ಹೆಸ್ಕಾಂ, ಪಾಲಿಕೆ ಅಧಿಕಾರಿಗಳ ಜಾಣ ಕುರುಡು: ಕೇಬಲ್‌ ಅವಾಂತರ; ಓಡಾಟಕ್ಕೆ ಸಂಕಷ್ಟ

ಧಾರವಾಡ: ವಿವಿಧ ನೆಟ್‌ವರ್ಕ್‌ (ಒಎಫ್‌ಸಿ, ಎಫ್‌ಟಿಟಿಎಚ್‌, ಫೋನ್‌, ಟಿ.ವಿ...) ಕೇಬಲ್‌ಗಳು ನಗರದ ಹಲವೆಡೆ ಪಾದಚಾರಿ ಮಾರ್ಗದಲ್ಲಿ ನೆಲಕ್ಕೆ ತಾಗಿವೆ. ಕೆಲವೆಡೆ ತುಂಡಾಗಿದ್ದು, ಇನ್ನು ಕೆಲವೆಡೆ ಕೈಗೆಟುಕುವ ಅಂತರದಲ್ಲಿವೆ. ಬಹುತೇಕ ಕಡೆ ವಿದ್ಯುತ್‌ ಕಂಬಗಳು, ಬಡಾವಣೆಯ ರಸ್ತೆ ಫಲಕಗಳಲ್ಲಿ ಕೇಬಲ್‌ ಸಿಂಬೆಗಳು ಜೋತುಬಿದಿದ್ದು, ಜನರಿಗೆ ಓಡಾಡುವುದಕ್ಕೆ ತೊಡಕಾಗಿವೆ.

ನಗರದ ಡಿ.ಸಿ ಕಂಪೌಂಡ್‌ ಸುತ್ತಮುತ್ತ, ಜಯನಗರ, ಸಪ್ತಾಪೂರ, ಸಹಿತ ಬಹಳಷ್ಟು ಕಡೆ ಪಾದಚಾರಿ ಮಾರ್ಗಗಳಲ್ಲಿ ಈ ಸಮಸ್ಯೆ ಇದೆ. ಬಿಆರ್‌ಟಿಎಸ್‌ ವಿಭಜಕದಲ್ಲಿ ಅಳವಡಿಸಿರುವ ಬೇಲಿಯಲ್ಲೂ ಕೆಲವೆಡೆ ಕೇಬಲ್‌ ಆವಾಂತರ ಇದೆ.

ಡಿ.ಸಿ.ಕಂಪೌಂಡದಲ್ಲಿನ ನೀರಾವರಿ ಎಂಜಿನಿಯರ್‌ ಕಚೇರಿ ಕಾಂಪೌಂಡ್‌ ಬದಿ, ಎದುರಿನ ಕಚೇರಿಯ ಕಾಂಪೌಂಡ್‌ ಬದಿ, ಈ ಪ್ರದೇಶದಲ್ಲಿನ ಮರಗಳಲ್ಲಿ ಕೇಬಲ್‌ಗಳು ಬಿದ್ದಿವೆ. ಬಿಡಾಡಿ ರಾಸು, ಪಾದಚಾರಿಗಳು ಕೇಬಲ್‌ ತುಳಿದು–ಎಡವಿ ಬಿದ್ದಿರುವ ನಿದರ್ಶನಗಳು ಇವೆ. ಕೆಲವು ಕಡೆ ರಸ್ತೆಯಲ್ಲಿ ಅಡ್ಡಲಾಗಿಯೂ (ಒಂದು ಬದಿ ಮರ–ಕಂಬದಿಂದ ಮತ್ತೊಂದು ಬದಿಯ ಮರ–ಕಂಬಕ್ಕೆ ಅಳವಡಿಕೆ) ಕೆಲವು ಕಡೆ ಕೇಬಲ್‌ ಅಳವಡಿಸಲಾಗಿದೆ.

‘ಮಳೆ, ಗಾಳಿ ಸಂದರ್ಭದಲ್ಲಿ ಯಾವ ವಾಹನ, ವ್ಯಕ್ತಿಯ ಮೇಲೆ ಕೇಬಲ್‌ಗಳು ಬೀಳುತ್ತದೆ ಎಂದು ಹೇಳಲಾರದ ಸ್ಥಿತಿ ಇದೆ. ಹುಬ್ಬಳ್ಳಿ ವಿದ್ಯುತ್‌ ಸರಬರಾಜು ಕಂಪನಿ ನಿಯಮಿತ ಮತ್ತು ಹುಬ್ಬಳ್ಳಿ–ಧಾರವಾಡ ಮಹಾನಗರ ಪಾಲಿಕೆಯವರು ಜಾಣ ಕುರುಡು ಪ್ರದರ್ಶಿಸುತ್ತಾರೆ. ಪಾದಚಾರಿ ಮಾರ್ಗದಲ್ಲಿ ಕೇಬಲ್‌ಗಳ ಸಮಸ್ಯೆ ಗೊತ್ತಿದ್ದರೂ ಅದನ್ನು ನಿವಾರಿಸಲು ಕ್ರಮ ವಹಿಸಿಲ್ಲ’ ಎಂದು ಪಿಯು ಉಪನ್ಯಾಸಕಿ ರೂಪಾ ಟಿ.ಪಾಟೀಲ್‌ ದೂರುತ್ತಾರೆ.

ಹೆಚ್ಚು ಕೇಬಲ್‌ ಹಾಕಿರುವ, ಸಿಂಬೆ ಜೋತು ಹಾಕಿರುವ ಕೆಲವು ವಿದ್ಯುತ್‌ ಕಂಬಗಳು ಕೊಂಚ ವಾಲಿರುವುದು ಕೆಲವು ಕಡೆ ಇದೆ. ಶಿಥಿಲವಾಗಿರುವ ಕಂಬಗಳಲ್ಲಿನ ಸಿಂಬೆಗಳು ರಭಸದ ಮಳೆ, ಜೋರು ಗಾಳಿ ಸಂದರ್ಭದಲ್ಲಿ ಜೋಲಾಡುತ್ತವೆ. ಜನರು ಪಾದಚಾರಿ ಮಾರ್ಗದಲ್ಲಿ ಅಪಾಯದ ಮಗ್ಗುಲಿನಲ್ಲಿ ನಡೆದಾಡುವಂತಾಗಿದೆ.

‘ರಸ್ತೆ ಬದಿ ಪಾದಚಾರಿ ಮಾರ್ಗದ ವೃಕ್ಷಗಳು, ಕಟ್ಟಡಗಳ ಕಾಪೌಂಡ್‌ಗಳು ಸಹಿತ ಎಲ್ಲೆಂದರಲ್ಲಿ ಕೇಬಲ್‌ ಅಳವಡಿಸಬಾರದು. ಅವಾಂತರಗಳಿಗೆ ಪಾಲಿಕೆ ಮತ್ತು ಹೆಸ್ಕಾಂನವರ ಬೇಜವಾಬ್ದಾರಿತನ ಕಾರಣ. ಈ ಬಗ್ಗೆ ಹಲವು ಬಾರಿ ಪಾಲಿಕೆಯವರಿಗೆ ದೂರು ನೀಡಿದರೂ ಸರಿಯಾಗಿ ಕ್ರಮ ವಹಿಸಿಲ್ಲ. ನಿಯಮಿತವಾಗಿ ಮಾರ್ಗ ನಿರ್ವಹಣೆ ಮಾಡಬೇಕು. ಅನಧಿಕೃತ ಕೇಬಲ್‌ ತೆರವಿಗೆ ಸಂಸ್ಥೆಗಳು ಕ್ರಮ ವಹಿಸಬೇಕು’ ಎಂದು ಹುಬ್ಬಳ್ಳಿ–ಧಾರವಾಡ ನಾಗರಿಕ ಪರಿಸರ ಸಮಿತಿ ಅಧ್ಯಕ್ಷ ಶಂಕರ ಕುಂಬಿ ಒತ್ತಾಯಿಸುತ್ತಾರೆ.