ದಾವಣಗೆರೆ: ಸಾಲ ಮಾಡಿ ಪ್ರೀಮಿಯಂ ಕಟ್ಟಿದ ಕೃಷಿಕರಿಗೆ ‘ಬಡ್ಡಿ’ ಹೊರೆ

ದಾವಣಗೆರೆ: ‘2023–24ರ ಮುಂಗಾರು ಹಂಗಾಮಿನ ಮೆಕ್ಕೆಜೋಳ ಬೆಳೆಗೆ (ಮಳೆಯಾಶ್ರಿತ) ಪ್ರತೀ ಎಕರೆಗೆ ₹ 440 ರಂತೆ ಬೆಳೆ ವಿಮೆ ಪ್ರೀಮಿಯಂ ಕಟ್ಟಿದ್ದೇವೆ. ಹಿಂಗಾರು ಕಳೆದು ಇದೀಗ ಮತ್ತೆ ಮುಂಗಾರು ಬಿತ್ತನೆಯನ್ನೂ ನಡೆಸಿದ್ದೇವೆ. ಆದರೂ, ಬೆಳೆ ವಿಮೆ ಪರಿಹಾರದ ಮೊತ್ತ ಜಮೆಯಾಗಿಲ್ಲ. ಬೀಜ, ಗೊಬ್ಬರ ಖರೀದಿಗೆ ದುಬಾರಿ ಬಡ್ಡಿ ದರದಲ್ಲಿ ಸಾಲ ತರಬೇಕಾಯಿತು. ಆದರೆ ಕೃಷಿ ಇಲಾಖೆಯ ಅಧಿಕಾರಿಗಳು ‘ತಾಂತ್ರಿಕ ಸಮಸ್ಯೆ’ಯ ನೆಪ ಹೇಳುತ್ತಿದ್ದಾರೆ’ ಎಂದು ಜಗಳೂರು ತಾಲ್ಲೂಕಿನ ಹಸಗೋಡು ಗ್ರಾಮದ ರೈತ ಮುಖಂಡ ಕೆ.ಬಿ.ರವಿ ಬೇಸರ ವ್ಯಕ್ತಪಡಿಸಿದರು. 

‘ಅಧಿಕಾರಿಗಳು ಹಾಗೂ ಇನ್ಶುರೆನ್ಸ್‌ ಕಂಪನಿಯವರು ಬೆಳೆ ವಿಮೆ ಪ್ರೀಮಿಯಂ ಕಟ್ಟಿಸಿಕೊಳ್ಳುವಾಗ ತೋರುವ ಆಸಕ್ತಿಯನ್ನು ಪರಿಹಾರದ ಮೊತ್ತ ಬಿಡುಗಡೆ ಮಾಡಲು ತೋರುವುದಿಲ್ಲ. ಬೆಳೆ ವಿಮೆ ಪರಿಹಾರ ಶೀಘ್ರವೇ ಬ್ಯಾಂಕ್‌ ಖಾತೆಗೆ ಜಮೆಯಾಗುತ್ತದೆ ಎಂದು ಅಧಿಕಾರಿಗಳು ಹೇಳುತ್ತಿದ್ದು, ಅದನ್ನೇ ಎದುರು ನೋಡುತ್ತಿದ್ದೇವೆ’ ಎಂದು ಜಗಳೂರು ತಾಲ್ಲೂಕಿನ ಮತ್ತೊಬ್ಬ ರೈತ ರಾಘವೇಂದ್ರ ಅಳಲು ತೋಡಿಕೊಂಡರು.

‘ಅತಿವೃಷ್ಟಿ, ಅನಾವೃಷ್ಟಿಯಿಂದ ಬೆಳೆ ಹಾಳಾದರೆ ಪರಿಹಾರವಾದರೂ ಸಿಗುತ್ತದೆ ಎಂಬ ಆಶಾಭಾವದಲ್ಲಿ ಬಡ್ಡಿಗೆ ಕೈಸಾಲ ತಂದು ಬೆಳೆ ವಿಮೆ ಪ್ರೀಮಿಯಂ ಪಾವತಿಸಿದ ಜಿಲ್ಲೆಯ ಕೆಲವು ಗ್ರಾಮ ಪಂಚಾಯಿತಿಗಳ ರೈತರಿಗೆ ಇದುವರೆಗೂ ಪರಿಹಾರದ ಮೊತ್ತ ದೊರಕಿಲ್ಲ. ವಿಮೆ ಪರಿಹಾರ ನೀಡಿ ಎಂದು ಅನ್ನದಾತರು ಕೃಷಿ ಇಲಾಖೆ, ತಹಶೀಲ್ದಾರ್‌ ಕಚೇರಿ, ಜಿಲ್ಲಾಧಿಕಾರಿಯವರ ಕಚೇರಿ ಎದುರು ಪ್ರತಿಭಟನೆ ನಡೆಸಿ ಆಕ್ರೋಶ ಹೊರಹಾಕುತ್ತಿರುವುದು ನಿಂತಿಲ್ಲ.

ಕರ್ನಾಟಕ ರೈತ ಸುರಕ್ಷಾ ಪ್ರಧಾನಮಂತ್ರಿ ಬೆಳೆ ವಿಮೆ ಯೋಜನೆಯಡಿ 2023–24ರ ಮುಂಗಾರು ಬೆಳೆಗೆ ವಿಮೆ ಪಾವತಿಸಿದ ರೈತರ ಪೈಕಿ ಕೆಲವರ ಖಾತೆಗಳಿಗೆ ಇದುವರೆಗೂ ಪರಿಹಾರದ ಹಣ ಪಾವತಿಯಾಗಿಲ್ಲ. ಮಳೆ ಕೊರತೆ ಹಾಗೂ ಇನ್ನಿತರ ಕಾರಣಗಳಿಂದ ಬೆಳೆ ಹಾಳಾದರೆ ರೈತರಿಗೆ ನ್ಯಾಯಯುತ ಪರಿಹಾರ ನೀಡಬೇಕಾದದ್ದು ಬೆಳೆ ವಿಮೆ ಪ್ರೀಮಿಯಂ ಕಟ್ಟಿಸಿಕೊಂಡ ಕಂಪನಿಯ ಜವಾಬ್ದಾರಿ. ಆದರೆ, ಬೆಳೆ ಹಾನಿಯಾದಾಗ ಬೆಳೆ ವಿಮೆಯ ಪರಿಹಾರ ನೀಡುವಲ್ಲಿ ವಿಳಂಬವಾಗುತ್ತಿದೆ. ಇದರಿಂದಾಗಿ ಸಾಲ ಮಾಡಿ ಕೃಷಿಯಲ್ಲಿ ತೊಡಗಿರುವ ರೈತರಿಗೆ ‘ಬಡ್ಡಿ’ಯ ಹೊರೆ ಹೆಚ್ಚುತ್ತಿದೆ.

‘ಬೆಳೆ ವಿಮೆ ಮೊತ್ತ ಪಾವತಿಯಾಗದ ಗ್ರಾಮ ಪಂಚಾಯಿತಿಗಳ ಪೈಕಿ, ಜಗಳೂರು ತಾಲ್ಲೂಕಿನ ಪಂಚಾಯಿತಿಗಳೇ ಹೆಚ್ಚಿವೆ. ಬೆಳೆ ವಿಮೆಯ ಪ್ರೀಮಿಯಂ ಕಟ್ಟಿಸಿಕೊಂಡ ಅಗ್ರಿಕಲ್ಚರಲ್‌ ಇನ್ಶುರೆನ್ಸ್‌ ಕಂಪನಿಯು (ಎಐಸಿ) ಇದೀಗ ಹಣ ಪಾವತಿಸದೇ ಕುಂಟು ನೆಪ ಹೇಳುತ್ತಿದೆ. ಇದರಿಂದ ಸಮಸ್ಯೆಯಾಗುತ್ತಿದೆ’ ಎಂದು ಜಗಳೂರು ತಾಲ್ಲೂಕಿನ ವಿವಿಧ ಗ್ರಾಮಗಳ ರೈತರು ದೂರುತ್ತಿದ್ದಾರೆ.

‘ದೇವಿಕೆರೆ, ಅಸಗೋಡು, ಬಿಳಿಚೋಡು, ಮಡ್ರಳ್ಳಿ, ಗುತ್ತಿದುರ್ಗ ಸೇರಿದಂತೆ ಜಗಳೂರು ತಾಲ್ಲೂಕಿನ 8 ಗ್ರಾಮ ಪಂಚಾಯಿತಿ, ಹೊನ್ನಾಳಿ – ನ್ಯಾಮತಿ ತಾಲ್ಲೂಕಿನ 3 ಗ್ರಾಮ ಪಂಚಾಯಿತಿ ಹಾಗೂ ದಾವಣಗೆರೆ ತಾಲ್ಲೂಕಿನ ಕೆಲ ಗ್ರಾಮ ಪಂಚಾಯಿತಿಗಳ ವ್ಯಾಪ್ತಿಯಲ್ಲಿ 2023–24ರ ಮುಂಗಾರು ಬೆಳೆಯ ಪರಿಹಾರ ಮೊತ್ತ ಪಾವತಿಯಾಗಬೇಕಿದೆ’ ಎನ್ನುತ್ತಾರೆ ರೈತರು.

2023–24ರ ಮುಂಗಾರಿನಲ್ಲಿ ಜಿಲ್ಲೆಯಲ್ಲಿ 41,000 ಹೆಕ್ಟೇರ್‌ ಜಮೀನಿನಲ್ಲಿ ಬೆಳೆದ ಬೆಳೆಗಳಿಗೆ ರೈತರು ಬೆಳೆ ವಿಮೆ ಪ್ರೀಮಿಯಂ ಪಾವತಿಸಿದ್ದರು. ಹಿಂಗಾರು ಬೆಳೆಗೆ 1,200 ರಿಂದ 1,300 ರೈತರು ಮಾತ್ರ ಬೆಳೆ ವಿಮೆ ಪ್ರೀಮಿಯಂ ಕಟ್ಟಿದ್ದಾರೆ ಎಂದು ಕೃಷಿ ಇಲಾಖೆ ಅಧಿಕಾರಿಗಳು ಮಾಹಿತಿ ನೀಡಿದರು.

ಹೊಂದಾಣಿಕೆಯಾಗದ ಬೆಳೆ:

ವಿಮೆ ಪರಿಹಾರ ಬಿಡುಗಡೆಗೂ ಮುನ್ನ ವಿಮೆ ಕಂಪನಿ, ಕೃಷಿ, ಕಂದಾಯ, ತೋಟಗಾರಿಕೆ, ಗ್ರಾಮೀಣಾಭಿವೃದ್ಧಿ ಮತ್ತು ಪಂಚಾಯತ್ ರಾಜ್ ಇಲಾಖೆ, ಆರ್ಥಿಕ ಮತ್ತು ಸಾಂಖ್ಯಿಕ ನಿರ್ದೇಶನಾಲಯದ ಅಧಿಕಾರಿಗಳು ಜಂಟಿಯಾಗಿ ವಿಮಾ ಘಟಕಗಳಿಗೆ (ಗ್ರಾಮ ಪಂಚಾಯಿತಿ ವಿಭಾಗವಾರು) ತೆರಳಿ ‘ಬೆಳೆ ಕಟಾವು ಪ್ರಯೋಗ’ ನಡೆಸುತ್ತಾರೆ. ಈ ಪ್ರಕ್ರಿಯೆಯಲ್ಲಿನ ಫಲಿತಾಂಶ ಆಧರಿಸಿ ರೈತರಿಗೆ ನೀಡಬೇಕಾದ ವಿಮೆ ಪರಿಹಾರದ ಮೊತ್ತವನ್ನು ನಿರ್ಧರಿಸಲಾಗುತ್ತದೆ.

‘ಬೆಳೆ ಕಟಾವು ಪ್ರಯೋಗ’ಕ್ಕೆ ತೆರಳಿದಾಗ ಹಲವು ಬಾರಿ ಬೆಳೆ ಹೊಂದಾಣಿಕೆಯಾಗಿಲ್ಲ. ವಿಮೆಗೆ ನೋಂದಾಯಿಸಿದ ಬೆಳೆ ಹಾಗೂ ಜಮೀನಿನಲ್ಲಿರುವ ಬೆಳೆ ಬೇರೆ ಬೇರೆ ಇರುವುದು ಕಂಡುಬರುತ್ತದೆ. ಹೀಗಾದಾಗ ಬೆಳೆ ವಿಮೆ ಪರಿಹಾರ ಬಿಡುಗಡೆಯೂ ವಿಳಂಬವಾಗುತ್ತದೆ’ ಎಂದು ಅಧಿಕಾರಿಗಳು ತಿಳಿಸಿದರು.