ಮಂಗಳೂರು | ಕಾರು ಡಿಕ್ಕಿ: ಮಹಿಳೆ ಸಾವು

ಮಂಗಳೂರು: ನಗರದ ಪದವಿನಂಗಡಿ ಜಂಕ್ಷನ್‌ನಲ್ಲಿ ಕಾರು ಡಿಕ್ಕಿ ಹೊಡೆದು ಮಹಿಳೆಯೊಬ್ಬರು ಮಂಗಳವಾರ ಮೃತಪಟ್ಟಿದ್ದಾರೆ.

ಮೃತರನ್ನು ಜಯಶೀಲ (78) ಎಂದು ಗುರುತಿಸಲಾಗಿದೆ.

‘ಕಿರಣ್ ತನ್ನ ಕಾರನ್ನು ರಸ್ತೆ ಪಕ್ಕದಲ್ಲಿ ನಿಲ್ಲಿಸಿದ್ದ ಆಲ್ಬರ್ಟ್ ವಿಲ್ಫ್ರೆಡ್ ಡಯಾಸ್‌ ಅವರ ಕಾರಿನ ಹಿಂಭಾಗಕ್ಕೆ ಡಿಕ್ಕಿ ಹೊಡೆಸಿದ್ದ. ಆ ಬಳಿಕ, ಆ ಕಾರಿನ ಎಡಭಾಗದಲ್ಲಿ ತನ್ನ ಕಾರನ್ನು ಚಲಾಯಿಸಿ, ರಸ್ತೆ ಬದಿ ನಿಂತಿದ್ದ ಜಯಶೀಲ ಅವರಿಗೆ ಡಿಕ್ಕಿ ಹೊಡೆದಿದ್ದ. ಗಂಭೀರವಾಗಿ ಗಾಯಗೊಂಡಿದ್ದ ಅವರನ್ನು ಕುಂಟಿಕಾನದ ಎ.ಜೆ.ಆಸ್ಪತ್ರೆಗೆ ತಕ್ಷಣವೇ ಕರೆದೊಯ್ಯಲಾಯಿತು. ಆದರೆ, ಅಷ್ಟರಲ್ಲೇ ಅವರು ಕೊನೆಯುಸಿರೆಳೆದಿದ್ದರು’ ಎಂದು ಪೊಲೀಸ್‌ ಮೂಲಗಳು ತಿಳಿಸಿವೆ.

ಕಾರು ಚಾಲಕ ಕಿರಣ್ ಬಿ. ವಿರುದ್ಧ ಆಲ್ಬರ್ಟ್ ವಿಲ್ಫ್ರೆಡ್ ಡಯಾಸ್‌ ಅವರು ದೂರು ನೀಡಿದ್ದು, ಸಂಚಾರ ಪೂರ್ವ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.