಿಯಲ್ಲಿ ಅಪೂರ್ಣ ಕಟ್ಟಡವನ್ನೇ ಉದ್ಘಾಟನೆ ಮಾಡಿದರು. ಸಮಾಜದ ಮುಖಂಡರು, ಸ್ಥಳೀಯ ಜನಪ್ರತಿನಿಧಿಗಳಿಗೂ ಮಾಹಿತಿ ನೀಡಿದೇ ಅಧಿಕಾರಿಗಳ ಸಮ್ಮುಖದಲ್ಲೇ ಉದ್ಘಾಟನೆ ನೆರವೇರಿಸಲಾಗಿತ್ತು.

‘ಇನ್ನೂ ಶೇ 30ರಷ್ಟು ಕಾಮಗಾರಿ ಬಾಕಿ ಉಳಿದಿದ್ದು ಇಲ್ಲಿಯವರೆಗೂ ಕೆಲಸವಾಗಿಲ್ಲ. ಭವನದ ಮುಖ್ಯದ್ವಾರ, ಗೇಟ್‌ ಬಂದ್ ಆಗಿದ್ದು, ಭವನವನ್ನು ನಿರ್ವಹಣೆ ಮಾಡುತ್ತಿಲ್ಲ. ನಿರ್ವಹಣಾ ಸಮಿತಿಯನ್ನೂ ಮಾಡಿಲ್ಲ. ಪ್ರಶ್ನೆ ಮಾಡಿದವರಿಗೆ ಕುಂಟುನೆಪ ಹೇಳುತ್ತಿರುವ ಅಧಿಕಾರಿಗಳೂ ಕೋಟ್ಯಂತರ ರೂಪಾಯಿ ಹಣ ಅವ್ಯವಹಾರ ನಡೆಸಿದ್ದಾರೆ. ಈ ಬಗ್ಗೆ ಸಮಗ್ರ ತನಿಖೆಯಾಗಬೇಕು’ ಎಂದು ಸಮಾಜದ ಮುಖಂಡರು ಒತ್ತಾಯಿಸುತ್ತಾರೆ.

‘ಜಿಲ್ಲೆಯ ಅಧಿಕಾರಿಗಳೇ ಇಲಿ, ಹೆಗ್ಗಣಗಳಾಗಿದ್ದು ಹಣವನ್ನು ಲೂಟಿ ಹೊಡೆದಿದ್ದಾರೆ. ಸಿನಿಮಾ ಥಿಯೇಟರ್‌ನಂತೆ ಕಾಮಗಾರಿ ಮಾಡಿ ಕಟ್ಟಡವನ್ನು ಹಾಳು ಮಾಡಿದ್ದಾರೆ. ನಾವು ಈ ಬಗ್ಗೆ ಮೊದಲೇ ಧ್ವನಿ ಎತ್ತಿದ್ದೆವು. ಆದರೂ ಅಧಿಕಾರಿಗಳು ನಮ್ಮ ಆಕ್ಷೇಪಕ್ಕೆ ಕಿವಿಗೊಡಲಿಲ್ಲ’ ಎಂದು ಮಾನವ ಬಂಧುತ್ವ ವೇದಿಕೆಯ ಮುಖಂಡ ಆಂಜಿನಪ್ಪ ಆರೋಪಿಸಿದರು.

200X 100 ಅಳತೆಯ ಜಾಗದಲ್ಲಿ ವಾಲ್ಮೀಕಿ ಭವನ ನಿರ್ಮಾಣವಾಗಿದ್ದು ಜಿಲ್ಲೆಯಲ್ಲಿ ಬೃಹತ್‌ ಸಭಾಂಗಣ, ಸಾಂಸ್ಕೃತಿಕ ತಾಣವಾಗುವ ಕನಸು ಹೊಂದಲಾಗಿತ್ತು. ಹಳೆಯ ನಗರಸಭೆ ಕಟ್ಟಡ ತೆರವುಗೊಳಿಸಿ ವಾಲ್ಮೀಕಿ ಭವನದ ಯೋಜನೆ ರೂಪಿಸಲಾಗಿತ್ತು. ಬೆಂಗಳೂರಿನ ಕಂಪನಿಯೊಂದಕ್ಕೆ ನಿರ್ಮಾಣ ಜವಾಬ್ದಾರಿ ನೀಡಲಾಗಿತ್ತು. ಆದರೆ ಕಾಮಗಾರಿ ಅಪೂರ್ಣಗೊಂಡಿದ್ದು ಗುತ್ತಿಗೆದಾರರು ಕಾಲ್ಕಿತ್ತಿದ್ದಾರೆ. ವಿಧಾನಸಭಾ ಚುನಾವಣೆ ವೇಳೆ ಸ್ಥಗಿತಗೊಂಡಿದ್ದ ಕಾಮಗಾರಿ ಈವರೆಗೂ ಆರಂಭವಾಗಿಲ್ಲ.

ಬೀಗ ಹಾಕಿರುವ ಕಾರಣ ಸುತ್ತಲೂ ಇಲಿ, ಹೆಗ್ಗಣ, ಹಾವು, ಹಲ್ಲಿಗಳು ಓಡಾಡುತ್ತಿವೆ. ಪ್ರವೇಶ ದ್ವಾರದಲ್ಲೇ ಚರಂಡಿಗಳು ದುರ್ವಾಸನೆ ಬೀರುತ್ತಿದ್ದು ಅಲ್ಲಿ ಜನರು ಮೂಗು ಮುಚ್ಚಿ ಓಡಾಡಬೇಕಾದ ಪರಿಸ್ಥಿತಿ ಇದೆ. ನಗರಸಭೆ ಕಚೇರಿ ಪಕ್ಕದಲ್ಲೇ ಇದ್ದರೂ ಭವನದ ಸುತ್ತಲೂ ಸ್ವಚ್ಛತೆ ಇಲ್ಲದಿರುವುದಕ್ಕೆ ಸಾರ್ವಜನಿಕರು ಆಶ್ರೋಕ ವ್ಯಕ್ತಪಡಿಸುತ್ತಾರೆ.

‘ಭವನದ ಊಟದ ಹಾಲ್‌ ಕಾಮಗಾರಿ ಸರಿಯಾಗಿಲ್ಲ. ಇಲ್ಲಿಯವರೆಗೂ ಭವನಕ್ಕೆ ನೀರಿನ ಸಂಪರ್ಕ ಕಲ್ಪಿಸಿಲ್ಲ. ಶೌಚಾಲಯಗಳಿಂದ ಯುಜಿಡಿಗೆ ಸಂಪರ್ಕವೂ ಇಲ್ಲ. ಯಾವುದೇ ಯೋಜನೆ ಇಲ್ಲದೇ ಕೇವಲ ಗೋಡೆಗಳನ್ನಷ್ಟೇ ಕಟ್ಟಿದ್ದಾರೆ. ಭವನಕ್ಕೆ ಸಾಂಸ್ಕೃತಿಕವಾದ ರೂಪ ಕೊಟ್ಟಿಲ್ಲ, ಬೀಮ್‌, ಆಸನಗಳ ಅಳವಡಿಕೆಯೂ ಅವೈಜ್ಞಾನಿಕವಾಗಿದೆ’ ಎಂದು ಮುಖಂಡರೊಬ್ಬರು ಆರೋಪಿಸಿದರು.