ಸರ್ಕಾರಿ ಶಾಲೆ ಮಕ್ಕಳಿಗೂ ಗುಣಮಟ್ಟದ ಶಿಕ್ಷಣ, ಸೌಲಭ್ಯ ದೊರೆಯಲಿ: ನ್ಯಾ. ಮಹಮ್ಮದಅಲಿ

ನವಲಗುಂದ: ‘ಸ್ಪರ್ಧಾತ್ಮಕ ಯುಗದಲ್ಲಿ ಖಾಸಗಿ ಶಾಲೆ ವಿದ್ಯಾರ್ಥಿಗಳಂತೆ ಸರ್ಕಾರಿ ಶಾಲೆ ವಿದ್ಯಾರ್ಥಿಗಳಿಗೂ ಗುಣಮಟ್ಟದ ಶಿಕ್ಷಣ ಹಾಗೂ ಸೌಲಭ್ಯ ದೊರೆಯಲಿ’ ಎಂದು ಶಿವಮೊಗ್ಗ ನ್ಯಾಯಾಲಯದ ನ್ಯಾಯಾಧೀಶ ಮಹಮ್ಮದಅಲಿ ಪೀರಸಾಬ ನಾಯಕ ಹೇಳಿದರು.

ಶಲವಡಿ ಗ್ರಾಮದ ಶ್ರೀ ಗುರುಶಾಂತೇಶ್ವರ ಸರ್ಕಾರಿ ಪ್ರೌಢಶಾಲೆಯ ಎಸ್ಎಸ್ಎಲ್‌ಸಿ ವಿದ್ಯಾರ್ಥಿಗಳ ದತ್ತಿ ನಿಧಿಗೆ ಅವರು ಶನಿವಾರ ₹50 ಸಾವಿರ ದೇಣಿಗೆ ನೀಡಿ ಮಾತನಾಡಿದರು.

ಪ್ರಧಾನ ಗುರು ಎನ್.ವಿ. ಕುರವತ್ತಿಮಠ ಮಾತನಾಡಿ, ‘ನಮ್ಮ ಶಾಲೆಯ ಹಳೆಯ ವಿದ್ಯಾರ್ಥಿಯಾದ ಮಹಮ್ಮದಅಲಿ ನಾಯಕ ಅವರ ದತ್ತಿನಿಧಿಯಿಂದ ಸರ್ಕಾರಿ ಶಾಲೆಗೆ ಬರುವ ಬಡ ಮಕ್ಕಳ ಶಿಕ್ಷಣಕ್ಕೆ ಮತ್ತಷ್ಟು ಅನುಕೂಲವಾಗಲಿದೆ. ಈ ದೇಣಿಗೆ ಹಣವನ್ನು ಶಾಲೆ ಹೆಸರಿನಲ್ಲಿ ಠೇವಣಿ ಮಾಡಲಾಗುವುದು’ ಎಂದರು.

ಅತಿಥಿ ಶಿಕ್ಷಕರಾದ ಎಸ್.ಎಸ್. ಲಾಂಡೆ, ಎಂ.ಎ. ಹತ್ತಿ, ಅರಣ್ಯ ಅಧಿಕಾರಿ ರೆಹಮಾನ ಸಾಬ್ ಪೀರಸಾಬ್ ನದಾಫ್, ಎಸ್‌ಡಿ‌ಎಂಸಿ ಕಾರ್ಯಾಧ್ಯಕ್ಷ ಉಮೇಶ ಶಿರೋಳ ಹಾಗೂ ಪದಾಧಿಕಾರಿಗಳು, ಸದಸ್ಯರು ಇದ್ದರು.