ದಾವಣಗೆರೆ: ಮಳೆಯಿಂದ ಬೇರೆ ರಾಜ್ಯಗಳಿಗೆ ತರಕಾರಿ ರಫ್ತು ಸ್ಥಗಿತ; ದರ ಕುಸಿತ

ದಾವಣಗೆರೆ: ಮಳೆ ಮುಂದುವರಿದಿದ್ದರಿಂದ ತಮಿಳುನಾಡು, ಮಹಾರಾಷ್ಟ್ರ ಮತ್ತಿತರ ರಾಜ್ಯಗಳಿಗೆ ಈ ಭಾಗದ ರೈತರು ಬೆಳೆಯುವ ತರಕಾರಿ ಪೂರೈಕೆಯು ಸ್ಥಗಿತಗೊಂಡಿದೆ. ಇದರ ಪರಿಣಾಮವಾಗಿ ಕೆಲ ತರಕಾರಿಗಳ ದರದಲ್ಲಿ ತೀವ್ರ ಇಳಿಕೆ ಕಂಡಿದೆ. ಗ್ರಾಹಕರಿಗೆ ಇದು ಸಂತಸದ ಸಂಗತಿಯಾಗಿದೆ.

ಜಿಲ್ಲೆಯ ಗ್ರಾಮೀಣ ಭಾಗದಿಂದ ಬರುವ ತರಕಾರಿಯನ್ನು ನಗರದ ಮಾರುಕಟ್ಟೆಯಿಂದ ನೆರೆ ರಾಜ್ಯಗಳ ಮುಂಬೈ, ಚೆನ್ನೈ ಸೇರಿದಂತೆ ವಿವಿಧ ನಗರಗಳಿಗೆ ಕಳಿಸಲಾಗುತ್ತದೆ. ಆದರೆ, ತೀವ್ರ ಮಳೆ, ಎಲ್ಲೆಂದರಲ್ಲಿ ಗುಡ್ಡ ಕುಸಿತದಂತಹ ಪ್ರಕರಣಗಳು ಹೆಚ್ಚುತ್ತಿರುವ ಪರಿಣಾಮವಾಗಿ ಅನ್ಯ ರಾಜ್ಯಗಳಿಗೆ ತರಕಾರಿ ಪೂರೈಕೆಯನ್ನು ಕೆಲ ದಿನಗಳಿಂದ ಸ್ಥಗಿತಗೊಳಿಸಲಾಗಿದೆ.

‘ಕೆಲವು ಹಸಿ ತರಕಾರಿಗಳನ್ನು ದೂರದ ನಗರಗಳಿಗೆ ವಾಹನಗಳಲ್ಲಿ ಕಳಿಸಲು 2–3 ದಿನಗಳು ಬೇಕಾಗುತ್ತವೆ. ಹೆಚ್ಚಿನ ತೇವಾಂಶದಿಂದಾಗಿ ತರಕಾರಿಯು ಅಲ್ಲಿಗೆ ಹೋಗುವ ಮೊದಲೇ ಹಾಳಾಗುತ್ತಿದೆ. ಗ್ರಾಮೀಣ ಭಾಗದಿಂದ ಅಧಿಕ ಪ್ರಮಾಣದ ತರಕಾರಿ ಮಾರುಕಟ್ಟೆಗೆ ಬರುತ್ತಿದ್ದು, ಕಡಿಮೆ ದರಕ್ಕೆ ಮಾರುತ್ತಿದ್ದೇವೆ’ ಎಂದು ತರಕಾರಿ ಸಗಟು ವ್ಯಾಪಾರಿ ಶೀಲಾ ಶ್ರೀನಿವಾಸ್‌ ಹೇಳಿದರು.

ಹಸಿ ಮೆಣಸಿನಕಾಯಿ, ಹೊಟ್ಟೆ ಮೆಣಸಿನಕಾಯಿ, ಆಲೂಗಡ್ಡೆ, ಕ್ಯಾರೆಟ್‌, ಈರುಳ್ಳಿ, ಬೆಂಡೆಕಾಯಿ, ಸೌತೆಕಾಯಿ, ಬದನೆಕಾಯಿ, ಚವಳೆಕಾಯಿ, ಬೀಟ್‌ರೂಟ್ ದರದಲ್ಲಿ ಕೊಂಚ ವ್ಯತ್ಯಾಸವಾಗಿದೆ. ಆದರೆ, ಟೊಮೆಟೊ, ಬೀನ್ಸ್‌, ಹಾಗಲಕಾಯಿ ದರದಲ್ಲಿ ತೀವ್ರ ಕುಸಿತ ಕಂಡಿದೆ. 

ಭಾನುವಾರ (ಆ.4ರಂದು) ಆಷಾಢ ಮುಗಿಯಲಿದ್ದು, ಶ್ರಾವಣ ಶುರುವಾಗಲಿದೆ. ಶ್ರಾವಣ ಮಾಸದಲ್ಲಿ ಕೆಲವರು ಮಾಂಸಾಹಾರ ಸೇವನೆ ತ್ಯಜಿಸಲಿದ್ದಾರೆ. ಇದರಿಂದಾಗಿ ತರಕಾರಿಗೆ ಹೆಚ್ಚಿನ ಬೇಡಿಕೆ ಸೃಷ್ಟಿಯಾಗಲಿದೆ. ಆಷಾಢದ ಕಾರಣಕ್ಕೆ ಮದುವೆ ಹಾಗೂ ಇನ್ನಿತರ ಶುಭ ಸಮಾರಂಭಗಳನ್ನು ಮುಂದೂಡಿದ್ದ ಜನರು, ಶ್ರಾವಣದಲ್ಲಿ ಶುಭ ಕಾರ್ಯ ನಡೆಸಲಿದ್ದಾರೆ. ಆಗಲೂ ಬೇಡಿಕೆಗೆ ಅನುಗುಣವಾಗಿ ದರದಲ್ಲಿ ವ್ಯತ್ಯಾಸ ಆಗಬಹುದು ಎಂಬುದು ವ್ಯಾಪಾರಿಗಳ ಹೇಳಿಕೆ.

ಸೊಪ್ಪುಗಳ ದರ ಏರಿಕೆ:

ಕೆಲ ದಿನಗಳ ಹಿಂದೆಯಷ್ಟೇ ತೀವ್ರ ಕುಸಿತ ಕಂಡಿದ್ದ ಸೊಪ್ಪುಗಳ ದರದಲ್ಲಿ ಇದೀಗ ಏರಿಕೆ ಕಂಡಿದೆ. ಈ ಹಿಂದೆ ಬಹುತೇಕ ಸೊಪ್ಪುಗಳನ್ನು ₹ 10 ಕ್ಕೆ 2 ಸಿವುಡಿನಂತೆ ಮಾರಾಟ ಮಾಡಲಾಗುತ್ತಿತ್ತು. ಇದೀಗ ಪಾಲಕ್‌, ಸಬ್ಬಸಗಿ, ಮೆಂತ್ಯೆ ಸೇರಿದಂತೆ ಬಹುತೇಕ ಸೊಪ್ಪುಗಳ ದರ ಪ್ರತಿ ಸಿವುಡಿಗೆ ₹ 6ರಿಂದ ₹ 7 ದರ ಇದೆ.