ನ್ಯಾಮತಿ ತಾಲ್ಲೂಕಿನಾದ್ಯಂತ ಉತ್ತಮ ಮಳೆ

ನ್ಯಾಮತಿ: ತಾಲ್ಲೂಕಿನ ಸುತ್ತಮುತ್ತಲ ಗ್ರಾಮಗಳಲ್ಲಿ ಮಂಗಳವಾರ ತಡರಾತ್ರಿ ಉತ್ತಮ ಮಳೆಯಾಗಿದೆ.

ಗುಡುಗು, ಮಿಂಚು, ಸಿಡಿಲಿನ ಆರ್ಭಟದೊಂದಿಗೆ ಆರಂಭವಾದ ಮಳೆ ಒಂದು ತಾಸಿಗಿಂತ ಹೆಚ್ಚು ಸುರಿದಿದೆ . ನ್ಯಾಮತಿ, ಸವಳಂಗ, ಬೆಳಗುತ್ತಿ, ಗೋವಿನಕೋವಿ, ಚೀಲೂರು, ಕೆಂಚಿಕೊಪ್ಪ ಜೀನಹಳ್ಳಿ ಭಾಗದಲ್ಲಿ ಹದ ಮಳೆಯಾಗಿದೆ. ಬುಧವಾರ ಗೋವಿನಕೋವಿ ಭಾಗದಲ್ಲಿ ಮಳೆಯಾಗಿದೆ. ಬೆಳಗುತ್ತಿಯಲ್ಲಿ ಅತಿ ಹೆಚ್ಚು ಮಳೆ ದಾಖಲಾಗಿದೆ.

ಈಗ ಬರುವ ಮಳೆಯಿಂದ ಹೂವಾಡುವ ಭತ್ತಕ್ಕೆ ತೊಂದರೆಯಾಗುತ್ತದೆ. ಫಸಲಿಗೆ ಬಂದಿರುವ ಮೆಕ್ಕೆಜೋಳದ ತೆನೆಗಳು ನೆಲಕ್ಕೆ ಬಾಗುತ್ತವೆ ಎಂದು ರೈತರಾದ ಗೋವಿನಕೋವಿ ವಿ.ಎಚ್.ರುದ್ರೇಶ, ಫಲವನಹಳ್ಳಿ ಹಳದಪ್ಪ, ರಾಮೇಶ್ವರ ನಾಗರಾಜ ಹೇಳಿದರು.