ಬಂಡಾಯ ಕಾಣಲಿಲ್ಲ... ಹೊಗಳುವುದು ಬಿಡಲಿಲ್ಲ!

ಹುಬ್ಬಳ್ಳಿ: ತಾಲ್ಲೂಕು ಸಾಹಿತ್ಯ ಸಮ್ಮೇಳನದ ಉದ್ಘಾಟನಾ ಭಾಷಣ ಮಾತನಾಡಿದ ಡಾ.ಸಿದ್ದಲಿಂಗಯ್ಯ ಅವರಲ್ಲಿ ಮೊದಲಿನ ಬಂಡಾಯ ಮನೋಭಾವ ಕಂಡು ಬರಲಿಲ್ಲ. ಸುಮಾರು ಒಂದು ಗಂಟೆಯ ಕಾಲ ಮಾಡಿದ ಭಾಷಣದಲ್ಲಿ ಅವರು ಹೆಚ್ಚು ಸಮಯವನ್ನು ಜನಪ್ರತಿನಿಧಿಗಳನ್ನು ಹೊಗಳುವುದಕ್ಕೆ ಮೀಸಲಿಟ್ಟರು!

ಸಾಹಿತ್ಯದ ಕುರಿತಂತೆ ಸಿದ್ಧಲಿಂಗಯ್ಯನವರ ಮಾತುಗಳನ್ನು ಕೇಳಲು ಬಂದಿದ್ದ ಸಾಹಿತ್ಯಾಭಿಮಾನಿಗಳಿಗೆ ಇದರಿಂದ ನಿರಾಸೆಯಾಯಿತು. ಅಧಿಕಾರಿಗಳ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದರೂ, ಜನಪ್ರತಿನಿಧಿಗಳ ವಿರುದ್ಧ ಅದೇ ಅಭಿಪ್ರಾಯ ವ್ಯಕ್ತಪಡಿಸಲು ಹೋಗಲಿಲ್ಲ.

‘ಸಾಹಿತಿಗಳು ಜನಪ್ರತಿನಿಧಿಗಳನ್ನು ತೆಗಳಲೇಬೇಕು ಎಂಬುದು ನಮ್ಮ ವಾದವಲ್ಲ. ಯುವ ಬರಹಗಾರರಿಗೆ ಸಾಹಿತ್ಯದ ಕುರಿತು ಸಲಹೆ ಕೊಡುವ ನಿಟ್ಟಿನಲ್ಲಿ ಅವರು ಈ ಅವಕಾಶವನ್ನು ಬಳಸಿಕೊಂಡಿದ್ದರೆ ಸಂತಸವಾಗುತ್ತಿತ್ತು. ಸ್ವಲ್ಪ ಹೆಚ್ಚೇ ಅನಿಸುವಷ್ಟು ಅವರು ಜನಪ್ರತಿನಿಧಿಗಳನ್ನು ಹೊಗಳಿದ್ದು ಸರಿ ಕಾಣಲಿಲ್ಲ’ ಎಂದು ಯುವ ಸಾಹಿತಿಯೊಬ್ಬರು ಬೇಸರ ವ್ಯಕ್ತಪಡಿಸಿದರು.