ಲಕ್ಷದ್ವೀಪದ ಬಳಿ ತಮಿಳುನಾಡಿನ ಬೋಟ್‌ ಪತ್ತೆ

ಮಂಗಳೂರು: ಸಮುದ್ರದಲ್ಲಿ ನಾಪತ್ತೆಯಾಗಿದ್ದ ತಮಿಳುನಾಡಿನ ಮೀನುಗಾರಿಕೆ ಬೋಟ್ ‘ಮರ್ಸಿಡಿಸ್‌’ ಅನ್ನು ಕರಾವಳಿ ಕಾವಲು ಬುಧವಾರ ಪತ್ತೆ ಮಾಡಿದೆ.

ಏ.6 ರಂದು ತಮಿಳುನಾಡಿನ ತೆಂಗಪಟ್ಟಣಂ ಬಂದರಿನಿಂದ 11 ಮೀನುಗಾರರೊಂದಿಗೆ ಹೊರಟಿದ್ದ ಈ ಬೋಟ್‌, ಏ.24 ರಂದು ನಾಪತ್ತೆಯಾಗಿತ್ತು. ಈ ಬಗ್ಗೆ ತಮಿಳುನಾಡು ಮೀನುಗಾರಿಕೆ ಇಲಾಖೆಯಿಂದ ಕರಾವಳಿ ಕಾವಲು ಪಡೆಗೆ ಮಾಹಿತಿ ರವಾನಿಸಲಾಗಿತ್ತು.

ಕಾರ್ಯಪ್ರವೃತ್ತವಾದ ಕರಾವಳಿ ಕಾವಲು ಪಡೆ, ಹೆಲಿಕಾಪ್ಟರ್‌, ಗಸ್ತು ಹಡಗುಗಳ ಮೂಲಕ ಶೋಧ ಕಾರ್ಯ ನಡೆಸಿತ್ತು. ನಾಲ್ಕು ದಿನಗಳ ನಂತರ ಮರ್ಸಿಡಿಸ್‌ ಬೋಟ್‌ ಅನ್ನು ಲಕ್ಷದ್ವೀಪದಿಂದ 200 ನಾಟಿಕಲ್‌ ಮೈಲಿ ದೂರದಲ್ಲಿ ಪತ್ತೆ ಮಾಡಲಾಗಿದೆ. ಬೋಟ್‌ನಲ್ಲಿದ್ದ 11 ಮೀನುಗಾರರು ಸುರಕ್ಷಿತವಾಗಿದ್ದಾರೆ ಎಂದು ಕರಾವಳಿ ಕಾವಲು ಪಡೆ ತಿಳಿಸಿದೆ.

ಸುರಕ್ಷಿತವಾಗಿ ಇರುವ ಬಗ್ಗೆ ಸೆಟ್‌ಲೈಟ್‌ ಫೋನ್‌ ಮೂಲಕ ಬೋಟ್‌ನಲ್ಲಿದ್ದ ಮೀನುಗಾರರು ತಮ್ಮ ಕುಟುಂಬದವರಿಗೂ ಮಾಹಿತಿ ನೀಡಿದ್ದಾರೆ. ಲಕ್ಷದ್ವೀಪದಲ್ಲಿ ನಿಯೋಜಿಸಲಾಗಿರುವ ಕರಾವಳಿ ಕಾವಲು ಪಡೆಯ ಹಡಗನ್ನು ಸ್ಥಳಕ್ಕೆ ಕಳುಹಿಸಲಾಗಿದ್ದು, ಅಗತ್ಯ ವೈದ್ಯಕೀಯ, ಆಹಾರದ ನೆರವು ಒದಗಿಸಲಾಗಿದೆ ಎಂದು ಹೇಳಿದೆ.