ಸಂಕ್ರಾಂತಿ: ಅಜ್ಜಯ್ಯನ ದರ್ಶನ ಪಡೆದ ಭಕ್ತರು

ಕಡರನಾಯ್ಕನಹಳ್ಳಿ: ಸಮೀಪದ ಉಕ್ಕಡಗಾತ್ರಿ, ಭೈರನಪಾದ, ದೂಳೆಹೊಳೆಯಲ್ಲಿ ರೈತರು ಕುಟುಂಬ ಸಮೇತ ಸಾಮೂಹಿಕವಾಗಿ ಸಂಕ್ರಾಂತಿ ಆಚರಿಸಿದರು.

ಉಕ್ಕಡಗಾತ್ರಿ ಗ್ರಾಮದಲ್ಲಿ ಹರಿಯುವ ತುಂಗಭದ್ರಾ ನದಿಯಲ್ಲಿ ಭಕ್ತರು ಸ್ನಾನ ಮಾಡಿ ಅಜ್ಜಯ್ಯನ ದರ್ಶನ ಪಡೆದರು. ಎಲ್ಲರಿಗೂ ಎಳ್ಳು ಬೆಲ್ಲ ಹಂಚಿ ಹಬ್ಬದ ಶುಭಾಶಯ ಕೋರಿದರು. ನಂತರ ನದಿ ದಡದಲ್ಲಿ ಕುಳಿತು ಮನೆಯಿಂದ ತಂದಿದ್ದ ರೊಟ್ಟಿ, ಪಲ್ಯ, ಪುಡಿಚಟ್ನಿ, ಮೊಸರುಬುತ್ತಿ ವಿವಿಧ ಬಗೆಯ ಸಿಹಿಯನ್ನು ಸವಿದು ಖುಷಿ ಪಟ್ಟರು.

ಸಮೀಪದ ಭೈರನಪಾದದಲ್ಲಿ ಭಕ್ತರು ಭೈರವನ ದರ್ಶನ ಪಡೆದು ಸಂಕ್ರಾಂತಿ ಆಚರಿಸಿದರು. ದೂಳೆಹೊಳೆ ಗ್ರಾಮದಲ್ಲಿ ಹರಪನಹಳ್ಳಿಯ ತೆಗ್ಗಿನ ಮಠ ಮಹಾಸಂಸ್ಥಾನ ಮಠದ ವರಸದ್ಯೋಜಾತ ಶಿವಾಚಾರ್ಯ ಸ್ವಾಮೀಜಿ ಸಾನ್ನಿಧ್ಯದಲ್ಲಿ ಸುತ್ತಮುತ್ತಲಿನ ಗ್ರಾಮಸ್ಥರು ಸಾಮೂಹಿಕವಾಗಿ ಸಂಕ್ರಾಂತಿ ಆಚರಿಸಿದರು.