ಧಾರವಾಡ | ಕೃಷಿ ಮೇಳದಲ್ಲಿ ಆಕರ್ಷಿಸಿದ ಜಲಚರ ಕೀಟಗಳ ಅಕ್ವೇರಿಯಂ

ಧಾರವಾಡ: ಮೀನಿನ ಅಕ್ವೇರಿಯಂ ಎಲ್ಲರಿಗೂ ಗೊತ್ತು. ಅದರಲ್ಲೂ ವಾಸ್ತು ಮೀನಿನ ಅಕ್ವೇರಿಯಂಗೆ ವಿಶೇಷ ಸ್ಥಾನಮಾನ, ಮೌಲ್ಯ ಇದೆ. ಆದರೆ, ಜಲಚರ ಕೀಟಗಳ ಅಕ್ವೇರಿಯಂ ಬಗ್ಗೆ ಕೇಳಿದ್ದೀರಾ?

ಜಲಚರ ಕೀಟಗಳ ಅಕ್ವೇರಿಯಂ ಈ ಬಾರಿಯ ಕೃಷಿ ಮೇಳದ ಫಲ–ಪುಷ್ಪ ಪ್ರದರ್ಶನ ವಿಭಾಗದ ಕೀಟಪ್ರಪಂಚದಲ್ಲಿ ನೋಡುಗರ ಆಕರ್ಷಣೆಯ ಕೇಂದ್ರಬಿಂದುವಾಗಿದೆ.

ನೀರ್ಚೇಳು, ಉಲ್ಟಾ ಈಜುವ ನೀರು ತಿಗಣಿ, ನೀರಿನ ಜಿರಲೆ, ಹಳದಿ ಚುಕ್ಕೆಯುಳ್ಳ ಮುಳುಗುವ ದುಂಬಿ, ವಾಟರ್‌ ಬೋಟ್‌ಮ್ಯಾನ್‌, ಮಳೆ ಹುಳುಗಳು ಅಕ್ವೇರಿಯಂನಲ್ಲಿ ಈಜಾಡಿ ನೋಡುಗರ ಹುಬ್ಬೇರಿಸುತ್ತಿವೆ.

ರೈತರಿಗೆ ಈ ಜಲಚರ ಕೀಟಗಳು ಪರಿಚಿತ. ಆದರೆ ಹೆಚ್ಚಿನವರಿಗೆ ಅಪರಿಚಿತವೆನಿಸುವ ಈ ಜಲಚರಕೀಟಗಳನ್ನು ಅಕ್ವೇರಿಯಂನಲ್ಲಿಟ್ಟು ನೋಡುಗರನ್ನು ಆಕರ್ಷಿಸುವಂತೆ ಮಾಡಿದವರು ಧಾರವಾಡ ಕೃಷಿ ವಿಶ್ವವಿದ್ಯಾಲಯದ ಕೀಟಶಾಸ್ತ್ರ ವಿಭಾಗದ ಶಿವಕುಮಾರ ಕೆ.ಟಿ.

ಕಳೆದ ವರ್ಷ, ಭವಿಷ್ಯದ ಆಹಾರವಾಗಲಿರುವ ಕೀಟಗಳ ಆಹಾರದ ಪ್ರಾತ್ಯಕ್ಷಿಕೆ ಸಿದ್ಧಪಡಿಸಲಾಗಿತ್ತು.  ಮುಂದುವರಿದ ಭಾಗವಾಗಿ ಈ ವರ್ಷ ಜಲಚರ ಕೀಟಗಳ ಅಕ್ವೇರಿಯಂ ಅನ್ನು ಸಿದ್ಧಪಡಿಸಲಾಗಿದೆ ಎಂದು ಶಿವಕುಮಾರ ಕೆ.ಟಿ. ‘ಪ್ರಜಾವಾಣಿ’ಗೆ ವಿವರಿಸಿದರು.

ಅಕ್ವೇರಿಯಂನಲ್ಲಿ ಇರುವ ಜಲಚರ ಕೀಟಗಳನ್ನು ಕುತೂಹಲದಿಂದ ನೋಡಿ ಕೆಲವರು ಅಚ್ಚರಿ ಪಟ್ಟರೆ, ಕೆಲವು ಮಕ್ಕಳು ಕೈಯಲ್ಲಿ ಹಿಡಿದು ಪುಳಕಗೊಂಡರು.