ಮಂಗಳೂರು: ಸಿಬ್ಬಂದಿಗೆ ಗಾಯ: ಮರಳಿದ ವಿಮಾನ

ಮಂಗಳೂರು: ನಗರದ ಬಜ್ಪೆಯ ಮಂಗಳೂರು ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದಿಂದ ಹಾರಾಟ ಆರಂಭಿಸಿದ್ದ ಸ್ಪೈಸ್‌ ಜೆಟ್‌ ವಿಮಾನವೊಂದು ಸಿಬ್ಬಂದಿಗೆ ತುಸು ಪೆಟ್ಟಾದ ಕಾರಣದಿಂದ ಕೆಲವೇ ಕ್ಷಣಗಳಲ್ಲಿ ಮರಳಿ ಬಂದಿಳಿದ ಘಟನೆ ಶುಕ್ರವಾರ ಬೆಳಿಗ್ಗೆ ನಡೆಯಿತು.

ಬೆಳಿಗ್ಗೆ 7.50ಕ್ಕೆ ಮಂಗಳೂರಿನಿಂದ ಹೊರಟಿದ್ದ ಸ್ಪೈಸ್‌ ಜೆಟ್‌ ವಿಮಾನ ಆಗಸದಲ್ಲಿ ಎತ್ತರ ಬದಲಿಸುತ್ತಿದ್ದಾಗ ಸಿಬ್ಬಂದಿಯೊಬ್ಬರಿಗೆ ಸಣ್ಣ ಪೆಟ್ಟಾಯಿತು. ತಕ್ಷಣವೇ ವಿಮಾನವನ್ನು ವಾಪಸು ತಂದು ಇಳಿಸಲಾಯಿತು. ಸಿಬ್ಬಂದಿಯ ಆರೋಗ್ಯ ಪರೀಕ್ಷೆ ನಡೆಸಿದ ವೈದ್ಯರು, ಅವರು ಕರ್ತವ್ಯ ನಿರ್ವಹಿಸಲು ಶಕ್ತರಾಗಿದ್ದಾರೆ ಎಂದು ಶಿಫಾರಸು ಮಾಡಿದರು. ಆದರೂ, ಬದಲಿ ಸಿಬ್ಬಂದಿಯೊಂದಿಗೆ ಕೆಲವು ಸಮಯದ ಬಳಿಕ ಪುನಃ ವಿಮಾನ ಬೆಂಗಳೂರಿನತ್ತ ತೆರಳಿತು ಎಂದು ಸ್ಪೈಸ್‌ ಜೆಟ್‌ ವಕ್ತಾರರು ಮಾಹಿತಿ ನೀಡಿದ್ದಾರೆ.

ಬೆಳಿಗ್ಗೆ 7.50ಕ್ಕೆ ಮಂಗಳೂರಿನಿಂದ ಹೊರಡಬೇಕಿದ್ದ ಈ ವಿಮಾನ 8.25ಕ್ಕೆ ಮಂಗಳೂರು ವಿಮಾನ ನಿಲ್ದಾಣದಿಂದ ನಿರ್ಗಮಿಸಿತು.