‘ಅನಂತ್‌ಕುಮಾರ್‌ ಹೆಗಡೆ ಪಂಚಾಯತ್‌ ಸದಸ್ಯರಾಗಲೂ ಯೋಗ್ಯರಲ್ಲ’; ಎಂ.ಬಿ.ಪಾಟೀಲ

ಮಂಗಳೂರು: ‘ಪ್ರಚಾರದಲ್ಲಿ ಇರುವುದಕ್ಕಾಗಿಯೇ ಸದಾ ವಿವಾದಾತ್ಮಕ ಹೇಳಿಕೆ ನೀಡುವ ಕೇಂದ್ರ ಸಚಿವ ಅನಂತಕುಮಾರ್ ಹೆಗಡೆಪಂಚಾಯತ್‌ ಸದಸ್ಯರಾಗುವುದಕ್ಕೂ ಯೋಗ್ಯರಲ್ಲ’ ಎಂದು ಗೃಹ ಸಚಿವ ಎಂ.ಬಿ.ಪಾಟೀಲ ವಾಗ್ದಾಳಿ ನಡೆಸಿದರು.

‘ಹಿಂದೂ ಯುವತಿಯರನ್ನು ಸ್ಪರ್ಶಿಸುವ ಇತರೆ ಧರ್ಮದವರ ಕೈ ಕತ್ತರಿಸಿ’ ಎಂಬ ಅನಂತಕುಮಾರ್‌ ಹೆಗಡೆ ಹೇಳಿಕೆಗೆ ನಗರದಲ್ಲಿ ಸೋಮವಾರ ಪ್ರತಿಕ್ರಿಯಿಸಿದ ಗೃಹ ಸಚಿವರು, ‘ಕೋಮು ಘರ್ಷಣೆ ಸೃಷ್ಟಿಸುವುದಕ್ಕಾಗಿಯೇ ಅವರು ಇಂತಹ ಹೇಳಿಕೆ ಕೊಟ್ಟಿದ್ದಾರೆ. ಅವರ ಬಗ್ಗೆ ಮಾತನಾಡುವುದೇ ತಪ್ಪು ಅನಿಸುತ್ತದೆ’ ಎಂದರು.

ಇದನ್ನೂ ಓದಿ:ಮುಸ್ಲಿಂ ಹೆಂಗಸಿನ ಹಿಂದೆ ಓಡಿ ಹೋದವನು; ದಿನೇಶ್‌ ಬಗ್ಗೆ ಅನಂತಕುಮಾರ ಹೆಗಡೆ ಟ್ವೀಟ್‌

ಅವರಿಗೆ ಸಂಸತ್ತು ಮತ್ತು ಸಂವಿಧಾನದ ಮೇಲೆ ಗೌರವ ಇಲ್ಲ. ಸಂವಿಧಾನವನ್ನೇ ಬದಲಾಯಿಸಲು ಹೊರಟ ಸಂಸದ ಅವರು. ಇಂತಹ ಹೇಳಿಕೆ ಅವರಿಗೆ ಶೋಭೆ ತರುವುದಿಲ್ಲ. ಇಂತಹವರಿಗೆ ಲೋಕಸಭಾ ಚುನಾವಣೆಯಲ್ಲಿ ಜನರು ಸರಿಯಾದ ಉತ್ತರ ನೀಡುತ್ತಾರೆ’ ಎಂದು ಹೇಳಿದರು.

ಅನಂತಕುಮಾರ್ ಹೆಗ್ಡೆ ಸಂಸತ್ತಿನಲ್ಲಿ ಇರಲು ಯೋಗ್ಯರಲ್ಲ. ಇಂತಹವರು ಪಂಚಾಯಿತಿ ಸದಸ್ಯರಾಗುವುದಕ್ಕೂ ಯೋಗ್ಯರಲ್ಲ ಎಂದು ವಾಗ್ದಾಳಿ ನಡೆಸಿದರು.