ಹುಬ್ಬಳ್ಳಿಯ ಅರ್ನಾ ಅಂಗಡಿಗೆ ಪ್ರಶಸ್ತಿ

ಹುಬ್ಬಳ್ಳಿ: ಕೋವಿಡ್‌ 19 ಬಂದ ಬಳಿಕ ಬಡವರು ಹಾಗೂ ಶ್ರೀಮಂತರ ಮೇಲೆ ಆದ ಸಾಮಾಜಿಕ ಪರಿಣಾಮಗಳ ಬಗ್ಗೆ ಚಿತ್ರ ಬಿಡಿಸಿದ ವಿಶ್ವೇಶ್ವರ ನಗರದ ಅರ್ನಾ ಅಂಗಡಿ ಅಂತರರಾಷ್ಟ್ರೀಯ ಆನ್‌ಲೈನ್ ಚಿತ್ರಕಲಾ ಸ್ಪರ್ಧೆಯಲ್ಲಿ ಮೊದಲ ಸ್ಥಾನ ಪಡೆದಿದ್ದಾಳೆ.

9 ವರ್ಷದ ಅರ್ನಾ ನಗರದ ರೋಟರಿ ಪಬ್ಲಿಕ್‌ ಶಾಲೆಯಲ್ಲಿ ನಾಲ್ಕನೇ ತರಗತಿ ಓದುತ್ತಿದ್ದಾಳೆ. ಜುಲೈ 15ರಿಂದ 31ರ ವರೆಗೆ ನಡೆದ ಸ್ಪರ್ಧೆಯಲ್ಲಿ ಭಾರತದಿಂದ ಪಾಲ್ಗೊಂಡಿದ್ದ ಏಕೈಕ ಸ್ಪರ್ಧಿ. ಅರ್ನಾ, ಬಸವರಾಜ ಅಂಗಡಿ ಹಾಗೂ ಸವಿತಾ ದಂಪತಿಯ ಪುತ್ರಿ.‌

‘ಸ್ಪರ್ಧೆಯಲ್ಲಿ ಪಾಕಿಸ್ತಾನ, ಇಂಗ್ಲೆಂಡ್‌, ಮಾರಿಷಸ್‌, ಫಿಲಿಪ್ಪೀನ್ಸ್‌ ಸೇರಿದಂತೆ ಹತ್ತಕ್ಕೂ ಹೆಚ್ಚು ದೇಶಗಳ 110 ಸ್ಪರ್ಧಿಗಳು ಪಾಲ್ಗೊಂಡಿದ್ದರು. ಇಷ್ಟೊಂದು ದೊಡ್ಡ ಮಟ್ಟದ ಸ್ಪರ್ಧೆಯಲ್ಲಿ ಮಗಳು ಮೊದಲ ಸ್ಥಾನ ಪಡೆದಿದ್ದಕ್ಕೆ ಅತೀವ ಸಂತೋಷವಾಗಿದೆ’ ಎಂದರು.