ಮಂಗಳೂರು: ದುಬಾರಿ ತರಕಾರಿ ಖರೀದಿಗೆ ನಿರಾಸಕ್ತಿ

ಮಂಗಳೂರು: ನಗರದ ಮಾರುಕಟ್ಟೆಗಳಲ್ಲಿ ತರಕಾರಿಯ ಬೆಲೆ ಕೇಳಿದವರೆಲ್ಲರೂ ಈಗ ಬೆಚ್ಚಿ ಬೀಳುತ್ತಿದ್ದಾರೆ. ತರಕಾರಿ ಮೇಲೆ ಕೈಯಿಟ್ಟವರು ಶಾಕ್ ಹೊಡೆದವರಂತೆ ವಾಪಸ್ ತೆಗೆಯುತ್ತಿದ್ದಾರೆ. ಟೊಮ್ಯಾಟೊ, ಬೀನ್ಸ್‌, ಅಲಸಂಡೆ ಮುಂತಾದವುಗಳನ್ನು ಒಂದು ಕೆಜಿ ಖರೀದಿಸಲು ಅಂದಾಜು ಮಾಡಿಕೊಂಡು ಬಂದವರು ಕೇವಲ ಕಾಲು ಕೆಜಿಗೆ ಇಳಿಯುತ್ತಿದ್ದಾರೆ.

ಹೌದು, ಮಂಗಳೂರು ನಗರ ಸೇರಿದಂತೆ ಜಿಲ್ಲೆಯಲ್ಲಿ ತರಕಾರಿ ದರ ವಿಪರೀತವಾಗಿದ್ದು ಗ್ರಾಹಕರು ಹಲವು ಪದಾರ್ಥಗಳನ್ನು ಬದಿಗಿರಿಸಿ ಅನಿವಾರ್ಯ ಆಗಿರುವುದನ್ನು ಮಾತ್ರ ಖರೀದಿಸುತ್ತಿದ್ದಾರೆ. ತಂದಿರಿಸಿದ ಮಾಲು ಉಳಿದರೆ ಗತಿ ಏನು ಎಂದು ಮಾರಾಟಗಾರರು ತಲೆ ಮೇಲೆ ಕೈಯಿಟ್ಟು ಕುಳಿತಿದ್ದಾರೆ.

‘ತರಕಾರಿ ಬೆಳೆಯುವವರ ಸಂಖ್ಯೆ ವಿವಿಧ ಕಾರಣಗಳಿಂದ ಕಡಿಮೆಯಾಗಿದೆ. ಈ ಬಾರಿ ಬೇಸಿಗೆ ಕಾಲದಲ್ಲಿ ವಿಪರೀತ ಬಿಸಿ ಇತ್ತು. ಆದ್ದರಿಂದ ನಿರೀಕ್ಷೆಗೆ ತಕ್ಕಂತೆ ಬೆಳೆ ಬರಲಿಲ್ಲ. ಜೂನ್‌ನಲ್ಲಿ ಅತಿವೃಷ್ಟಿಯಾದ ಕಾರಣ ಹಲವು ಕಡೆಗಳಲ್ಲಿ ತರಕಾರಿ ನಾಶವಾಗಿದೆ. ಮಂಗ ಸೇರಿದಂತೆ ಕಾಡುಪ್ರಾಣಿಗಳ ಕಾಟವೂ ಅತಿಯಾಗಿದ್ದರಿಂದ ಫಸಲು ಸರಿಯಾಗಿ ಕೈಗೆ ಸಿಗುವುದಿಲ್ಲ. ಬೆಲೆ ಏರಿಕೆಯ ಹಿಂದೆ ಈ ಎಲ್ಲ ಕಾರಣಗಳು ಇವೆ’ ಮಾರುಕಟ್ಟೆಯ ಒಡನಾಟ ಇರಿಸಿಕೊಂಡವರು ಹೇಳುತ್ತಾರೆ.

ಬಹತೇಕ ಎಲ್ಲ ತರಕಾರಿಯ ಬೆಲೆಯೂ ಎರಡು ಪಟ್ಟು ಅಥವಾ ಮೂರು ಪಟ್ಟು ಹೆಚ್ಚಾಗಿದೆ. ಕೆಲವು ಪದಾರ್ಥಗಳಿಗೆ ₹ 100ರಷ್ಟು ಹೆಚ್ಚಾಗಿದೆ. ವಾರದ ಹಿಂದೆ ₹ 60ರಿಂದ ₹ 70ಕ್ಕೆ ಮಾರಾಟವಾಗುತ್ತಿದ್ದ ಬೀನ್ಸ್‌ ದರ ಈಗ ₹ 160ಕ್ಕೆ ಏರಿದೆ. ₹ 45 ಇದ್ದ ಮಂಗಳೂರು ಸೌತೆ ದರ ಈಗ ₹ 70 ದಾಟಿದೆ. ಟೊಮೆಟೊ ₹ 40ರಿಂದ ₹ 70 ಆಗಿದೆ. ಅಲಸಂದೆ ಮತ್ತು ಮೆಣಸಿನಕಾಯಿ ₹ 50ರಿಂದ ₹ 100ಕ್ಕೆ ಸಾಗಿದೆ. ಹೀರೆಕಾಯಿ ₹ 40ರಿಂದ ₹ 90ರಷ್ಟಾಗಿದೆ. ಆಲೂಗಡ್ಡೆ ಮಾತ್ರ ಹೆಚ್ಚು ತೊಂದರೆ ಮಾಡಿಲ್ಲ. ವಾರದ ಹಿಂದೆ ₹ 40ರಷ್ಟಿದ್ದ ದರ ಈಗ ₹ 45ರ ಆಸುಪಾಸಿನಲ್ಲಿದೆ.

‘25 ಕೆಜಿಯ ಟೊಮೆಟೊ ಬಾಕ್ಸ್ ಈ ಹಿಂದೆ ₹ 400ಕ್ಕೆ ಸಿಗುತ್ತಿತ್ತು. ಈಗ ದರ ₹ 1700ರಷ್ಟಾಗಿದೆ. ಇದು ಬಾಕಿ ಉಳಿದರೆ ಕಷ್ಟ. ಆದ್ದರಿಂದ ತರಿಸುವುದಕ್ಕೇ ಆತಂಕವಾಗುತ್ತದೆ. ಕಡಿಮೆ ತಂದು ದಾಸ್ತಾನು ಇರಿಸುತ್ತಿದ್ದೇವೆ’ ಎಂದು ನಗರದ ಹಾಪ್‌ಕಾಮ್ಸ್ ಸೇಲ್ಸ್‌ಮ್ಯಾನ್‌ ಸುರೇಶ್ ತಿಳಿಸಿದರು.

‘ನಾವು ಪ್ಯೂರ್ ವೆಜಿಟೇರಿಯನ್‌. ತರಕಾರಿ ಅಲ್ಲದೆ ಬೇರೇನೂ ಬಳಸುತ್ತಿಲ್ಲ. ಬೆಲೆ ಏರಿಕೆ ಆದರೂ ಅನಿವಾರ್ಯವಾಗಿ ಇದನ್ನೇ ಖರೀದಿಸಬೇಕಾಗುತ್ತದೆ. ಒಂದು ತಿಂಗಳಿಂದ ಬೆಲೆ ತೀರಾ ಏರಿಕೆ ಆಗಿದೆ. ಒಂದು ವಾರದಿಂದ ಕೆಲವು ಪದಾರ್ಥಗಳನ್ನು ಖರೀದಿಸುವುದನ್ನೇ ಬಿಟ್ಟಿದ್ದೇವೆ’ ಎಂದು ಮಾಲತಿ ನಾಯಕ್‌ ಹೇಳಿದರು.

ಸ್ಥಳೀಯ ಉತ್ಪನ್ನಗಳೂ ಕೈಗೆಟಕುತ್ತಿಲ್ಲ

ಗುರುವಾರ ಬೆಳಿಗ್ಗೆ ಕದ್ರಿಯ ತರಕಾರಿ ಮಾರುಕಟ್ಟೆಗೆ ಬಂದ ದಯಾನಂದ ಅವರಿಗೆ ಒಂದು ದೀವಿ ಹಲಸು (ದೀಗುಜ್ಜೆ) ಬೇಕಿತ್ತು. ಮಂಗಳೂರು ನಗರದಲ್ಲೂ ಜಿಲ್ಲೆಯ ಎಲ್ಲ ಕಡೆಗಳಲ್ಲೂ ಬೆಳೆಯುವ ಉತ್ಪನ್ನವಾಗಿರುವುದರಿಂದ ಕಡಿಮೆ ದರಕ್ಕೆ ಸಿಗಬಹುದು ಎಂಬುದು ಅವರ ಅನಿಸಿಕೆಯಾಗಿತ್ತು. ಸಣ್ಣ ದೀಗುಜ್ಜೆಯನ್ನು ಕೈಗೆತ್ತಿಕೊಂಡು ದರ ಕೇಳಿ ಹೌಹಾರಿದರು.

ದೀವಿ ಹಲಸಿಗೆ ಈಗ ಮಂಗಳೂರು ಮಾರುಕಟ್ಟೆಯಲ್ಲಿ ಕೆಜಿಗೆ ₹ 280 ಬೆಲೆ ಇದೆ. ಒಂದಿಷ್ಟು ಚೌಕಾಶಿ ಮಾಡಿದ ದಯಾನಂದ ಅವರು ಕೊನೆಗೆ ಬರಿಗೈಯಲ್ಲಿ ವಾಪಸಾದರು.

‘ದೀಗುಜ್ಜೆ ಇಲ್ಲೇ ಬೆಳೆಯುವುದಾದರೂ ಬೆಲೆ ಸಿಕ್ಕಾಪಟ್ಟೆ ಇದೆ. ಗ್ರಾಮೀಣ ಪ್ರದೇಶಗಳಲ್ಲಿ ಇದರ ಮರಗಳು ಇವೆ. ಆದರೆ ಸರಿಯಾಗಿ ಫಲ ಸಿಗುವುದಿಲ್ಲ. ಬಲಿತು ಕೊಯ್ಯುವ ಕಾಲಕ್ಕೆ ಒಂದೋ ಹಕ್ಕಿಗಳ ಪಾಲಾಗುತ್ತವೆ, ಈಗ ಕೀಟಗಳ ಕಾಟವೂ ಇದೆ. ಹಿಂದೆಲ್ಲ ನಗರದಲ್ಲಿ ಹೆಚ್ಚಿನವರ ಮನೆ ಮುಂದ ದೀಗುಜ್ಜೆ ಮರ ಇತ್ತು. ಈಗ ಅದನ್ನೆಲ್ಲ ಕಡಿದು ಆ ಜಾಗದಲ್ಲಿ ಗಾರ್ಡನ್ ಮಾಡಿದ್ದಾರೆ. ಹೀಗಾದರೆ ಕಾಯಿಗಳು ಹೇಗೆ ಸಿಗಬೇಕು’ ಎಂದು ಪ್ರಶ್ನಿಸಿದರು ಅಂಗಡಿ ಮಾಲೀಕ. 

ಹಾಪ್‌ಕಾಮ್ಸ್‌ನಲ್ಲಿ ಜೂ.20ರ ತರಕಾರಿ ದರ

ತರಕಾರಿ;ದರ (₹ಗಳಲ್ಲಿ)

ಟೊಮೆಟೊ;70-80

ಬೀನ್ಸ್;120-140

ಅಲಸಂಡೆ;60-70

ಹಸಿ ಮೆಣಸು;50-60

ದಪ್ಪ ಮೆಣಸು;80-90

ಬದನೆಕಾಯಿ;50-60

ಹೀರೆಕಾಯಿ;60-70

ಹೂಕೋಸು;60-70

ಎಲೆಕೋಸು;30-40

ಮುಳ್ಳುಸೌತೆ;30-40

ಸಾಂಬಾರು ಸೌತೆ;40-50

ಮೂಲಂಗಿ;40-50

ತೊಂಡೆಕಾಯಿ;30-40

ಬೆಂಡೆಕಾಯಿ;40-50

ಸೋರೆಕಾಯಿ;30-40

ಆಲೂಗಡ್ಡೆ;33-43

ಬೆಳ್ಳುಳ್ಳಿ;190-220

ಈರುಳ್ಳಿ;33-43

ನುಗ್ಗೆಕಾಯಿ;80-100

ಬೂದುಕುಂಬಳ;20-30

ಸಿಹಿಕುಂಬಳ;16-24

ಕ್ಯಾರೆಟ್;60-70

ಬೀಟ್‌ರೂಟ್‌;30-40

ಶುಂಠಿ;120-140

ಪಡುವಲಕಾಯಿ;40-50

ಸುವರ್ಣ ಗಡ್ಡೆ;75-90