ಮುಂಡಗೋಡ | ಅಡಿಕೆ ಬೆಳೆಗೆ ಕೊಳೆರೋಗದ ಆತಂಕ

ಮುಂಡಗೋಡ: ಮಳೆಯಿಂದ ಅಡಿಕೆ ಬೆಳೆಗೆ ಕೊಳೆರೋಗ ಕಾಣಿಸಿಕೊಂಡು, ಅಡಿಕೆ ಉದುರುತ್ತಿದೆ.

ತಾಲ್ಲೂಕಿನ ಬೆಡಸಗಾಂವ ಗ್ರಾಮ ಪಂಚಾಯಿತಿ ವ್ಯಾಪ್ತಿಯಲ್ಲಿ ನಿರಂತರ ಮಳೆಗೆ ಅಡಿಕೆಗೆ ಕೊಳೆ ರೋಗ ಬಂದಿದೆ. ಕೊಳೆರೋಗ ನಿಯಂತ್ರಣಕ್ಕೆ 2 ರಿಂದ3 ಸಲ ತುತ್ತಸುಣ್ಣ ಸಿಂಪರಣೆ ಮಾಡಿದರೂ, ರೋಗ ನಿಯಂತ್ರಣ ಆಗುತ್ತಿಲ್ಲ. ಅಡಿಕೆ ಉದುರುವುದು ಮುಂದುವರೆದಿದೆ. ಇದರಿಂದ ಅಡಿಕೆ ಬೆಳೆಗಾರರಲ್ಲಿ ಆತಂಕ ಮೂಡಿದ್ದು, ಸಂಬಂಧಿಸಿದ ಇಲಾಖೆಯವರು ಈ ಕುರಿತು ಪರಿಶೀಲನೆ ಮಾಡಬೇಕು ಎಂದು ಅಡಿಕೆ ಬೆಳೆಗಾರರಾದ ದೇವೇಂದ್ರ ನಾಯ್ಕ ಒತ್ತಾಯಿಸಿದರು.

‘ಸಾಲಸೋಲ ಮಾಡಿ ಅಡಿಕೆ ಬೆಳೆದಿದ್ದು, ಕೈಗೆ ಬಂದ ಫಸಲು ಬಾಯಿಗೆ ಬರದಂತೆ ಆಗಿದೆ. ಈ ಭಾಗದಲ್ಲಿ ಅಡಿಕೆ ಬೆಳೆದಿರುವ ಗೌರಿ ನಾಯ್ಕ, ಫಕ್ಕೀರಪ್ಪ ನಾಯ್ಕ, ಶ್ರೀಪಾದ ಹೆಗಡೆ, ಶ್ರೀನಿವಾಸ ನಾಯ್ಕ, ಅಶೋಕ ನಾಯ್ಕ, ಲಕ್ಷ್ಮಣ ನಾಯ್ಕ, ಪರಮೇಶ್ವರ ನಾಯ್ಕ ಸೇರಿದಂತೆ ಹಲವು ರೈತರು ಅಡಿಕೆ ಕೊಳೆ ರೋಗದಿಂದ ಹಾನಿ ಅನುಭವಿಸಿದ್ದಾರೆ‌’ ಎಂದು ಅವರು ಹೇಳಿದರು.