ಹರಿಹರ: ಆತಂಕ ಮೂಡಿಸಿದ ‘ಓವರ್‌ಲೋಡ್’ ಕಬ್ಬು ಸಾಗಣೆ ವಾಹನಗಳು

ಹರಿಹರ: ಓವರ್‌ಲೋಡ್ ಕಬ್ಬು ಸಾಗಣೆಯ ವಾಹನಗಳ ಅರ್ಭಟ ಈಗ ಮತ್ತೆ ಆರಂಭವಾಗಿದ್ದು, ನಗರದಲ್ಲಿ ಸಂಚಾರ ಮಾಡುವ ವಾಹನ ಸವಾರರು ಜೀವ ಕೈಯಲ್ಲಿ ಹಿಡಿದು ಸಾಗುವಂತಾಗಿದೆ.

ಅಕ್ಟೋಬರ್ ಕೊನೆಯ ವಾರದಿಂದ ಕಬ್ಬುಸಾಗಣೆಯ ಡಬಲ್ ಟ್ರ್ಯಾಲಿ ಟ್ರ್ಯಾಕ್ಟರ್, ಲಾರಿಗಳ ಸಂಚಾರ ಅರ್ಭಟ ಆರಂಭವಾಗಿದೆ. ವಾಹನ ಎಲ್ಲಿ ಉರುಳಿ ಬೀಳುತ್ತದೆಯೋ ಎಂದು ಆತಂಕವಾಗುವಂತೆ ಕಬ್ಬನ್ನು ಲೋಡ್ ಮಾಡಲಾಗಿರುತ್ತದೆ.

ಒಂದು ಟ್ರ್ಯಾಲಿಯಲ್ಲಿ ಎರಡು ಟ್ರ್ಯಾಲಿಯಷ್ಟು ಕಬ್ಬು ಲೋಡ್ ಮಾಡಲಾಗಿರುತ್ತದೆ. ಇಂತಹ ಎರಡು ಟ್ರ್ಯಾಲಿಗಳನ್ನು ಒಂದು ಟ್ರ್ಯಾಕ್ಟರ್ ಎಂಜಿನ್‌ಗೆ ಜೋಡಿಸಿ ಸಾಗಣೆ ಮಾಡಲಾಗುತ್ತದೆ. ಲಾರಿಗಳಲ್ಲಿಯೂ ಕೂಡ ಅಪಾಯಕಾರಿ ಎನಿಸುವಷ್ಟು ಪ್ರಮಾಣದಲ್ಲಿ ಕಬ್ಬು ಸಾಗಣೆ ನಡೆಯುತ್ತಿದೆ.

ಕಬ್ಬು ಸಾಗಣೆ ಟ್ರ್ಯಾಕ್ಟರ್‌ಗೆ ಸಿಲುಕಿ ನಾಲ್ಕು ವರ್ಷಗಳ ಹಿಂದೆ ನಗರದ ನಾಡಬಂದ್‌ ಷಾವಲಿ ದರ್ಗಾ ಬಳಿ ಬಾಲಕನೊಬ್ಬ ಮೃತಪಟ್ಟಿದ್ದ. ಹಲವೆಡೆ ರಸ್ತೆಗೆ ಉರುಳಿ ಬಿದ್ದು ಹಲವು ಗಂಟೆಗಳ ಕಾಲ ವಾಹನ ಸಂಚಾರಕ್ಕೆ ತೊಡಕುಂಟಾಗಿರುವ ಪ್ರಕರಣಗಳೂ ನಡೆಯುತ್ತಿವೆ.

ಇದೇ ಅ.9 ರಂದು ಕರಲಹಳ್ಳಿ ಬಳಿ ಹೊಸಪೇಟೆ-ಶಿವಮೊಗ್ಗ ರಾಜ್ಯ ಹೆದ್ದಾರಿಯಲ್ಲಿ ಕಬ್ಬು ಸಾಗಣೆಯ ಡಬಲ್ ಟ್ರ್ಯಾಲಿ ಟ್ರ್ಯಾಕ್ಟರೊಂದು ಬೆಳಗಿನಜಾವ ಉರುಳಿ ಬಿದ್ದಿತ್ತು. ಕಬ್ಬು ಸಾಗಣೆ ಗುತ್ತಿಗೆದಾರ ತನ್ನ ಕೂಲಿಕಾರರನ್ನು ಕರೆಸಿ ಕಬ್ಬನ್ನು ಲೋಡ್ ಮಾಡುವಷ್ಟರಲ್ಲಿ ಸಂಜೆ ಆಗಿತ್ತು. ಅಲ್ಲಿವೆರೆಗೂ ಆ ಹೆದ್ದಾರಿಯಲ್ಲಿ ವಾಹನ ಸಂಚಾರಕ್ಕೆ ತೀವ್ರ ಅಡಚಣೆ ಉಂಟಾಗಿತ್ತು. ಹಾವೇರಿ ಜಿಲ್ಲೆ ಭಾಗದಿಂದ ಕಬ್ಬು ಲೋಡ್ ಮಾಡಿದ ಲಾರಿ ಮತ್ತು ಟ್ರ್ಯಾಕ್ಟರ್‌ಗಳು ನಗರದೊಳಗೆ ಬೀರೂರು-ಸಮ್ಮಸಗಿ ಹೆದ್ದಾರಿ (ತುಂಗಭದ್ರಾ ಸೇತುವೆ) ಮೂಲಕ ಪ್ರವೇಶಿಸುತ್ತವೆ. ನಂತರ ಗಾಂಧಿ ವೃತ್ತದ ಮೂಲಕ ಹರಪನಹಳ್ಳಿ ಕಡೆಗೆ ಹೊಸಪೇಟೆ-ಶಿವಮೊಗ್ಗ ಹೆದ್ದಾರಿಯಲ್ಲಿ ಸಾಗುತ್ತವೆ.

ನಗರದ ವ್ಯಾಪ್ತಿಯಲ್ಲಿ ಒಟ್ಟು ನಾಲ್ಕು ಕಿ.ಮೀ. ಈ ವಾಹನಗಳು ಸಾಗುತ್ತವೆ. ನಿಗದಿಗಿಂತ ಹೆಚ್ಚಿನ ಭಾರ ಹಾಗೂ ಹೆಚ್ಚಿನ ಗಾತ್ರದಲ್ಲಿ ಲೋಡ್ ಮಾಡಿಕೊಂಡು ಸಾಗುತ್ತಿರುವುದರಿಂದ ಈ ವಾಹನಗಳನ್ನು ಕಂಡರೆ ಜನತೆ ಆತಂಕ ಪಡುವಂತಾಗಿದೆ.

ಅತಿಯಾದ ಭಾರ ಹಾಗೂ ಗಾತ್ರದಿಂದಾಗಿ ಈ ವಾಹನಗಳು ತೆವಳುತ್ತಾ ಸಾಗುವಾಗ ಓಲಾಡುತ್ತವೆ. ಈ ವಾಹನದ ಹಿಂದೆ ಸಂಚರಿಸುವ ಬೇರೆ ವಾಹನ ಸವಾರರು ಈ ಕಬ್ಬಿನ ವಾಹನವನ್ನು ಹೇಗೆ ಓವರ್ ಟೇಕ್ ಮಾಡುವುದು, ಎಲ್ಲಿ ತಮ್ಮ ವಾಹನದ ಮೇಲೆ ಬೀಳುತ್ತದೋ ಎಂಬ ಆತಂಕದಲ್ಲಿ ಸಾಗುತ್ತಾರೆ.

ಬೆಳಿಗ್ಗೆ ಮತ್ತು ಸಂಜೆ ಶಾಲೆಗಳು ಆರಂಭ ಹಾಗೂ ಬಿಡುವ ಸಮಯದಲ್ಲಿ ನಗರದೊಳಗೆ ವಿದ್ಯಾರ್ಥಿಗಳನ್ನು ಕರೆದೊಯ್ಯುವ ಆಟೊ, ಕಾರು ಸಂಚಾರ ಅಧಿಕವಾಗಿರುತ್ತವೆ. ಆ ಸಮಯದಲ್ಲಿ ಕಬ್ಬು ಸಾಗಣೆ ವಾಹನಗಳ ಸಂಚಾರವೂ ಅಧಿಕವಾಗಿರುತ್ತದೆ. ಅಕಸ್ಮಾತ್ ಅಪಘಾತ ನಡೆದರೆ ದೊಡ್ಡ ದುರಂತ ಸಂಭವಿಸುತ್ತದೆ. ಸಂಬಂಧಿತ ಇಲಾಖಾ ಅಧಿಕಾರಿಗಳು ಓವರ್ ಲೋಡ್ ಕಬ್ಬು ಸಾಗಣೆ ಮಾಡದಂತೆ ಕ್ರಮ ವಹಿಸಬೇಕೆಂಬುದು ನಾಗರಿಕರ ಆಗ್ರಹವಾಗಿದೆ.