ಕೊಂಕಣಿ ಸಾಹಿತ್ಯ ಮಥನಕ್ಕೆ ‘ಬೊಲ್ಕಾಂವ್’

ಮಂಗಳೂರು: ಕೊಂಕಣಿ ಸಾಹಿತ್ಯದ ಚರ್ಚೆ ಮತ್ತು ಸಾಹಿತಿಗಳ ಪರಿಚಯಕ್ಕೆ ನಗರದ ಸೇಂಟ್ ಅಲೋಶಿಯಸ್ ಕಾಲೇಜು ಆವರಣದಲ್ಲಿ ‘ಬೊಲ್ಕಾಂವ್‌’ ಹೆಸರಿನ ಹೊಸ ಚಾವಡಿ ಸಿದ್ಧವಾಗಿದ್ದು, ಸಾಹಿತ್ಯ ಸರಣಿ ತೆರೆದುಕೊಳ್ಳಲಿದೆ.

ನಾಲ್ಕು ದಶಕಗಳಿಂದ ನಗರದಲ್ಲಿ ಕಾರ್ಯಾಚರಿಸುತ್ತಿರುವ ‘ಕೊಂಕಣಿ ಸಂಸ್ಥೆ’ಯ ಕೆಲವರು ಇದನ್ನು ಆರಂಭಿಸಿದ್ದಾರೆ. ತಿಂಗಳಿಗೆ ಕನಿಷ್ಠ ಒಂದು ಸಾಹಿತ್ಯ ಕಾರ್ಯಕ್ರಮಕ್ಕೆ ಇದು ಸಾಕ್ಷಿಯಾಗಲಿದೆ. ಮೆಲ್ವಿನ್ ಪಿಂಟೊ ನೀರುಡೆ ಅವರ ‘ಪೊಯ್ಣ್‌’ (ಪಯಣ) ಕಥಾಸಂಕಲನದ ನಾಲ್ಕು ಕಥೆಗಳ ಕೆಲವು ಭಾಗಗಳನ್ನು ಓದಿ ಚರ್ಚಿಸುವ ಮೂಲಕ ಇದೇ ಏಳರಂದು ಯೋಜನೆ ಆರಂಭಗೊಳ್ಳಲಿದೆ. ‘ಸಣ್ಣ ಕಥೆ ಮತ್ತು ನಾನು’ ಎಂಬುದು ಮೊದಲ ಕಾರ್ಯಕ್ರಮದ ಶೀರ್ಷಿಕೆ.

‘ಬೊಲ್ಕಾಂವ್ ಎಂದರೆ ಬಾಲ್ಕನಿ. ಕೊಂಕಣಿ ಸಂಸ್ಥೆಯ ಒಂದು ಭಾಗದಲ್ಲಿ ಇಂಥದೊಂದು ವ್ಯವಸ್ಥೆ ಇದೆ. ಅದನ್ನು ಬಳಸಿಕೊಂಡು ಸಾಹಿತ್ಯದ ಮಥನ ನಡೆಯಲಿದೆ. ಕೆಲವು ವರ್ಷಗಳ ಆಲೋಚನೆ ಈಗ ಯೋಜನೆಯಾಗಿ ಕಾರ್ಯಗತೊಂಡಿದೆ’ ಎಂದು ತಂಡದ ಟೈಟಸ್ ನೊರೋನ್ಹ ತಿಳಿಸಿದರು.

‘ಇಲ್ಲಿ ಸಾಂಪ್ರದಾಯಿಕ ಶೈಲಿಯ ಕಾರ್ಯಕ್ರಮಗಳು ನಡೆಯುವುದಿಲ್ಲ. ಅನೌಪಚಾರಿಕವಾಗಿ ಎಲ್ಲರೂ ಸೇರುತ್ತಾರೆ. ಆ ದಿನಕ್ಕೆ ನಿಗದಿಯಾದ ಸಾಹಿತಿ ತನ್ನ ಕೃತಿಯ ಬಗ್ಗೆ ಮತ್ತು ಸಾಹಿತ್ಯ ಯಾತ್ರೆಯ ಬಗ್ಗೆ ವಿವರಿಸುತ್ತಾರೆ. ಆನಂತರ ಚರ್ಚೆ ನಡೆಯುತ್ತದೆ. ಕವಿತೆ, ಸಣ್ಣಕತೆ, ಕಾದಂಬರಿ, ಪ್ರಬಂಧ, ಅನುವಾದ, ನಾಟಕ ಮುಂತಾಗಿ ಸಾಹಿತ್ಯದ ವಿವಿಧ ಪ್ರಕಾರಗಳಲ್ಲಿ ಕೃಷಿ ಮಾಡಿದವರಿಗೆ ಕೃತಿ ಮತ್ತು ಅನುಭವ ಪ್ರಸ್ತುತಪಡಿಸಲು ಇಲ್ಲಿ ಮುಕ್ತ ಅವಕಾಶ ಸಿಗಲಿದೆ’ ಎಂದು ಬೊಲ್ಕಾಂವ್ ತಂಡದ ಪ್ರಮುಖ ಎಚ್‌.ಎಂ.ಪೆರ್ನಾಲ್‌ ವಿವರಿಸಿದರು. 

‘ಪ್ರತಿ ಕಾರ್ಯಕ್ರಮ ಒಂದು ತಾಸು ಇರುತ್ತದೆ. ಅರ್ಧತಾಸು ಪ್ರಸ್ತುತಿ, ಅರ್ಧ ತಾಸು ಚರ್ಚೆ ನಡೆಯಲಿದೆ. ಕೊಂಕಣಿಗೆ ಸಂಬಂಧಿಸಿದ ಸಿಲೆಬ್ರೆಟಿಗಳು ನಗರಕ್ಕೆ ಬಂದರೆ ಅವರನ್ನು ಕರೆದು ಮಾತನಾಡಿಸುವ ಯೋಜನೆಯೂ ಇದೆ’ ಎಂದು ಅವರು ತಿಳಿಸಿದರು.