ಧಾರವಾಡ | 37 ಮಂದಿಗೆ ವಾಂತಿಭೇದಿ; ಕಲುಷಿತ ನೀರು ಸೇವನೆ ಶಂಕೆ

ಧಾರವಾಡ: ಕಲಘಟಗಿ ತಾಲ್ಲೂಕಿನ ಮುತ್ತಿಗೆ ಗ್ರಾಮದಲ್ಲಿ 37 ಮಂದಿಗೆ ವಾಂತಿ ಭೇದಿಯಾಗಿ ತಾಲ್ಲೂಕು ಆಸ್ಪತ್ರೆಗೆ ದಾಖಲಾಗಿದ್ದಾರೆ. ಕಲುಷಿತ ನೀರು ಸೇವನೆಯಿಂದ ವಾಂತಿ ಭೇದಿಯಾಗಿದೆ ಎಂದು ಶಂಕಿಸಲಾಗಿದೆ.

ತೀವ್ರ ಅಸ್ವಸ್ಥರಾಗಿದ್ದ ಐವರನ್ನು ಹೆಚ್ಚಿನ ಚಿಕಿತ್ಸೆಗಾಗಿ ಹುಬ್ಬಳ್ಳಿಯ ಕಿಮ್ಸ್‌ ಆಸ್ಪತ್ರೆಗೆ ಕಳಿಸಲಾಗಿದೆ. ಉಳಿದವರಿಗೆ ತಾಲ್ಳೂಕು ಆಸ್ಪತ್ರೆಯಲ್ಲಿ ಚಿಕಿತ್ಸೆ ನೀಡಲಾಗುತ್ತಿದೆ.

‘ಆಸ್ಪತ್ರೆಗೆ ದಾಖಲಾಗಿರುವವರಲ್ಲಿ ಬಹತೇಕರು ಚೇತರಿಸಿಕೊಂಡಿದ್ದಾರೆ. ವಾಂತಿ, ಭೇದಿಗೆ ಕುಲಷಿತ ನೀರು ಸೇವನೆ ಕಾರಣ ಎಂದು ಮಲ್ನೋಟಕ್ಕೆ ಕಂಡುಬಂದಿದೆ. ನೀರನ್ನು ಪರೀಕ್ಷೆಗೆ ಕಳಿಸಲಾಗಿದೆ’ ಎಂದು ವೈದ್ಯ ಸಿದ್ದರಾಯ ಕಪ್ಪಸದ ‘ಪ್ರಜಾವಾಣಿ’ಗೆ ತಿಳಿಸಿದರು.

‘ಪುತ್ರಿ ಸಹನಾ ಮತ್ತು ತಾಯಿ ಗಿರಿಜಮ್ಮ ಇಬ್ಬರೂ ವಾಂತಿ ಭೇದಿಯಾಗಿ ಅಸ್ವಸ್ಥರಾಗಿದ್ದಾರೆ. ಆಸ್ಪತ್ರೆಗೆ ದಾಖಲಿಸಿದ್ದೇನೆ. ಗ್ರಾಮದ ನೀರಿನ ಟ್ಯಾಂಕ್‌ ಸ್ವಚ್ಛಗೊಳಿಸಿಲ್ಲ. ನೀರಿನ ಸಮಸ್ಯೆಯೇ ಜನರು ಅಸ್ವಸ್ಥರಾಗಲು ಕಾರಣ’ ಎಂದು ಗ್ರಾಮ ಪಂಚಾಯಿತಿ ಮಾಜಿ ಸದಸ್ಯ ಚನ್ನಬಸಪ್ಪ ಜಿಮ್ಮಿಹಾಳ ತಿಳಿಸಿದರು.