ಧಾರವಾಡ | ನಿರ್ವಹಣೆ, ಮೂಲಸೌಕರ್ಯ ಕೊರತೆ: ಅವಳಿನಗರದ ರಂಗಮಂದಿರ ದುಸ್ಥಿತಿ

ಧಾರವಾಡ: ಅವಳಿನಗರಗಳ ಬಹುತೇಕ ರಂಗಮಂದಿರಗಳು ದುಃಸ್ಥಿತಿಯಲ್ಲಿವೆ. ಇದು ನಾಟಕ ಪ್ರದರ್ಶನ, ರಂಗ ತಾಲೀಮು ಮೊದಲಾದ ಚಟುವಟಿಕೆಗಳಿಗೆ ಸಮಸ್ಯೆಯಾಗಿ ಪರಿಣಮಿಸಿದೆ.

ಸಾಂಸ್ಕೃತಿಕ ನಗರವೆಂದು ಕರೆಯುವ ಧಾರವಾಡದಲ್ಲಿ ಈಗ ಕೆಲವೇ ರಂಗಮಂದಿರಗಳಲ್ಲಿ ರಂಗಭೂಮಿ ಚಟುವಟಿಕೆಗಳು ನಡೆಯುತ್ತವೆ. ಮೂಲಸೌಕರ್ಯಗಳ ಕೊರತೆ ಮತ್ತು ಅವ್ಯವಸ್ಥೆಗಳಿಂದ ನಲುಗಿರುವ ರಂಗತಾಣಗಳಿಗೆ ಕಾಯಕಲ್ಪಿಸಲು ಸಂಬಂಧಪಟ್ಟವರು ಕ್ರಮವಹಿಸಿಲ್ಲ.

ಧಾರವಾಡದಲ್ಲಿ ರಂಗಾಯಣ ಇದ್ದರೂ ಅನುದಾನ ಕೊರತೆ, ಸವಲತ್ತುಗಳ ಕೊರತೆಯಿಂದಾಗಿ ರಂಗಚಟುವಟಿಕೆಗಳು ಸೊರಗಿವೆ. ಬಹುತೇಕ ರಂಗಮಂದಿರಗಳಲ್ಲಿ ಬೆಳಕು, ಧ್ವನಿ ‌ವ್ಯವಸ್ಥೆ ಸಹಿತ ಸುಸಜ್ಜಿತ ಸಕಲ ಸೌಕರ್ಯಗಳು ಇಲ್ಲ.

ಇದ್ದೂ ಇಲ್ಲದಂತಾದ ಕಲಾಭವನ:

ಕಡಪಾ ಮೈದಾನದಲ್ಲಿನ ಡಾ.ಮಲ್ಲಿಕಾರ್ಜುನ ಮನ್ಸೂರ ಕಲಾಭವನ ದುಃಸ್ಥಿತಿಯಲ್ಲಿದೆ. ನಗರದ ಹೃದಯ ಭಾಗದಲ್ಲಿರುವ ಈ ಕಟ್ಟಡ ಇದ್ದೂ ಇಲ್ಲದಂತಾಗಿದೆ. ಈ ಕಟ್ಟಡದ ಒಂದು ಪಾರ್ಶ್ವದಲ್ಲಿ ಪಾಲಿಕೆಯ ವಲಯ–12 ಕಚೇರಿ ಇದೆ.

ಕಲಾ ಭವನದಲ್ಲಿ ಕಾರ್ಯಚಟುವಟಿಕೆಗಳು ಸ್ಥಗಿತವಾಗಿ ದಶಕ ಕಳೆದರೂ ಈವರೆಗೆ ಕಾಯಕಲ್ಪ ಕಲ್ಪಿಸಿಲ್ಲ. ಧಾರವಾಡದಲ್ಲಿ ಪಾಲಿಕೆ ಕಚೇರಿ ಪಕ್ಕದಲ್ಲೇ ಕಲಾ ಭವನ ಇದೆ. ಭವನದ ಒಳಗೆ‌ ಮತ್ತು ಹೊರಗೆ ಪ್ಲಾಸ್ಟಿಕ್‌ ಪೊಟ್ಟಣ, ಕಸ ಬಿದ್ದಿದೆ. ಕಟ್ಟಡದ ಗೋಡೆಗಳ ಮಗ್ಗುಲಿನ ಜಾಗ, ಪ್ರವೇಶ ದ್ವಾರದ ಮೆಟ್ಟಿಲುಗಳಲ್ಲಿ ಬೀಡಾಡಿ ಜಾ‌ನುವಾರುಗಳು ‌ಇರುತ್ತವೆ. ಕಟ್ಟಡ ಪ್ರದೇಶವು ಅಕ್ರಮ ಚಟುವಟಿಕೆಗಳ (ಮದ್ಯ ಸೇವನೆ, ಧೂಮಪಾನ...) ತಾಣವಾಗಿದೆ.

ಮದ್ಯ ಸೇವಿಸಿ ಕೆಲವರು ಕಟ್ಟಡದ ಬಾಗಿಲ ಮುಂಭಾಗದಲ್ಲೇ ಪವಡಿಸಿರುತ್ತಾರೆ. ಭವನದ ಆವರಣದಲ್ಲಿ ವಸ್ತು ಪ್ರದರ್ಶನ–ಮಾರಾಟ ಮೇಳಗಳು ನಡೆಯುತ್ತವೆ. ಪಾಲಿಕೆಯ ಕಸ ಸಂಗ್ರಹ ವಾಹನಗಳನ್ನು ನಿಲುಗಡೆ ಮಾಡಲಾಗುತ್ತದೆ.

ಬಯಲು ರಂಗಮಂದಿರ ಸ್ಥಿತಿ ಶೋಚನೀಯ:

ನಗರದ ರಂಗಾಯಣದ ಆವರಣದಲ್ಲಿರುವ ಬಯಲು ರಂಗಮಂದಿರವು ನಿರ್ವಹಣೆ ಕೊರತೆಯಿಂದಾಗಿ ಶೋಚನೀಯ ಸ್ಥಿತಿಗೆ ತಲುಪಿದೆ. ಪ್ರದರ್ಶನಗಳು ಜರುಗದೆ ಬಹುದಿನಗಳಾಗಿವೆ.

ಆಸನ ಕಟ್ಟೆಗಳು ಬಹುತೇಕ ಪಾಚಿಕಟ್ಟಿವೆ. ಆಸನ ಕಟ್ಟೆ ಮೇಲಿನ ಭಾಗದಲ್ಲಿ ಹುಲ್ಲು, ಗಿಡಗಂಟಿಗಳು ಬೆಳೆದಿವೆ. ಕಸಕಡ್ಡಿ ಬಿದ್ದಿವೆ. ಪೊದೆಗಳು ಹಾವು, ಹುಳಹುಪ್ಪಟೆಗಳ ತಾಣಗಳಾಗಿವೆ.

ನಾಟಕ ಪ್ರದರ್ಶನ ವೇದಿಕೆ ಭಾಗದ ಶೆಡ್‌ ಮಳಿಗೆಯಲ್ಲಿ ಹಲಗೆಗಳು, ಸ್ಟ್ಯಾಂಡ್‌ಗಳು ಮೊದಲಾದವನ್ನು ತುಂಬಲಾಗಿದೆ. ಪ್ರವೇಶ ದ್ವಾರದ (ಗೇಟಿನ ಪಕ್ಕ) ಗೋಡೆ ಪಕ್ಕದ ರಂಗಜಗುಲಿಯಲ್ಲಿ ನಿರುಪಯುಕ್ತ ಚೀಲಗಳು, ಕಬ್ಬಿಣದ ಸರಳುಗಳು, ಹರಿದ ಬ್ಯಾನರ್‌ಗಳು, ಗೂಟದ ಕಟ್ಟಿಗೆಗಳನ್ನು ಗುಡ್ಡೆ ಹಾಕಲಾಗಿದೆ.

ಬಯಲು ರಂಗಮಂದಿರ ಜಾಗವು ಪಾಲಿಕೆ ಒಡೆತನದಲ್ಲಿದೆ. ಪಾಲಿಕೆಯು ರಂಗಾಯಣಕ್ಕೆ ಜಾಗವನ್ನು ಲೀಸ್‌ಗೆ ನೀಡಿದೆ. ರಂಗಚಟುವಟಿಕೆಗಳಿಗೆ ಸೌಲಭ್ಯಗಳನ್ನು ಕಲ್ಪಿಸಿ, ಸುಸಜ್ಜಿತಗೊಳಿಸಲು ಸರ್ಕಾರವು ಕ್ರಮ ವಹಿಸಬೇಕು ಎಂಬುದು ಕಲಾಭಿಮಾನಿಗಳು, ಕಲಾವಿದರ ಮೊರೆ.

ರಂಗಾಯಣದ ಸಾಂಸ್ಕೃತಿಕ ಸಮುಚ್ಚಯದಲ್ಲಿನ ವೇದಿಕೆಯಲ್ಲಿ (ಒಳಾಂಗಣ) ನಾಟಕ ಪ್ರದರ್ಶನಗಳು ನಡೆಯುತ್ತವೆ. ಈ ವೇದಿಕೆ ಸಣ್ಣ ಮಂದಿರದಲ್ಲಿ ಇದೆ. ಇಲ್ಲಿ ಸಭಾ ಕಾರ್ಯಕ್ರಮಗಳು ಜರುಗುತ್ತವೆ.

ರಂಗಮಂದಿರ ಅವ್ಯವಸ್ಥೆ:

ಸಾಧನಾ ಕೇರಿಯ ಕೆರೆ ಅಂಗಳದಲ್ಲಿನ ಬಯಲು ರಂಗಮಂದರಿವು ಅವವ್ಯವಸ್ಥೆಗಳ ತಾಣವಾಗಿದೆ. ಈ ರಂಗಮಂದಿರದಲ್ಲೂ ರಂಗಚಟುವಟಿಕೆಗಳು ಜರುಗದೆ ಬಹಳ ದಿನಗಳಾಗಿವೆ.

ಆಸನದ ಕಟ್ಟೆಗಳಲ್ಲಿ ಹುಲ್ಲು, ಸಸ್ಯಗಳು ಬೆಳೆದಿವೆ. ವೇದಿಕೆ ಗೋಡೆ ಕೆಲವೆಡೆ ಪಾಚಿಗಟ್ಟಿದೆ. ಈ ಜಾಗವು ಉದ್ಯಾನಕ್ಕೆ ಭೇಟಿ ನೀಡುವ ಜೋಡಿಗಳು, ಯುವಕಯುವತಿಯರ ‘ಹರಟೆ’ ತಾಣವಾಗಿದೆ.

‘ಈ ಬಯಲುಮಂದಿರದಲ್ಲಿ ಇಲ್ಲಿ ವ್ಯವಸ್ಥಿತ ಸೌಕರ್ಯಗಳು ಇಲ್ಲ. ಕೋವಿಡ್‌ ನಂತರ ಈ ಬಯಲು ರಂಗ‌ಮಂದಿರದಲ್ಲಿ ನಾಟಕ ಪ್ರದರ್ಶನ ನಡೆಯುತ್ತಿಲ್ಲ’ ಎಂದು ಉದ್ಯಾನದ ಸಿಬ್ಬಂದಿಯೊಬ್ಬರು ತಿಳಿಸಿದರು.

ವೇದಿಕೆ ಗೋಡೆಯು ಶಿಥಿಲವಾಗಿದೆ. ಗೋಡೆ ಹಿಂಬದಿ ನಿರ್ಮಿಸಿರುವ ಕೊಠಡಿಯ ಚಾವಣಿಗೆ ಅಳವಡಿಸಿರುವ ಕೆಲವು ಹಂಚುಗಳು ಚೂರಾಗಿವೆ. ಮಳೆಯಾದಾಗ ನೀರು ಸೋರಿಕೆಯಾಗುತ್ತದೆ. ಇಲ್ಲಿ ಅಳವಡಿಸಿರುವ ಕುಡಿಯುವ ನೀರಿನ ಘಟಕವು ಹಾಳಾಗಿದೆ.

‘ದ.ರಾ.ಬೇಂದ್ರೆ‌ ಟ್ರಸ್ಟ್‌ ಕಟ್ಟಡ ಹಿಂಭಾಗದಲ್ಲಿ ಚಿಕ್ಕದೊಂದು ಬಯಲು ರಂಗವೇದಿಕೆ ಇದೆ. ಈ ವೇದಿಕೆ ಬಳಕೆಯಾಗುತ್ತಿಲ್ಲ.

‘ಈ ರಂಗವೇದಿಕೆಯಲ್ಲಿ ಚಟುವಟಿಕೆಗಳು ನಡೆಯುವುದಿಲ್ಲ. ಟ್ರಸ್ಟ್‌ಗೆ ₹ 5 ಲಕ್ಷ ಅನುದಾನ ಮಂಜೂರಾಗಿದೆ. ಕಚೇರಿ ಕೊಠಡಿ ನಿರ್ಮಾಣ, ಇತರ ಅಭಿವೃದ್ಧಿ ಕಾಮಗಾರಿ ನಡೆಯಲಿದೆ’ ಎಂದು ಟ್ರಸ್ಟ್‌ ನೌಕರರೊಬ್ಬರು ತಿಳಿಸಿದರು.

ಕರ್ನಾಟಕ ವಿದ್ಯಾಲಯ (ಕೆಸಿಡಿ) ಆವರಣದ ‘ಸೃಜನ– ಅಣ್ಣಾಜಿರಾವ್‌ ಸಿರೂರ’ ರಂಗಮಂದಿರ ಹಾಗೂ ಕರ್ನಾಟಕ ವಿದ್ಯಾವರ್ಧಕ ಸಂಘದ ಪಾಟೀಲ ಪುಟ್ಟಪ್ಪ ಸಭಾ ಭವನದಲ್ಲಿ ನಾಟಕ ಪ್ರದರ್ಶನಗಳು ನಡೆಯುತ್ತವೆ. ಸೃಜನ ರಂಗಮಂದಿರವನ್ನು ದಾಸ ಟ್ರಸ್ಟ್‌ನವರು ನಿರ್ವಹಣೆ ಮಾಡುತ್ತಾರೆ.

‘ಸೃಜನ ರಂಗಮಂದಿರ (ಒಳಾಂಗಣ) ನವೀಕರಣ ಕಾಮಗಾರಿ ಕೈಗೆತ್ತಿಕೊಳ್ಳಲು ಉದ್ದೇಶಿಸಲಾಗಿದೆ. ಪಕ್ಕದಲ್ಲಿನ ಆಂಪಿ ಥಿಯೇಟರ್‌ ಅನ್ನು ಅಭಿವೃದ್ಧಿಪಡಿಸಲಾಗುವುದು. ಸರ್ಕಾರವು ಬೆಳಕು, ಧ್ವನಿ ವ್ಯವಸ್ಥೆ ನಿರ್ವಹಣೆ ನಿಟ್ಟಿನಲ್ಲಿ ತಾಂತ್ರಿಕ ಸಿಬ್ಬಂದಿ ನೇಮಕ ಮಾಡಬೇಕು’ ಎಂದು ದಾಸ ಟ್ರಸ್ಟ್‌ನ ಖಜಾಂಚಿ ಸಮೀರ ಜೋಶಿ ತಿಳಿಸಿದರು.

‘ರಂಗಶಾಲೆ ಆರಂಭಿಸಬೇಕು, ಕಲಾವಿದರ ಪಗಾರ ₹ 20 ಸಾವಿರಕ್ಕೆ ಹೆಚ್ಚಿಸಬೇಕು, ಕಲಾವಿದರ ಕಲ್ಯಾಣ ನಿಧಿ ಸ್ಥಾಪಿಸಬೇಕು, ವಸತಿಗೆ ಕಟ್ಟಡ ನಿರ್ಮಾಣ ಮಾಡಬೇಕು, ತಾಲೀಮು ಕೊಠಡಿಗಳನ್ನು ನಿರ್ಮಿಸಬೇಕು, ರಂಗ ಪ್ರಾಧಿಕಾರ ಸ್ಥಾಪಿಸಬೇಕು’ ಎಂದು ಕಲಾವಿದರು ಒತ್ತಾಯಿಸುತ್ತಾರೆ.